Natawo ko sa gamayng lungsod sa Texcoco. Niadtong panahona, kadaghanan sa mga dalan dili pa sementado ug abogon. Kasagaran nang makita ang mga tawo gikan sa dug-ol nga baryo nga magdala sa ilang mga asno nga gikargahag mga baligya. Kabos kaayo mi nga pamilya, ug ikapito ko sa siyam ka managsoon. Si Papa tig-ayo ug guaraches (mga sandalyas) aron masuportahan ang pamilya. Apan namatay siya sa dihang nag-edad kog siyete anyos. Sukad niadto, si Mama nay nangamas aron mi makakaon.

Ang akong lolo maayong mo-biolin ug siyay batonero sa orkestra nga nagtugtog ug klasikal nga relihiyosong musika. Halos tanang membro sa among pamilya makamaong motugtog ug instrumento. Si Mama membro sa koro sa simbahan, ug ang akong uyoan mag-aawit sa opera ug pianista. Kami mga debotado kaayo—sakristan ko ug gusto kong magmisyonaryo sa Katoliko. Sa samang higayon, ganahan sab kong motan-awg salidang karate. Sa sige nakog tan-aw sa maong mga salida, nag-anam ko ka bayolente.

Sa Puebla, misulod ko sa usa ka relihiyosong tunghaan nga samag seminaryo. Pangandoy nakong magpari. Apan sa kataposang tuig sa akong pag-eskuyla, nahigawad ko sa Simbahang Katoliko. Usa ka batan-ong madre ang gustong makigsekso nako. Gisuklan nako ang tentasyon, apan napukaw ang akong tinguha nga magminyo. Dugang pa, naobserbahan nako nga daghang pari ang dobleg kinabuhi. Sa ngadtongadto, gikalimtan nako ang akong pangandoy nga magpari.

Nakadesisyon kong magtuon ug musika sa National Conservatory of Music sa Mexico City. Paggraduwar nako, naminyo ko, ug sa wala madugay kami sa akong asawa nakabatog  upat ka anak. Gisuportahan nako ang akong pamilya pinaagi sa pag-awit panahon sa Misa.

Sa sinugdan pa lang, problemado na ang among kaminyoon. Kami sa akong asawa magpunayg away, kasagaran tungod sa selos. Sa primero nag-insultohay ra mi, apan sa ngadtongadto nagdagmalay na. Sa kataposan, human sa 13 ka tuig, nakadesisyon ming magbulag ug sa ulahi magdiborsiyo.

Nahimamat nako ang mga Saksi ni Jehova sa wala pa mi magbulag sa akong asawa. Duha ka Saksi ang miduaw namo ug mitanyag ug panaghisgot sa Bibliya. Abi nakog daghan kog nahibaloan bahin sa relihiyon, busa gusto nakong pamatud-an nga sayop sila. Nagpatungha kog lisod nga mga pangutana nga abi nakog walay tubag. Apan, natingala ko nga kanunay nilang matubag kana pinaagi sa Bibliya. Naamgohan nako nga gamay ra gyod diay kog nahibaloan. Apan, ang akong asawa supak kaayo sa mga Saksi, ug puliki kaayo ko, busa wala na sila mobalik.

Lima ka tuig sa ulahi, nakigpuyo ko sa laing babaye, si Elvira, sa dihang nakahimamat na sab kog mga Saksi ni Jehova. Si Elvira dili supak sa mga Saksi, busa regular kong makatuon sa Bibliya uban nila. Bisan pa niana, gidangtag daghang tuig ang pag-usab sa akong kinabuhi.

Akong naamgohan nga kon gusto nakong simbahon si Jehova sa bug-os kasingkasing, kinahanglan kong mohimog dagkong kausaban. Una, kinahanglang moundang ko sa akong trabaho ingong mag-aawit sa Misa, nga nagpasabot nga kinahanglan kong mangitag laing trabaho. (Pinadayag 18:4) Kinahanglan sab nakong ipalegal ang among kaminyoon ni Elvira.

Apan, usa sa kinalisdang kausaban mao ang pagkontrolar sa akong pagkamasuk-anon. Duha ka teksto sa Bibliya ang ilabinang nakatabang nako: Ang Salmo 11:5, nga nagpakitang gidumtan ni Jehova ang kapintasan, ug ang 1 Pedro 3:7, nga nagtudlo nako nga kon buot nakong dunggon ni Jehova ang akong mga pag-ampo, angay nakong pasidunggan ang akong asawa. Samtang namalandong ko sa maong mga teksto ug nag-ampo kang Jehova, inanay nakong nakontrolar ang akong pagkamasuk-anon.

Malipayon na ko sa akong kaminyoon karon. Naningkamot ko nga mapasig-uli ang akong relasyon sa akong mga anak nga lalaki sa akong unang kaminyoon ug sa pagtabang sa akong pamilya karon nga magpabiling lig-on sa pagtuo.

Sa bata pa ko, gusto kong magpari ug motabang sa mga tawo. Karon akong gibati nga makahuloganon na ang akong kinabuhi. Gisuportahan nako ang akong pamilya pinaagi sa pagtudlog musika. Mapasalamaton kaayo ko nga si Jehova mapailobon nako, nga naghatag nakog kahigayonan nga mag-usab ug mahimong mas maayong tawo!