Mahitabo ba Gayod ang mga Milagro?—Tulo ka Komon nga Pagtutol

PAGTUTOL 1: Ang mga milagro imposibleng mahitabo kay gilapas niini ang balaod sa kinaiyahan. Ang atong pagsabot sa mga balaod sa kinaiyahan gibase sa naobserbahan sa mga siyentipiko sa atong palibot. Apan, ang maong mga balaod nahisama sa mga lagda sa gramarya sa usa ka pinulongan—posibleng duna kiniy pipila ka eksepsiyon. Sa pagkatinuod, ang atong pagsabot niini nga “mga lagda” limitado tingali kaayo. (Job 38:4) Ang usa ka masibotong siyentipiko mogugol tingali sa iyang tibuok kinabuhi sa pagtuon sa usa ka balaod sa kinaiyahan. Apan, ang bisan usa lang ka “eksepsiyon” igo nang makapausab sa iyang pagsabot sa maong balaod. Sama sa giingon sa usa ka panultihon, “Bisag ang usa lang ka itom nga sisne, igo nang magpanghimakak sa teoriya nga ang tanang sisne puti.”

Gipakita sa usa ka sugilanon kon unsa ka daling ibase ang opinyon sa dili-kompletong impormasyon. Si John Locke (1632-1704) nag-asoy bahin sa embahador sa Holland ug sa hari sa Siam: Samtang naghubit sa iyang nasod ngadto sa hari, nahisgotan sa embahador nga may mga panahon nga ang elepante makalakaw sa tubig. Ang hari wala motuo niana ug naghunahuna nga ang embahador namakak. Apan, ang embahador igo lang naghubit sa usa ka butang nga wala pa masinati sa hari. Wala mahibalo ang hari nga sa dihang ang tubig mahimong yelo, makalakaw niini ang elepante. Daw imposible kini alang sa hari kay wala siya masayod sa tanang impormasyon.

Tagda ang pipila ka kalamposan karon nga giisip tingaling imposible pipila lang ka dekada ang milabay:

● Ang usa ka ayroplano nga kasakyag kapin sa 800 ka pasahero makabiyahe nga deretso gikan sa New York ngadto sa Singapore, sa gikusgong 900 kilometros kada oras.

 ● Pinaagig mga video conference, ang mga tawo sa lainlaing kontinente makakomunikar na nga magkit-anay.

● Libolibo ka awit ang masulod sa usa ka gadyet nga mas gamay pa sa bayanan sa posporo.

● Ang mga siruhano makahimo sa pag-transplant ug kasingkasing ug ubang parte sa lawas.

Busa, unsa may atong ikahinapos? Kon ang mga tawo makahimog mga butang nga giisip nga imposible pipila lang ka tuig kanhi, nan ang Diyos nga maoy naglalang sa uniberso ug sa tanan nga anaa niana makahimo gayod ug katingalahang mga buhat nga wala pa nato masabti sa bug-os o dili masundog sa pagkakaron. *—Genesis 18:14; Mateo 19:26.

PAGTUTOL 2: Ang Bibliya nagdepende sa mga milagro aron patuohon ang mga tawo. Ang Bibliya wala mag-ingon nga tuohan nato ang tanang milagro. Gani, kini nagpasidaan kanato nga dili basta mosalig na lang sa mga milagro ug sa gamhanang mga ilhanan. Matikdi kining tin-awng pasidaan: “Ang pag-anhi sa masinupakon sa balaod may kalabotan . . . sa buhat ni Satanas nga gipadayag sa tanang matang sa milagro nga dili tinuod, mga ilhanan ug mga kahibulongang buhat, ug diha sa tanang matang sa daotan nga naglimbong.”—2 Tesalonica 2:9, 10, Ang Biblia Bag-ong Hubad nga Binisaya.

Si Jesu-Kristo nagpasidaan usab nga daghan ang mag-angkong nagsunod kaniya apan dili niya tinuod nga mga sumusunod. Ang uban moingon pa gani: “‘Ginoo, Ginoo,’ wala ba kami magsangyaw sa imong ngalan, ug sa imong ngalan usab naghingilin sa mga demonyo ug naghimog daghang milagro?”  (Mateo 7:22, Ang Biblia Bag-ong Hubad nga Binisaya) Apan si Jesus miingon nga dili niya sila dawaton ingong iyang mga sumusunod. (Mateo 7:23) Nan, dayag nga si Jesus wala magtudlo nga ang tanang milagro gikan sa Diyos.

Ang Diyos wala mag-ingon sa iyang mga magsisimba nga ibase lamang ang ilang pagtuo sa mga milagro. Hinunoa, ang ilang pagtuo kinahanglan nga lig-ong ipasukad sa mga ebidensiya.—Hebreohanon 11:1.

