Katuohan ba ang mga Milagro sa Bibliya?

KON suginlan kag kahibulongang estorya, dili ba ang kredibilidad sa nag-asoy mag-apektar kon angay ka bang motuo niana o dili? Nalangkit niana dili lang ang paagi sa pag-asoy sa maong tawo kondili ang iyang reputasyon usab sa pagkamatinud-anon. Kon sulod sa katuigan siya kanunayng nagsultig tinuod ug wala gayod mamakak, makataronganon lang nga motuo ka sa iyang gisulti karon.

Ingon usab niana ang mga milagro sa Bibliya. Walay usa kanato nga nabuhi sa panahong nahitabo kana. Apan atong matino ang pagkakatuohan sa asoy sa Bibliya—kon kini naundan sa kamatuoran. Sa unsang paagi? Aniay pipila ka butang nga makadugang sa pagkakatuohan sa mga asoy sa Bibliya bahin sa mga milagro.

Daghang milagro ang gihimo diha sa publiko. Dihay mga panahon nga nakita kini sa linibo, kondili man sa minilyong tawo. (Exodo 14:21-31; 19:16-19) Wala kini himoa sa tago.

Ang mga milagro dili komplikado. Kini gihimo nga walay linaing mga gamit o mapasigarbohong pasundayag, ug walay malipatlipatong mga suga. Kasagaran, ang mga milagro nga narekord sa Bibliya gihimo nga wala damha ug agig sanong sa hangyo sa pipila ka tawo. (Marcos 5:25-29; Lucas 7:11-16) Sa maong mga panghitabo, ang mga milagro wala gayod planoha sa naghimo niana.

Ang motibo sa mga naghimo sa milagro maoy dili aron mainila, himayaon, ug makabatog bahandi. Hinunoa, kadto maoy aron makahatag ug himaya sa Diyos. (Juan 11:1-4, 15, 40) Gihukman ang si bisan kinsa nga gustong makabatog bahandi pinaagi sa maong milagrosong gahom.—2 Hari 5:15, 16, 20, 25-27; Buhat 8:18-23.

Ang nagkadaiyang milagro nga narekord sa Bibliya nagpakita nga dili gayod kini iya sa tawo. Pananglitan, ang dagat ug hangin gipakalma, ang tubig gihimong bino, ang ulan gipahunong ug gipabusdak, ang mga masakiton giayo, ug gipasig-uli ang panan-aw sa mga buta. Kining tanan ug daghan pa niana nagpakita nga ang labaw-tawhanong gahom nga makaimpluwensiya sa tanang butang mao gayod ang nagpaluyo sa maong mga milagro.—1 Hari 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7.

Ang mga magsusupak nga nakakita sa mga milagro wala mokuwestiyon nga nahitabo kana. Sa dihang gibanhaw ni Jesus ang iyang higalang si Lazaro, ang mga kaaway ni Jesus wala makiglalis nga si Lazaro namatay. Nganong molalis man sila? Si Lazaro upat ka adlaw nang diha sa lubnganan. (Juan 11:45-48; 12:9-11) Bisan kasiglohan human sa  pagkamatay ni Jesus, ang mga magsusulat sa Jewish Talmud padayong midawat nga si Jesus may milagrosong gahom. Ang ila lang gikuwestiyon mao ang tinubdan sa maong gahom. Sa susama, sa dihang gipaatubang sa Hudiyohanong korte ang mga tinun-an ni Jesus, wala sila pangutan-a nga “Naghimo ba mog milagro?” Kondili sila gipangutana: “Pinaagi sa unsang gahom o kang kansang ngalan inyong gibuhat kini?”—Buhat 4:1-13.

Busa katuohan ba ang giingon sa Bibliya bahin sa mga milagro? Base sa atong nahisgotan, dayag nga ang mga asoy sa Bibliya bahin sa mga milagro may mga pamatuod sa pagkakatuohan niini. Duna pay laing mga rason kon nganong kasaligan kini nga mga asoy. Pananglitan, sa dihang ang Bibliya mohisgot ug panghitabo, sagad hisgotan niini ang panahon, dapit, ug ngalan sa mga karakter. Bisan ang mga kritiko sa Bibliya nahingangha sa pagkatukma sa mga detalye sa kasaysayan nga makita sa Bibliya. Natuman ang gatosan ka tagna sa Bibliya, bisag ang kinagamyang detalye. Dugang pa, ang Bibliya naundan ug daghang tambag kon sa unsang paagi makabatog maayong relasyon ang mga tawo—mga tambag nga nakatabang sa mga tawo bisag unsay panuigon ug kahimtang sa kinabuhi. Kon bahin sa mga relasyon sa mga tawo, walay sama ang mga tambag nga anaa sa Bibliya.

Kon kulang pa ang imong pagsalig sa Bibliya, nganong dili mogahin ug panahon sa pagsusi pag-ayo niini? Kon mas masinati mo kini, mas modako ang imong pagsalig niini. (Juan 17:17) Imong makita nga makasalig ka sa gisulti niini bahin sa mga milagro nga nahitabo kaniadto. Sa dihang motuo ka sa maong mga asoy, may lig-on ka nang basehanan nga mosalig sa giingon sa Bibliya bahin sa umaabot nga hapit nang mahitabo.

[Hulagway sa panid 7]

Ang mga magsusupak ni Jesus wala makiglalis nga si Lazaro namatay