Ang Bibliya Makabag-o sa Kinabuhi

NGANONG ang usa ka tawo nga nagdako sa pamilyang sirado Katoliko ug may malamposong karera ingong huwes nahimong Saksi ni Jehova? Unsay nagtukmod sa usa ka terorista sa pagbiya sa kapintasan ug mahimong ministro sa relihiyon? Basaha ang ilang asoy.

“Milalom ang Akong Pagsabot sa Kon unsay Husto ug Sayop.”—SEBASTIÃO ALVES JUNQUEIRA

NATAWO: 1946

NASOD: BRAZIL

KANIADTO: HUWES

KAAGI: Ang akong pamilya nagpuyo sa baryo, mga unom ka kilometro gikan sa lungsod sa Piquete. Ang akong ginikanan may gamayng uma nga maoy nagtagana sa among panginahanglan. Sa Piquete ko nag-eskuyla, busa mipalit kog daang bisikleta, nga nakapasayon sa akong pag-adto sa lungsod. Kabos ang mga tawo sa among lugar, apan ang lungsod hinlo ug wala kaayoy krimen. Kadaghanan sa mga lalaki didto nagtrabaho sa usa ka pabrikag armas para sa militar.

Kugihan kong magtuon ug nakaeskuyla ko sa Aeronautical Military School sa duol nga siyudad diin, niadtong 1966, migraduwar ko ingong sarhento. Dayon mikuha kog abogasiya ug migraduwar niana. Sa ulahi, miaplay ko sa pagkahepe sa kapolisan. Sa 1976, nakapasar ko sa eksam ug natudlo sa maong posisyon. Usahay ang akong trabaho maglakip sa pagkahimong administrador sa prisohan. Nianang panahona, ang mga Saksi ni Jehova sagad mangayog permiso nga mosangyaw sa mga piniriso. Kanunay pod nilang ipaambit nako ang mensahe sa Bibliya. Dako kog pagtahod sa Diyos. Nalipay ko sa pagkasayod nga ang Diyos may ngalan, si Jehova, ug mahimo tang makighigala niya.

Sa hinayhinay, naningkamot kong mahuptan ang posisyon ingong huwes. Sa 1981, nakapasar kog laing eksam ug nahimong huwes sa estado. Dayon sa 2005, natudlo ko nga huwes sa court of appeals sa São Paulo.

GIBAG-O SA BIBLIYA ANG AKONG KINABUHI: Wala madugay human sa akong paggraduwar sa abogasiya, nagsugod kog basa sa Bibliya—nga nakapausab sa akong panghunahuna. Ako sirado Katoliko. May paryente kong mga pari ug usa ka obispo, ug sakristan ko. Sa dili pa mohatag ug sermon ang pari, akong basahon ang giasayn nga bahin sa basahon sa pangadyeon. Kasagaran sa Katolikong mga pamilya dili tigbasag Bibliya. Busa, wala gyod malipay si Mama sa dihang nasayran niya nga nagbasa ko sa Bibliya. Misulay siya pagpahunong nako kay basig mabuang kono ko. Bisan pa niana, nagpadayon ko pagbasa kay wala koy nakitang daotan niana.

 Tingali ang akong pagkamaukit-ukiton maoy nagtukmod nako sa pagbasa sa Bibliya. Gusto kong mahibalog dugang bahin sa mga pari ug sa ilang papel sa simbahan. Misugod pod ko pagbasa bahin sa liberation theology apan ang mga pangatarongan ug lohika niini daghag sayop maong wala ko makombinsir.

Sa samang higayon, ang akong dentista, nga usa ka Budhista, naghatag nakog libro nga gihatag ra sab kaniya. Ang libro nag-ulohang Did Man Get Here by Evolution or by Creation? * Ako ning gidawat, kay naghunahuna kong makalingaw ning basahon ug itandi sa The Origin of Species, ni Charles Darwin. Ang mga argumento sa Did Man Get Here by Evolution or by Creation? lohikal ug makapakombinsir. Akong napamatud-an nga ang teoriya sa ebolusyon dili gyod tinuod.

Misamot ang akong pagkamaukiton sa dihang nabasa nako sa libro ang bahin sa paglalang. Gusto kog dugang mga libro nga gipatik sa mga Saksi ni Jehova. Dihay nag-ingon nga Saksi ang usa ka mekaniko sa aeronautics school. Nakigsulti ko niya, ug gihatagan ko niyag pipila ka libro. Nianang panahona, wala nako dawata ang gitanyag nga pagtuon sa Bibliya uban sa mga Saksi. Nagtuo kong mahimo ra nako ning tun-an nga ako ra.

Sa pagsugod nakog basa sa Bibliya, nakadesidir ko nga kay minyo na man ko, maayong basahon sab kini uban sa akong pamilya. Kami magtuon kada semana ug magbasa sa Bibliya. Ingong mga Katoliko, sagad namong makauban ang mga pari ug obispo. Busa, nainteres ko sa akong nabasa sa Juan 14:6: “Si Jesus miingon kaniya [ang tinun-ang si Tomas]: ‘Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.’” Human kana susiha pag-ayo, nakombinsir kong ang kaluwasan naggikan kang Jehova pinaagi kang Jesus. Gipatuo man god ming ang kaluwasan naggikan sa mga pari.

