Mga Milagrong Hapit Nang Mahitabo

KON gieskedyul ka alang sa usa ka makuting operasyon, unsay imong bation kon imong mahibaloan nga ang siruhano wala pa sukad makahimo nianang matanga sa operasyon? Seguradong mabalaka ka. Apan komosta kon, sa laing bahin, imong mahibaloan nga siya mao ang kinamaayohang siruhano sa iyang natad ug nakahimo na siyag gatosan ka malamposong operasyon nga sama nianang himoon kanimo? Dili ba mas makasalig ka nga makatabang siya nimo?

Ang atong masakitong kalibotan karon nagkinahanglag dinaliang “operasyon.” Pinaagi sa iyang Pulong, ang Bibliya, si Jehova nga Diyos nagsaad nga iyang ipasig-uli ang Paraiso sa yuta. (2 Pedro 3:13) Apan aron kana mahitabo, kinahanglan unang bug-os nga wagtangon ang pagkadaotan. (Salmo 37:9-11; Proverbio 2:21, 22) Ang tanang dili maayong panghitabo sa atong palibot kinahanglang wagtangon sa dili pa ipasig-uli ang paraiso. Nagkinahanglan gayog milagro aron kana mahitabo!—Pinadayag 21:4, 5.

Ang mga Saksi ni Jehova nagtuo nga hapit na kanang mahitabo. Ngano? Kay ang mga milagro nga nahimo na ni Jehova nga Diyos nagpamatuod nga siya may gahom sa pagtuman sa iyang mga saad. Itandi ang unom lang sa mga milagro nga nasulat sa Bibliya ug ang mga saad niini alang sa umaabot.

 Hinaot nga padayon nimong tun-an ang mga saad sa Bibliya alang sa atong umaabot. Samtang molig-on ang imong pagtuo, mao man usab ang imong paglaom—ang paglaom nga mabuhi sa panahon sa dihang imong matagamtam ang kaayohan sa mga milagrong himoon ni Jehova.

 [Kahon/Mga hulagway sa panid 9, 10]

MILAGRO:

SI JESUS NAGPAKAON UG LINIBO PINAAGIG PIPILA LANG KA TINAPAY UG ISDA.—MATEO 14:13-21; MARCOS 8:1-9; JUAN 6:1-14.

SAAD:

“Ang yuta magapatungha gayod sa iyang bunga; ang Diyos, ang atong Diyos, magapanalangin kanato.”—SALMO 67:6.

KAHULOGAN ALANG NATO:

WALA NA GAYOY MAG-ANTOS TUNGOD SA KAGUTOM.

MILAGRO:

GIPASIG-ULI NI JESUS ANG PANAN-AW SA BUTA.—MATEO 9:27-31; MARCOS 8:22-26.

SAAD:

“Ang mga mata sa mga buta mabuka.”—ISAIAS 35:5.

KAHULOGAN ALANG NATO:

ANG TANANG BUTA MAKAKITA.

MILAGRO:

GIAYO NI JESUS ANG MGA BALDADO.—MATEO 11:5, 6; JUAN 5:3-9.

SAAD:

“Ang bakol mosaka ingon sa laking osa.”—ISAIAS 35:6.

KAHULOGAN ALANG NATO:

ANG TANANG BALDADO MAMAAYO NA.

MILAGRO:

GIAYO NI JESUS ANG LAINLAING SAKIT.—MARCOS 1:32-34; LUCAS 4:40.

SAAD:

“Walay pumoluyo nga moingon: ‘Ako masakiton.’”—ISAIAS 33:24.

KAHULOGAN ALANG NATO:

ANG TANANG SAKIT MAWALA NA. MOHINGPIT NA ANG ATONG PANGLAWAS.

MILAGRO:

GIKONTROLAR NI JESUS ANG KLIMA.—MATEO 8:23-27; LUCAS 8:22-25.

SAAD:

“Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magbudlay sa walay kapuslanan.”—ISAIAS 65:21, 23.

“Ikaw mahilayo gikan sa pagpanglupig—kay wala kay kahadlokan—ug gikan sa bisan unsa nga makapalisang, kay kini dili moduol kanimo.”—ISAIAS 54:14.

KAHULOGAN ALANG NATO:

MAWALA NA ANG MGA KATALAGMAN.

MILAGRO:

GIBANHAW NI JESUS ANG MGA PATAY.—MATEO 9:18-26; LUCAS 7:11-17.

SAAD:

“Ang tanan nga anaa sa handomanang mga lubnganan . . . manggula.”—JUAN 5:28, 29.

“Ang dagat mitugyan sa mga patay nga diha niini, ug ang kamatayon ug ang Hades mitugyan sa mga patay nga diha kanila.”—PINADAYAG 20:13.

KAHULOGAN ALANG NATO:

PAGABANHAWON ANG ATONG MGA MINAHAL NGA NANGAMATAY NA.