Pananglitan, tagdon nato ang usa ka gibantog nga milagro nga nasulat sa Bibliya, ang pagkabanhaw ni Jesu-Kristo. Katuigan human niana, ang pipila ka Kristohanon sa Corinto misugod pagkuwestiyon kon tinuod bang nabanhaw si Jesus. Sa unsang paagi sila gitabangan ni Pablo? Miingon ba lamang siya, “Lig-ona ang inyong pagtuo”? Wala. Matikdi kon sa unsang paagi niya sila gipahinumdoman sa lig-ong ebidensiya. Siya miingon nga si Jesus “gilubong, oo, . . . siya gibangon sa ikatulo ka adlaw sumala sa Kasulatan; ug nga siya nagpakita kang Cefas, unya ngadto sa napulog-duha. Human niana siya nagpakita sa kapin sa lima ka gatos ka igsoon sa usa ka higayon, nga ang kadaghanan kanila nagpabilin pa hangtod sa pagkakaron.”—1 Corinto 15:4-8.

Hinungdanon bang motuo ang maong mga Kristohanon niana nga milagro? Si Pablo mipadayon: “Kon si Kristo wala bangona, ang among pagwali tino nga kawang, ug ang atong pagtuo kawang.” (1 Corinto 15:14) Hinungdanon kaayo kang Pablo nga ibase ang iyang pagtuo sa milagro nga nahitabo gayod. Ug si Pablo nahibalo nga tinuod kana tungod sa asoy sa gatosan ka tawo nga nakasaksi niana kinsa buhi pa nianang panahona. Gani, ang maong mga nakasaksi andam mamatay inay nga ilimod ang ilang nakita.—1 Corinto 15:17-19.

PAGTUTOL 3: Ang mga milagro maoy kinaiyanhong panghitabo nga nasaypag sabot sa dili-edukadong mga tawo. Ang pipila ka eskolar misulay sa pagpatin-aw sa mga milagro sa Bibliya ingong kinaiyanhong panghitabo lamang ug dili gikan sa Diyos. Gibati nila nga tungod niini mahimong mas katuohan ang mga asoy sa Bibliya. Bisag tinuod nga ang kinaiyanhong panghitabo nalangkit tingali sa pipila ka milagro—sama sa mga linog, hampak, ug pagdahili sa yuta—ang maong mga opinyon may panagsama. Wala nila konsideraha ang panahon nga nahitabo ang milagro ingon sa gipakita sa Kasulatan.

Pananglitan, ang pipila miingon nga ang unang hampak nga gipadangat sa Ehipto, ang pagkahimong dugo sa Suba sa Nilo, sa pagkatinuod maoy resulta sa pagkabanlas sa pula nga yuta ngadto sa Nilo, lakip sa pulahong mga organismo nga gitawag ug flagellates. Apan, ang asoy sa Bibliya nag-ingon nga ang suba nahimong dugo, dili pula nga lapok. Kon basahon natog maayo ang Exodo 7:14-21 atong makita nga kining milagroha nahitabo sa panahong gihapak ni Aaron, sa sugo ni Moises, ang Suba sa Nilo pinaagi sa iyang sungkod. Bisan pag ang pagkausab sa kolor sa suba kinaiyanhong nahitabo, ang pagkahitabo niini sa panahong gihapak ni Aaron ang suba maoy usa ka milagro mismo!

Ingong laing pananglitan sa kahinungdanon sa panahon nga nahitabo ang milagro, tagda ang nahitabo sa dihang ang nasod sa Israel mosuloray na sa Yutang Saad. Dili sila makatabok kay taas kaayo ang tubig sa Suba sa Jordan. Ang Bibliya nag-asoy sa sunod nga nahitabo: “Sa diha gayod nga ang mga nagyayong sa Arka nakaabot sa Jordan ug ang mga tiil sa mga saserdote nga nagyayong sa Arka natuslob sa daplin sa katubigan . . . , niana ang tubig nga nag-agay gikan sa ibabaw mipondo. Kini mitubo ingong usa ka diki nga halayo kaayo didto sa Adan.” (Josue 3:15, 16) Tungod ba kini sa linog o sa pagdahili sa yuta? Ang asoy wala mag-ingon. Apan ang panahon nga kini nahitabo maoy milagroso. Kini nahitabo gayod sa panahon nga giingon ni Jehova nga mahitabo kini.—Josue 3:7, 8, 13.

Busa, duna ba gayoy milagro? Ang Bibliya nag-ingon nga duna. Sumala sa giingon niini, ang mga milagro dili lang kay kinaiyanhong panghitabo. Nan, makataronganon ba ang pag-ingon nga imposible kana tungod lang kay dili kana mahitabo adlaw-adlaw?

[Footnote]

[Hulagway sa panid 5]

Mga dekada lang kanhi, daghan ang naghunahuna nga imposibleng makapalupad ug sakyanan sa gikusgong gatosan ka kilometro kada oras