PAGPAKIGSULTI SA SILINGAN

May Pagtagad ba ang Diyos sa Atong Pag-antos?

Aniay usa ka pananglitan sa pagpakigsulti sa usa ka Saksi ni Jehova sa iyang silingan. Ibutang ta nga ang Saksi nga si Michelle nagsangyaw sa iyang silingang si Sophia.

NGANONG GITUGOTAN NIYA KINING MAHITABO?

Michelle: Maayong buntag, nanghatag mig Bible tract karon. Kini may ulohang Gusto Ka Bang Mahibalo sa Kamatuoran? Imo ning kopya.

Sophia: Bahin ni sa relihiyon?

Michelle: Oo, dunay unom ka pangutana dinhi. Hain niini ang imong—

Sophia: Sa uban na lang na. Malangan lang ka nako.

Michelle: Nganong nakaingon man ka ana?

Sophia: Nagduhaduha ko kon duna bay Diyos.

Michelle: Salamat kay nagsulti ka sa tinuod. Mao ba gyod kanay imong pagbati sukad pa sa una?

Sophia: Aw dili man, tigsimba ko niadto pero dugay na kong mihunong.

Michelle: Diay ba? Lain pay ato, ako si Michelle.

Sophia: Ako si Sophia.

Michelle: Nalipay kong nagkaila ta. Di ko mangombertir nimo, mangutana lang ko, Nganong nagduhaduha man ka kon dunay Diyos?

Sophia: Naaksidente ang gisakyan sa akong inahan 17 ka tuig kanhi.

Michelle: Unya nasamdan siya?

Sophia: Oo, naparalisado gani.

Michelle: Kaluoy pod niya. Seguro naguol ka pag-ayo.

Sophia: Lagi. Maong nakapangutana ko, Kon naay Diyos, nganong gitugotan niya kining mahitabo? Nganong iyang gitugotan nga mag-antos mi?

SAYOP BANG MANGUTANA SA DIYOS?

Michelle: Nakasabot ko sa imong gibati. Dihang kita mag-antos, normal lang nga mangutana ta kon ngano. Gani ang pipila ka matinumanong tawo diha sa Bibliya nangutana usab sa Diyos.

Sophia: Tinuod ka?

Michelle: Oo. Matikdi kining usa ka pananglitan sa Bibliya.

Sophia: Okey.

Michelle: Dinhi sa Habacuc kapitulo 1, bersikulo 2 ug 3, ang matinumanong manalagna nga si Habacuc nangutana sa Diyos: “Hangtod kanus-a, Oh Jehova, nga ako magatuaw alang sa tabang, ug ikaw dili mamati? Hangtod kanus-a nga ako magpakitabang kanimo tungod sa kapintasan, ug ikaw dili magaluwas? Nganong gipakita mo kanako ang makadaot?” Di ba susama ni sa imong gipangutana ganina?

Sophia: Susama tuod.

Michelle: Wala kasab-i sa Diyos si Habacuc sa iyang pagpangutana, ni giingnan siya nga kulang siyag pagtuo.

Sophia: Karon pa lagi ko kadungog ana.

GIDUMTAN NI JEHOVA ANG PAG-ANTOS

Michelle: Ang Bibliya nag-ingon nga ang Diyos nakakita sa atong pag-antos ug nagpakabana niini.

Sophia: Unsay buot nimong ipasabot?

Michelle: Aniay usa ka pananglitan dinhi sa Exodo 3:7. Palihog kog basa.

Sophia: Kini nag-ingon: “Ug si Jehova midugang: ‘Sa walay duhaduha nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw tungod sa mga nagpugos kanila sa pagtrabaho; tungod kay ako nahibalo pag-ayo sa mga kasakit nga ilang giantos.’”

Michelle: Salamat. Sumala sa gibasa nimo, nakita ba sa Diyos ang pag-antos sa iyang katawhan?