Duha pa ka teksto ang nakausab sa akong tinamdan sa Simbahang Katoliko ug sa mga pagtulon-an niini. Ang usa mao ang Proverbio 1:7, nga nag-ingon: “Ang pagkahadlok kang Jehova mao ang sinugdanan sa kahibalo. Ang kaalam ug disiplina mao ang gitamay sa mga buangbuang.” Ang lain mao ang Santiago 1:5, nga nag-ingon: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” Uhaw kaayo ko sa kahibalo ug kaalam, nga wala matagbaw sa akong pag-adtoan sa simbahan. Busa mihunong kog simba.

Sa 1980, ang akong asawa misugod pagtuon sa Bibliya uban sa mga Saksi. Kon naa ko sa balay, moapil ko nila. Sa ngadtongadto, nagtuon sab ko. Apan, dugay ming nakadesisyon nga magpabawtismo ingong mga Saksi ni Jehova. Ang akong asawa nabawtismohan sa 1994, ug ako sa 1998.

MGA KAAYOHAN NGA AKONG NABATONAN: Ang upat namo ka anak among namatuto sa mga sukdanan ni Jehova. (Efeso 6:4) Duha ang akong anak nga lalaki. Sila naningkamot sa pag-atiman sa espirituwalidad sa mga Saksi sa ilang mga kongregasyon. Ang akong duha ka anak nga babaye masiboton kaayo sa pagsangyaw. Ang akong asawa naggugol ug daghang oras kada bulan sa pagtabang sa mga tawo nga makakat-on sa Bibliya, ug ako nag-alagad ingong ansiyano sa among kongregasyon.

Sa dihang na-Saksi ko, mas milalom ang akong pagsabot sa kon unsay husto ug sayop. Ingong huwes, naningkamot kong ipadapat ang paagi ni Jehova sa pagdumala sa lainlaing kaso—nagtimbangtimbang sa tanang  sirkumstansiya, nagmakataronganon, ug nagmaluluy-on kon may mga kahimtang nga makapagaan sa silot.

Daghan na kog gigunitang kaso sa kapintasan, krimen, pag-abusog bata, ug uban pang bug-at nga mga kaso. Bisan pa niana, wala makubali ang akong pagbati. Kon magtan-aw kog balita, maglagot ko sa kaylap nga pagkadaot sa moralidad niining kalibotana. Mapasalamaton ko kang Jehova nga nasabtan nako ang hinungdan sa pagdaghan sa krimen, ug ang maanindot nga paglaom.

“Ang Prisohan Wala Makausab Nako.”—KEITH WOODS

NATAWO: 1961

NASOD: NORTHERN IRELAND

KANIADTO: TERORISTA

KAAGI: Natawo ko sa 1961 sa Portadown, usa ka puliking lungsod sa Northern Ireland. Protestante mi, ug nagdako ko sa dapit nga nagsagol ang mga Katoliko ug Protestante. Kabos ang kadaghanan sa mga pamilya. Apan bisag mga pobre mi, suod mi sa usag usa.

Makauulaw ang akong pagkinabuhi kaniadto. Sa 1974, nalangkit ko sa pag-awayay sa Northern Ireland nga gitawag ug “Troubles.” Nianang panahona, nag-anam ka gubot ang among komunidad. Pananglitan, usa ka gabii niana, si Papa nga manedyer sa Ulster Carpet Factory, didto sa trabahoan nga nagbansayg duha ka batan-ong lalaki nga mga Katoliko nga silingan namo. Kasamtangan, may nag-itsag bomba sa sala sa gipuy-an sa mga batan-on, nga nakapatay sa ilang ginikanan ug igsoong lalaki.

Misamot ang mga problema, ug nagsugod ang paggubatay. Gipanunog ang balay sa mga Protestante diha sa dapit sa mga Katoliko, ug ang mga Katoliko gihasi diha sa komunidad sa mga Protestante. Busa, mga Protestante na lang ang nahibilin sa among lugar. Wala madugay gidakop ko ug gisentensiyahag tulo ka tuig nga pagkabilanggo tungod sa pagkalambigit nako sa pagpamomba.

Sa prisohan, nakaamigo kog piniriso nga ilado sa komunidad sa mga loyalista. Mora mig magsoon, ug sa ulahi nahimo kong best man sa iyang kasal. Ang prisohan wala makausab nako o kaniya. Sa dihang gibuhian mi, mibalik mi sa among politikal nga kalihokan, apan niining higayona mas grabe ang among gihimo. Tungod niana, napriso pag-usab ang akong amigo. Samtang didto sa prisohan, siya gipatay.

Buot sab ko nilang patyon, ug dihay higayon nga giitsahag bomba ang akong sakyanan. Apan misamot lang hinuon ko ka determinado sa among kawsa.

