ANG laktod nga tubag maoy oo. Si Jehova nagsaad niadtong iyang gipaboran: “Akong pasayloon ang ilang kasaypanan, ug dili ko na hinumdoman ang ilang sala.” (Jeremias 31:34) Busa gipasaligan ta ni Jehova nga sa dihang siya mopasaylo sa mga mahinulsolon, dili na niya hinumdoman ang ilang mga sala. Apan nagpasabot ba kana nga ang Maglalalang sa halapad nga uniberso dili na makahinumdom sa mga sala nga iyang gipasaylo? Ang mga pulong ni Ezequiel nagpatin-aw kon sa unsang paagi ang Diyos magpasaylo ug malimot sa mga sala.—Basaha ang Ezequiel 18:19-22.

Pinaagi kang propetang Ezequiel, gipahayag ni Jehova ang paghukom batok sa dili-matinumanong Juda ug Jerusalem. Ang nasod sa katibuk-an mitalikod sa pagsimba kang Jehova ug ang yuta ilang gipunog kapintasan. Gitagna ni Jehova nga laglagon sa Babilonya ang Jerusalem, ang kaulohan sa Juda. Apan bisan pa sa maong paghukom, si Jehova naghatag ug mensahe sa paglaom. Ang matag indibiduwal may kapilian; ang matag usa manubag sa iyang binuhatan.—Bersikulo 19, 20.

Nan, komosta kon ang usa magbag-o? Si Jehova miingon: “Mahitungod sa daotan, kon siya motalikod sa tanan niyang mga sala nga iyang nahimo ug siya motuman sa tanan nakong mga lagda ug mobuhat sa hustisya ug sa pagkamatarong, siya sa pagkamatuod mabuhi. Siya dili mamatay.” (Bersikulo 21) Oo, si Jehova ‘andam mopasaylo’ sa makasasala nga mibiya sa daotang dalan, nga tinuod nga naghinulsol.—Salmo 86:5.

Komosta ang mga sala nga iyang nahimo? “Ang tanan niyang kalapasan nga iyang nahimo—kini dili na pagahinumdoman batok kaniya,” miingon si Jehova. (Bersikulo 22) Matikdi nga ang mga sala sa usa nga mahinulsolon “dili na pagahinumdoman batok kaniya.” Nganong hinungdanon kini?

Sa Bibliya, ang Hebreohanong pulong nga gihubad ug “paghinumdom” wala lamang magpasabot ug paghunahuna sa nangagi. Bahin niini, ang usa ka reperensiya nag-ingon: “Sagad nagpasabot kinig usa ka aksiyon o makita kini nga gikombinar sa mga berbong naglangkit ug aksiyon.” Nan, ang “paghinumdom” mahimong magpasabot ug “paglihok.” Busa, sa dihang si Jehova miingon nga ang mga sala sa usa nga mahinulsolon “dili na pagahinumdoman batok kaniya,” Siya nagpasabot nga human niana dili na Siya molihok batok sa maong indibiduwal tungod sa mga sala niini, sama sa pag-akusar o pagsilot kaniya. *

Makatandog sa kasingkasing ang bug-os nga pagpasaylo ni Jehova nga gipakita sa Ezequiel 18:21, 22. Sa dihang siya mopasaylo sa atong mga sala, dili na niya kana gamiton batok kanato sa umaabot. Hinunoa, isalibay niya sa iyang luyo ang mga sala sa mga mahinulsolon. (Isaias 38:17) Sama rag gipapas niya kana.—Buhat 3:19.

Ingong mga dili-hingpit, gikinahanglan nato ang kaluoy sa Diyos. Kon buot hunahunaon, kita makasala sa makadaghan. (Roma 3:23) Apan gusto ni Jehova nga mahibalo kita nga kon tiunay tang maghinulsol, siya andam mopasaylo. Ug sa dihang siya mopasaylo, siya malimot—sa ato pa, dili niya kita akusahan o silotan tungod sa mga sala nga gipasaylo na niya. Makapahupay gayod kana! Ang kaluoy ba sa Diyos nagtukmod nimo sa pagpakigsuod kaniya?

Sugyot nga pagbasa sa Bibliya sa Hulyo:

▪ Ezequiel 6–20

[Footnote]