Natawo ko sa Moundsville, usa ka malinawong lungsod ubay sa Ohio River sa amihanang West Virginia, U.S.A. Ikaduha ko sa upat ka anak, diin tulo ang lalaki, busa kanunay ming bibo sa balay. Ang akong ginikanan kugihan, matinud-anon ug mahigugmaon sa uban. Dili mi dato, apan nabatonan ra namo ang among panginahanglan. Ingong mga Saksi ni Jehova, ang akong ginikanan naningkamot nga masilsil kanamo ang mga prinsipyo sa Bibliya sa bata pa mi.

Apan pagkatin-edyer nako, nawad-an kog interes sa akong nakat-onan. Nagduhaduha ko kon makahatag bag katagbawan sa kinabuhi ang mga prinsipyo sa Bibliya. Nagtuo kong magmalipayon lang ko kon makabaton kog bug-os nga kagawasan, o mahimo nako ang tanan nakong gusto. Wala madugay, miundang kog tambong sa Kristohanong mga tigom. Mao sab ang akong duha ka igsoon. Naningkamot ang among ginikanan sa pagtabang namo, apan amo kanang gisalikway.

Wala ko magdahom nga ang gipangandoy nakong kagawasan maoy magdaldal nako sa makadaot nga mga bisyo. Usa ka adlaw dihang nagbaktas ko gikan sa eskuylahan pauli sa amo, gihanyagan kog sigarilyo sa akong amigo. Ako nang gidawat. Sukad niadto, gihimo nako ang ubang makadaot nga bisyo. Sa ngadtongadto, nagdroga ko ug naghuboghubog ug nagkinabuhing imoral. Paglabay sa pipila ka tuig, misugod kog gamit ug mas isog nga mga droga ug naadik ko niana. Kay naadik na man ko pag-ayo, nagbaligya kog droga aron masuportahan ang akong bisyo.

Samtang naningkamot kong ibalewala ang akong konsensiya, nagsige na hinuon nig tulisok nako nga sayop ang akong pagkinabuhi. Pero gibati nako nga ulahi na ang tanan, wala na koy mahimo. Bisag tig-adtoan kog mga parti ug konsiyerto, mibati gihapon kong nag-inusara ug magul-anon. Usahay, maghunahuna ko nga maayo man unta kaayo ang akong ginikanan, apan nganong naingon ani man ko?

Bisag nawad-an na kog paglaom, ang uban wala. Niadtong tuig 2000, gidapit ko sa akong ginikanan nga motambong ug distritong kombensiyon sa mga Saksi ni Jehova. Napugos lang ko sa pagtambong. Nakurat ko kay mitambong pod diay ang akong duha ka igsoon nga nahisalaag sab.

Samtang didto sa kombensiyon, nahinumdom ko nga sa miaging tuig mao pod ni ang venue sa rock concert nga akong gitambongan. Natandog gyod ko sa kalainan nga akong nakita. Sa konsiyerto, ang pasilidad napunog basura ug nalukop ug aso sa sigarilyo. Kadaghanan sa mga tawo dili mahigalaon, ug ang mensahe sa musika makapaguol. Apan sa kombensiyon, gilibotan kog tinuod nga malipayong katawhan​—kinsa mainitong nag-abiabi nako, bisag dugay na kaayo ko nilang wala makita. Hinlo ang pasilidad, ug makapadasig ang mensahe nga akong nadungog. Kay nakita nako ang maayong epekto sa kamatuoran sa Bibliya, nakapangutana ko kon nganong ako ning gisalikway!​—Isaias 48:17, 18.

Human sa kombensiyon, nakadesisyon kong mobalik sa Kristohanong kongregasyon. Natandog sab ang akong mga igsoon sa ilang nasinati sa kombensiyon, busa midesisyon pod silang mobalik. Kaming tulo midawat ug pagtuon sa Bibliya.

Ang teksto nga ilabinang nakapatandog nako mao ang Santiago 4:8, nga nag-ingon: “Duol sa Diyos, ug siya moduol kaninyo.” Nakaamgo ko nga kon gusto kong masuod sa Diyos, kinahanglan nakong bag-ohon ang akong kinabuhi. Lakip niana ang pag-undag panigarilyo, pagdroga, ug paghuboghubog.​—2 Corinto 7:1.

Gibiyaan nako ang akong kanhing mga higala ug nakighigala sa mga magsisimba ni Jehova. Ang Kristohanong ansiyano nga nag-Bible study nako matinabangon kaayo. Kanunay siyang manawag ug mohapit sa balay aron mangomosta. Karon, usa siya sa kinasuoran nakong mga higala.

Sa tingpamulak sa 2001, ako nagpabawtismo ingong simbolo sa akong pagpahinungod sa Diyos, mao sab ang akong duha ka igsoon. Imong mahanduraw ang kalipay sa akong ginikanan ug sa akong matinumanong manghod nga lalaki dihang ang among pamilya nahiusa sa pagsimba kang Jehova.

Kaniadto naghunahuna kong estrikto ra kaayo ang mga prinsipyo sa Bibliya, apan karon giisip nako kini nga hinungdanong proteksiyon. Ang Bibliya nakatabang nako nga moundang sa paggamit ug pagbaligyag droga, ug nga mahimong maayong tawo.

Nakapribilehiyo ko nga mahimong bahin sa tibuok kalibotang panag-igsoonay sa mga magsisimba ni Jehova. Sila tinuod nga naghigugmaay ug nagkahiusa sa pag-alagad sa Diyos. (Juan 13:34, 35) Ug diha kanila nakabaton kog espesyal nga panalangin​—ang akong asawang si Adrianne, kinsa akong gimahal ug gipabilhan pag-ayo. Malipayon kaayo mi sa pag-alagad sa among Maglalalang.

Imbes unahon ang kaugalingong tinguha, nagboluntaryo ko karon ingong bug-os-panahong ministro, nga nagtudlo sa mga tawo kon sa unsang paagi sila makabenepisyo usab sa Pulong sa Diyos. Kini nakapalipay pag-ayo nako. Ako makaingon gayod nga gibag-o sa Bibliya ang akong kinabuhi. Nabatonan na gyod nako ang tinuod nga kagawasan.