“Pakigdait Taliwala sa mga Tawo nga Iyang Gikahimut-an”
“Himaya sa Diyos sa kahitas-an, ug sa yuta pakigdait taliwala sa mga tawo nga iyang gikahimut-an.”—LUCAS 2:14.
Rason kon nganong ang pipila mosaulog ug Pasko.
Kada tuig, ang papa ug ubang lider sa relihiyon magwali bahin sa pakigdait, nga malaomong matuman panahon sa Pasko ang gipahayag sa anghel: “Sa yuta pakigdait taliwala sa mga tawo nga iyang gikahimut-an.” Ang uban moadto sa balaang mga dapit aron sa pagsaulog sa Pasko.
Nganong hagit kini?
Ang pakigdait panahon sa Pasko temporaryo lang. Pananglitan, niadtong Disyembre 1914, samtang ang Europe nalangkit sa Gubat sa Kalibotan I, ang kasundalohan sa Britain ug Germany nanggula sa ilang mga trinsera ug nag-ubag saulog sa Pasko. Sila nagpaambitayg pagkaon, ilimnon, ug sigarilyo. Nagdula pa gani silag saker. Apan, ang maong pakigdait wala magdugay. Sa usa ka sulat gikan sa panggubatan, usa ka sundalo sa Britain nag-asoy sa giingon kaniya sa usa ka sundalo sa Germany: “Karon duna tay pakigdait. Ugma makig-away ka alang sa imong nasod; ako alang sa akong nasod.”
Unsang mga prinsipyo sa Bibliya ang makatabang?
“Adunay usa ka bata nga natawo alang kanato. . . . Ang iyang ngalan pagatawgon nga . . . Prinsipe sa Pakigdait. Sa kadagaya sa prinsipenhong pagmando ug sa pakigdait walay kataposan.” (Isaias 9:6, 7) Dili ba makapadasig ang maong tagna bahin kang Jesu-Kristo? Siya wala matawo sa yuta aron lang magdalag usa ka adlawng pakigdait matag tuig. Ingong langitnong Magmamando, siya magdalag tinuod nga pakigdait nga dili gayod matapos.
“Pinaagi kanako [Jesus] makabaton kamo ug kalinaw. Sa kalibotan kamo adunay kasakitan, apan magmaisogon! Gidaog ko na ang kalibotan.” (Juan 16:33) Bisan karon, si Jesus nagtabang sa iyang mga sumusunod aron motunhay ang kalinaw sa ilang taliwala. Tinuod, ang mga Kristohanon dunay kasakitan. Apan, pinaagi sa Bibliya, ilang nasabtan kon nganong naglungtad ang pag-antos ug kon sa unsang paagi si Jesus magdalag malungtarong kalinaw. Busa, sila nakabatog kalinaw sa hunahuna.
Pinaagi sa pagtuman sa gipamulong ni Jesus, ang mga Saksi ni Jehova—bisag unsay nasyonalidad, kolor, tribo, o pinulongan—nakabaton niana nga kalinaw. Susiha kana pinaagi sa pagtambong sa ilang mga tigom sa Kingdom Hall. Tingali ikaw, sama sa uban, mouyon nga kini nga kalinaw mas maayo kay sa bisan unsang kalinaw nga ikahatag sa Pasko.
Ang mga Saksi ni Jehova nagkahiusa bisag unsay ilang rasa o pinulongan. Susiha kana pinaagi sa pagtambong sa ilang mga tigom sa Kingdom Hall
