Nganong Mainteres sa mga Milagro?

“Ang mga milagro, sumala sa kahulogan niini, naglapas sa mga prinsipyo sa siyensiya.”—RICHARD DAWKINS, KANHING PROPESOR SA PUBLIC UNDERSTANDING OF SCIENCE.

“Makataronganon gayod ang pagtuo sa mga milagro. Imbes nga supak sa relihiyosong pagtuo, kini maoy mga timailhan sa gugma sa Diyos ug sa iyang padayong pagpakiglabot sa kalalangan.”—ROBERT A. LARMER, PROPESOR SA PILOSOPIYA.

“MOTUO ka bag mga milagro?” Ingon sa gipakita sa maong mga komento, lainlain ang opinyon sa mga tawo. Apan, unsay imong tubag niana?

Tingali magpanuko ka sa pagtubag ug “Oo, motuo ko.” Lagmit gibati nimo nga ang pagbuhat niana mahimong magpakita nga ikaw may pagkamatuotuohon o dili edukado. Daghan ang mibatig sama niana.

Sa laing bahin, tingali kombinsido ka nga mahitabo gyod ang mga milagro. Hayan motuo ka sa mga milagro nga nasulat sa Bibliya, sama sa pagtungà ni Moises sa Pulang Dagat. Motuo ka usab tingali sa mga milagro nga nahitabo karon. Gani, gipakita sa usa ka di pa dugayng report nga “daghan sa mga taga-Kasadpan—pananglitan mga 75 porsiyento sa mga taga-Amerika ug 38 porsiyento sa mga taga-Britanya—ang nagtuo gihapon sa mga milagro.” (The Cambridge Companion to Miracles, giedit ni Graham H. Twelftree) Dugang pa, dili kay mga Kristohanon ray motuog milagro. Ang Britannica Encyclopedia of World Religions nag-ingon nga “halos tanang relihiyon” nagtuog milagrosong mga panghitabo.

O tingali mao kini ang imong tubag: “Ambot lang, ug dili ko interesado ana! Wa may nahitabong milagro sa akong  kinabuhi!” Sa pagkatinuod, nganong angay kang mainteres sa mga milagro?

Tagda kini nga situwasyon: Handurawa nga duna kay sakit nga dili maayo. Kon duna kay mabasa diha sa usa ka kasaligang medikal nga basahon bahin sa bag-ong tambal nga mahimong makaayo sa imong sakit, dili ba mogahin gyod kag panahon sa pagsusi niana? Sa susama, ang Bibliya nagsaad nga sa dili madugay mahitabo ang katingalahang mga milagro. Kini mag-apektar sa tanang tawo sa yuta. Dili ba mogahin gyod kag panahon sa pagsusi kon kasaligan ba ang maong saad?

Apan sa dili pa nato susihon kon unsa kanang gisaad nga mga milagro, atong tubagon ang tulo ka komon nga pagtutol labot niana.

[Kahon sa panid 3]

UNSA ANG MILAGRO?

Usa kini ka panghitabo nga dili arang mahimo sa bisan unsang gahom sa tawo o sa kinaiyahan ug sagad gituohang gipahinabo sa labaw-tawhanong gahom.