Niadtong tungora, mitabang ko sa paghimog dokumentaryo bahin sa “Troubles,” nga gipasalida sa British TV. Tungod niana, nadugangan ang akong problema. Pananglitan,  pag-uli nako usa ka gabii niana wala na diha ang akong asawa. Wala madugay human niana, tungod sa maong programa sa TV, ang akong anak nga lalaki gikuha kanako. Nahinumdom ko nga samtang nag-atubang sa samin ako miingon, “Kon duna may Diyos, tabangi ko.”

Pagka-Sabado niana, nagkita mi sa akong kailang si Paul, kinsa nahimong Saksi ni Jehova. Giestoryahan ko niya bahin sa Bibliya. Duha ka adlaw sa ulahi, gipadad-an ko niyag Bantayanang Torre. May artikulo nianang magasina nga nagkutlo sa giingon ni Jesus sa Juan 18:36: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away na unta aron dili ako ikatugyan ngadto sa mga Hudiyo. Apan, sa pagkatinuod, ang akong gingharian dili gikan niini nga tinubdan.” Dako kaayo nag epekto nako. Nianang adlawa, nagsugod pagkausab ang akong kinabuhi.

GIBAG-O SA BIBLIYA ANG AKONG KINABUHI: Gisugdan ko ni Paul ug pagtuon sa Bibliya. Sa ulahi, si Bill nga Saksi sab, maoy nagpadayon pagtuon nako. Ako siyang gilisodlisod; daghan kaayo kog pangutana! Daghang ministro usab ang akong paadtoon sa balay aron pamatud-ang sayop si Bill. Apan nakita gyod nako ang kamatuoran sa Pulong sa Diyos.

Nahinumdom ko nga usa ka higayon niana akong giingnan si Bill nga dili usa moadto sa balay alang sa pagtuon kay daghang barikada sa among lugar ug seguradong kompiskahon ug sunogon ang iyang sakyanan. Apan, miadto gihapon si Bill. Gibilin niya ang iyang sakyanan ug nagbisikleta. Kinsa god intawoy mokompiskar ug bisikleta? Sa laing higayon, kami ni Bill nagtuon sa Bibliya sa among balay sa dihang miabot ang mga polis ug sundalo aron sa pagdakop nako. Samtang dad-on na ko nila, giingnan ko ni Bill nga mosalig kang Jehova. Kadtong mga higayona nakatandog gayod nako.

Seguradong daghan ang nakurat sa una nakong pagtambong sa tigom sa mga Saksi diha sa Kingdom Hall. Taas kog buhok ug nag-ariyos, ug ang estilo sa akong dyaket nga panit nagpaila nga sakop ko sa usa ka politikal nga grupo. Apan, dili ko makatuong giabiabi gihapon ko sa mga Saksi. Maayo kaayo sila nako.

Bisag nagtuon na ko sa Bibliya, nakig-uban gihapon ko sa akong mga barkada. Apan sa ngadtongadto, ang kamatuoran sa Bibliya midulot sa akong kasingkasing. Akong naamgohan nga kon buot nakong moalagad kang Jehova, kinahanglang mohimo kog kausaban sa akong panglantaw sa politika ug sa pagpilig mga kauban. Dili kadto sayon. Apan samtang nagkadako ang akong kahibalo sa Bibliya ug gilig-on ako ni Jehova, nakahimo ko sa maong mga kausaban. Ako nagpatupi, wala na mag-ariyos, ug nagpalit ug amerkana. Tungod usab sa akong kahibalo, nakakat-on ko sa pagpakitag maayong tinamdan sa uban.

MGA KAAYOHAN NGA AKONG NABATONAN: Kriminal ug terorista ko kaniadto maong ilado kaayo ko sa mga polis ug sundalo. Karon nausab na ang kahimtang. Pananglitan, sa dihang mitambong ko sa akong unang kombensiyon sa mga Saksi, nga gipahigayon sa lungsod sa Navan, gieskortan ko sa mga awtoridad latas sa Ireland ug Northern Ireland. Apan karon, motambong kog mga kombensiyon nga wala nay eskort. Libre na sab kong makauban ug sangyaw sa akong isigka-Saksi nga si Paul ug Bill ug sa ubang mga igsoon sa kongregasyon.

Samtang miarang-arang ang akong paagi sa pagkinabuhi, nahimo kong bahin sa kongregasyon. Didto akong nakaila ang usa ka Saksi nga si Louise, ug nagminyo mi. Gawas pa niana, nagkahiusa mi pag-usab sa akong anak.

Kon akong hinumdoman ang akong kinabuhi kaniadto, magmahay ko nga nakapahinabo kog kadaot sa uban. Apan makapamatuod ko nga ang Bibliya makatabang gayod sa mga tawong sama nako nga mag-usab, gikan sa daotang pagkinabuhi ngadto sa kinabuhi nga may katuyoan ug paglaom.

[Footnote]

[Blurb sa panid 12]

Wala gyod malipay si Mama sa dihang nasayran niya nga nagbasa ko sa Bibliya