 Sophia: Oo, morag iya kining nakita.

Michelle: Ug dili lang basta nakita niya ang panghitabo. Tan-awa pag-usab ang kataposang bahin sa teksto. Ang Diyos miingon: “Ako nahibalo pag-ayo sa mga kasakit nga ilang giantos.” Mao ba nay isulti sa Diyos nga dili matinagdanon o walay pagpakabana sa mga tawo?

Sophia: Aw, dili gyod.

Michelle: Ang Diyos dili lang basta makakita sa atong mga problema kondili mobati usab siyag kasubo kon kita dunay mga problema.

Sophia: Mao ba?

Michelle: Hisgotan nato ang laing higayon nga nag-antos ang katawhan sa Diyos. Mabasa ni sa Isaias 63:9. Ang unang bahin sa bersikulo nag-ingon: “Sa panahon sa tanan nilang kasakit kadto nakapasakit kaniya.” Nan, makaingon ba ka nga naapektohan ang Diyos sa pag-antos sa iyang katawhan?

Sophia: Morag maingon-ingon ana.

Michelle: Ang tinuod, ang Diyos nagtagad gayod kanato, ug dili niya gustong makita nga kita nag-antos. Kon kita masakitan, siya pod masakitan.

NGANONG SIYA NAGHULAT PA MAN?

Michelle: Sa di pa ko mobiya, duna pa koy laing ipaambit kanimo.

Sophia: Sige, unsa man na?

Michelle: Matikdi kon unsay gitudlo sa Bibliya bahin sa gahom sa Diyos sa Jeremias 10:12. Puwede ba nimong basahon kini?

Sophia: Okey. Kini nag-ingon: “Siya mao ang Magbubuhat sa yuta pinaagi sa iyang gahom, ang Usa nga lig-ong nagtukod sa mabungahong yuta pinaagi sa iyang kaalam, ug ang Usa nga nagbuklad sa kalangitan pinaagi sa iyang pagsabot.”

Michelle: Salamat. Sumala nianang tekstoha, migamit ba ang Diyos ug dakong gahom sa paglalang sa uniberso ug sa tanang butang niini?

Sophia: Siyempre.

Michelle: Karon, kon ang Diyos may gahom sa paglalang sa tanang butang, di ba dahomon nato nga duna sab siyay gahom sa pagtapos sa atong mga pag-antos?

Sophia: Oo.

Michelle: Balik tag hisgot sa imong inahan, nganong nabalaka man ka nga siya nag-antos?

Sophia: Kay gihigugma nako siya. Inahan god nako siya.

Michelle: Ug kon duna kay gahom ron nga ayohon siya, himoon mo ba kana?

Sophia: Natural.

Michelle: Hunahunaa kon unsay ipasabot niana. Ang Bibliya nagtudlo nga ang Diyos nahibalo sa atong pag-antos, siya masakitan usab niana, ug siya dunay dakong gahom. Mahanduraw ba nimo kon unsa ka dakong pagpugong-sa-kaugalingon ang gipakita sa Diyos aron dili siya mangilabot ug taposon dayon ang atong mga pag-antos?

Sophia: Wa gyod ko kahunahuna ana da.

Michelle: Mahimo kaha nga duna siyay maayong rason kon nganong wala pa taposa ang atong mga problema? *

Sophia: Hmm, tingali.

Michelle: Oy mikiring ang inyong telepono, moduaw ra kog usab aron ipadayon ang atong panaghisgot.

Sophia: Sige, paaboton tika. *

May gikalibgan ka ba diha sa Bibliya? Gusto ka bang mahibalo bahin sa pagtulon-an sa mga Saksi ni Jehova? Kon mao, ayaw pagpanuko sa pagpangutana sa mga Saksi sa sunod higayon nga sila makig-estorya kanimo. Malipay silang motubag sa imong mga pangutana.

[Mga footnote]

[Hulagway sa panid 14]