Ang imong mga anak makakat-on lang sa paghigugma sa Diyos kon nahibalo sila nga siya naglungtad ug nahigugma kanila. Busa kinahanglan silang makaila kaniya. (1 Juan 4:8) Pananglitan, kinahanglan silang mahibalo: Nganong gihimo sa Diyos ang tawo? Nganong gitugotan sa Diyos ang pag-antos? Unsay himoon sa Diyos para sa mga tawo sa umaabot?—Basaha ang Filipos 1:9.

Aron matabangan ang imong mga anak nga higugmaon ang Diyos, ipakita nila nga ikaw mismo nahigugma sa Diyos. Kon ila kanang makita, posible silang mosundog nimo.—Basaha ang Deuteronomio 6:5-7; Proverbio 22:6.

Ang Pulong sa Diyos gamhanan. (Hebreohanon 4:12) Busa tabangi ang imong mga anak nga makakat-on sa pangunang mga pagtulon-an niini. Aron matandog ang kasingkasing sa mga tawo, si Jesus nangutana, namati, ug nagsaysay sa Kasulatan. Aron matandog sab ang kasingkasing sa imong mga anak, sundoga ang paagi ni Jesus sa pagtudlo.—Basaha ang Lucas 24:15-19, 27, 32.

Dugang pa, ang mga asoy sa Bibliya nga nagpakita kon giunsa pagtratar sa Diyos ang mga tawo makatabang sa mga anak nga makaila ug mahigugma sa Diyos. Anaa sa www.pr418.com/ceb ang mga publikasyon nga gidisenyo para niini nga katuyoan.—Basaha ang 2 Timoteo 3:16.