Ang tanang membro sa atong pamilya dunay ngalan. Bisag ang binuhing mga hayop may ngalan! Makataronganon ba nga ang Diyos dunay ngalan? Sa Bibliya, siya daghag titulo, sama sa Labing Gamhanang Diyos, Soberanong Ginoo, ug Maglalalang, apan duna sab siyay personal nga ngalan.​—Basaha ang Isaias 42:8.

Daghang hubad sa Bibliya ang naggamit sa ngalan sa Diyos diha sa Salmo 83:18. Pananglitan, sa Bag-ong Kalibotang Hubad sa Balaang Kasulatan, kini mabasa: “Ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.”

Gusto sa Diyos nga gamiton nato ang iyang ngalan. Sa dihang makig-estorya ta sa atong suod nga mga higala mogamit ta sa ilang ngalan. May kalainan ba sa dihang makigsulti ta sa Diyos? Dugang pa, gidasig ta ni Jesu-Kristo nga gamiton ang ngalan sa Diyos.​—Basaha ang Mateo 6:9; Juan 17:26.

Apan, aron mahimong higala sa Diyos, kinahanglang mailhan pa nato siyag dugang. Pananglitan, unsay mga hiyas sa Diyos? Posible bang masuod ta kaniya? Ang tubag niana anaa sa Bibliya.