MILYONMILYONG Kristohanon ang midesisyon nga dili mosaulog ug Pasko. Unsay ilang pagbati sa maong desisyon? Mibati ba silang may nakulang nila? Ang ila bang mga anak mibating nahikawan? Tagda kon unsay gisulti sa mga Saksi ni Jehova sa tibuok kalibotan bahin niana.

Paghandom kang Jesu-Kristo: “Sa wala pa ko mahimong Saksi ni Jehova, panagsa ra kong mosimba. Mosimba lang ko panahon sa Pasko o Easter. Bisan pa niana, wala gyod ko maghunahuna bahin kang Jesu-Kristo. Karon, wala na ko magsaulog ug Pasko, apan nagtambongan ko sa Kristohanong mga tigom kaduha sa usa ka semana ug nagtudlo pa gani sa uban kon unsay gisulti sa Bibliya bahin kang Jesus!”—EVE, AUSTRALIA.

Kalipay sa paghatag: “Malipay kong makadawat ug regalo nga wala nako damha. Gusto kong masorpresa! Ganahan sab kong maghimog kard ug magdibuhog mga hulagway para sa uban kay kini mas makapalipay nila, ug makapalipay sab ni nako.”—REUBEN, NORTHERN IRELAND.

Pagtabang sa mga kabos: “Malipay ming maglutog pagkaon alang sa mga nasakit. Usahay magdala mig bulak, keyk, o gamayng regalo aron malipay sila. Ganahan mi niini kay makaduaw mi nila sa bisan unsang panahon sa tuig.”—EMILY, AUSTRALIA.

Pag-ubanay sa pamilya: “Sa dihang magtapoktapok ang among pamilya, ang among mga anak dili magpanuko pagduol sa ilang mga uyoan, iyaan, apohan, ug mga ig-agaw. Kay dili man mi mag-agad ug selebrasyon, dili mi mapresyur, ug ang among pamilya mahibalo nga amo silang giduaw kay gihigugma namo sila.”—WENDY, CAYMAN ISLANDS.

Pakigdait: “Panahon sa Pasko, daw daghan kaayo ang angayng buhaton nga tungod niana pipila na lang ang makahunahuna bahin sa pakigdait. Gaan ang akong paminaw kay nasayran nako ang saad sa Bibliya alang sa mga tawo. Nahibalo ko nga ang akong mga anak dunay malipayong kaugmaon.”—SANDRA, SPAIN.