Sa 2021 nga tuig sa pag-alagad, a ang kalibotan nag-antos gihapon tungod sa COVID-19 nga pandemic. Sama sa giingon sa artikulong “Global Relief Para sa Global Pandemic,” migasto tag minilyong dolyares b para sa hinabang ug nagporma tag kapin sa 950 ka Disaster Relief Committee.

 Samtang nagpadayon ang pandemic, naa poy ubang kalamidad ug trahedya nga nakaapektar sa atong mga igsoon sa tibuok kalibotan. Para sa kapig 200 sa maong mga kalamidad, giaprobahan sa Komite sa mga Koordinetor sa Nagamandong Lawas ang paggasto ug $8 milyon gawas pa sa hinabang para sa COVID-19. Niay pipila ka detalye kon giunsa paggamit ang inyong donasyon aron tabangan ang mga naapektohan sa duha ka bag-o lang nga hitabo.

 Niadtong Mayo 22, 2021, mibuto ang Mount Nyiragongo, bolkan sa Democratic Republic of the Congo. Giguba sa miagos nga lava ang mga balay, eskuwelahan, ug ang usa ka dakong pondohanag tubig. Pero dili lang lava ang problema. Human sa pagbuto sa bolkan, pila ka adlaw ning nagbuga ug makahilo nga abo sa siyudad sa Goma, ug daghang hinay nga linog ang narekord. Kapig katunga sa siyudad ang gipabakwet. Gatosan ka libo ang namahawa, ang uban mitabok sa Rwanda.

 Apil sa namakwet ang mga 5,000 ka Saksi ni Jehova. Ang balay sa uban nadaot tungod sa pagbuto ug ang ubang balay gikawatan pagbiya nila. Ang mga relief committee sa Rwanda ug sa Democratic Republic of the Congo nag-organisar sa pagpanghatag ug hinabang. Bahin sa usa ka relief committee, ang sangang buhatan sa Congo (Kinshasa) mireport: “Bisag gubot ang kahimtang sa siyudad ug bisag wala pa gipabakwet ang mga tawo, ang komite nanghatag nag mga pagkaon, tubig, bed sheet, habol, ug sinina.” Sa usa ka lungsod nga gidangpan sa kapig 2,000 ka igsoon, ang relief committee nag-set up ug mga tent, nanghatag ug mask, ug nagtudlo kon unsaon nga malikayan ang COVID-19 ug cholera.

 Sulod sa tulo ka bulan sukad sa pagbuto, ang atong mga igsoon nakapanghatag ug kapin sa unom ka toneladang bugas, unom ka toneladang harina nga mais, kapig 8,000 ka litrong mantika, ug kapig 8,000 ka litrong tubig. Aron makadaginot, ang sangang buhatan namalit ug pagkaon sa lokal nga mga suplayer imbes sa laing nasod nga mas mahal ang presyo.

 “Naguol ug nasakitan kaayo mi,” miingon ang sister nga naay bag-ong balay pero naguba tungod sa pagbuto sa bolkan. Ang iyang pamilya nakadawat ug materyal ug espirituwal nga tabang. Karon, siya miingon: “Sa tabang ni Jehova, natagan-an gihapon mi sa among mga panginahanglan. Gitabangan gyod mi ni Jehova sa among mga problema maong nakaya namo ning lisod nga kahimtang.”

 Sulod sa daghang tuig, mius-os pag-ayo ang ekonomiya sa Venezuela. Ang mga igsoon didto nagsagubang sa lisod nga kahimtang sa pagkinabuhi, sa kakulag pagkaon, ug sa nagkadaghang krimen. Pero wala gyod sila pasagdi sa organisasyon ni Jehova.

 Sa milabay nga tuig sa pag-alagad, kapig $1.5 milyon ang nagasto sa pagpalit ug pagpadalag mga pagkaon ug sabon sa mga pamilya nga nanginahanglan. Ang sangang buhatan sa Venezuela mireport: “Dili sayon ang pagpadalag 130 ka toneladang pagkaon sa lainlaing lugar sa nasod kada bulan, ug dayon iapod-apod kana sa mga igsoon nga nanginahanglan.” Aron maseguro nga dili madaot ang mga pagkaon, ang mga igsoon sagad magpadalag pagkaon nga dugay madaot. Ang sangang buhatan midugang: “Binulto ang among paliton nga pagkaon ug paliton namo ni sa ting-harvest aron mas ubos ang presyo. Dayon, amo ning ipadala sa pinakapraktikal nga paagi aron makadaginot.”

 Si Leonel, nga membro sa usa ka Disaster Relief Committee sa Venezuela, ganahan kaayo sa iyang asaynment. “Espesyal para nako ang relief work,” siya miingon. “Kini nga pribilehiyo nakadasig kaayo nako sukad nga namatay ang akong minahal nga asawa tungod sa COVID-19. Pirme kong busy ug gibati nako nga nakatabang ko sa mga igsoon nga nanginahanglan. Tinuod gyod ang saad ni Jehova nga dili niya biyaan ang iyang katawhan.”

 Ang usa ka brader nga nakadawat ug hinabang apil kaniadto sa relief committee. “Karon, ako na poy nanginahanglag tabang,” siya miingon. “Dili lang materyal nga tabang ang among nadawat. Ang mga igsoon mitabang pod namong magtiayon nga magpabiling kalmado. Ila ming giatiman, gihupay, ug gidasig.”

 Naay mga kalamidad nga dili kaayo ka makapangandam o kaha kalit rang mahitabo. Pero sagad ang organisasyon ni Jehova makapadala dayog hinabang, ug tungod na sa inyong mga donasyon sa worldwide work. Ang pipila ka paagi sa pag-donate makita sa donate.pr418.com. Salamat kaayo sa inyong pagkamahinatagon.