Kada tuig, ubay-ubayng special full-time servant sa tibuok kalibotan ang ginadapit sa pagtungha sa Watchtower Bible School of Gilead, nga ginahimo sa Watchtower Educational Center sa Patterson, New York. a Niini nga tunghaan, ang mga estudyante makakat-on kon sa unsang paagi sila mahimong mas epektibo sa ilang mga asaynment sa organisasyon ni Jehova. Kini nga pagbansay makatabang nila sa pagpalig-on sa mga kongregasyon ug mga sangang buhatan sa tibuok kalibotan.

 Ang Gilead maoy internasyonal gyod nga tunghaan. Pananglitan, ang ika-147 nga klase niadtong 2019 dunay 56 ka estudyante gikan sa 29 ka nasod. Ang mga estudyante nga imbitahon sa pagtungha sa Gilead maoy mga special full-time servant sama sa mga Bethelite, tigdumala sa sirkito, misyonaryo, o espesyal payunir.

 Taas nga panahon ang gihimong pagpangandam ayha pa magsugod ang unang sesyon sa klase. Pananglitan, ang World Headquarters Travel Department (WHQ Travel) mopalit ug mga ticket sa eroplano para sa mga estudyante sa Gilead. Sa ika-147 nga klase sa Gilead, ang aberids nga kantidad para sa ticket sa matag estudyante nga gikan sa laing nasod, paadto ug pauli gikan sa Patterson, maoy kapin sa ₱50,000. Ang mga estudyante gikan sa Solomon Islands kaupat mobiyahe sa eroplano aron makaabot sa Patterson ug katulo sab pauli sa ilang nasod—nga tanantanan kapin sa 35,400 kilometros nga biyahe! Ang maong mga biyahe sa eroplano nagkantidad ug kapin sa ₱100,000 kada estudyante. Aron makadaginot, ang WHQ Travel migamit ug computer booking tool sa pagpangitag baratong ticket. Ug bisag napalit na ang ticket, ang maong computer program padayong mag-search sulod sa pipila ka semana ug bulan pa gani aron ma-check kon miubos ba ang presyo sa ticket. Gigamit sab sa WHQ Travel ang gi-donate nga mga airline credit ug mileage sa pagpalit ug ticket.

 Daghang estudyante ang nagkinahanglag visa aron makasulod sa United States. Busa gitabangan sila sa World Headquarters Legal Department sa pagkuhag mga student visa. Ang aberids nga magasto alang sa visa ug bayad sa pagparehistro maoy kapin sa ₱24,000 kada estudyante.

 Sa unsang paagi ta makabenepisyo sa pagbansay nga nadawat sa mga estudyante? Si Hendra Gunawan nag-alagad ingong ansiyano sa Southeast Asia. Kauban niya sa kongregasyon ang usa ka magtiayon nga migraduwar sa Gilead. Siya miingon: “Kaniadto, walay regular payunir sa among kongregasyon. Pero pag-abot sa magtiayon nga migraduwar sa Gilead, daghan ang natakdan sa ilang kadasig ug pagkaandam motabang maong nagpayunir sab ang ubang igsoon. Gani sa ulahi, usa ka sister sa among kongregasyon ang nakaeskuwela sa School for Kingdom Evangelizers!”

 Si Sergio Panjaitan nagboluntaryo sa usa ka Bethel sa Southeast Asia, ug nakauban niya sa pagtrabaho ang pipila ka igsoon nga migraduwar sa Gilead. Siya miingon: “Dili lang sila ang nakabenepisyo sa pagbansay nga ilang nadawat, apil pod mi. Daghan kaayo silag nakat-onan! Ug imbes ipakita nga labaw sila sa uban, ilang gipaambit ang ilang nakat-onan. Nadasig mi nila, maong naningkamot pod mi nga makadasig sa uban.”

 Giunsa pagsuportar sa organisasyon ang pinansiyal nga galastohan niini nga tunghaan? Pinaagi sa mga donasyon para sa worldwide work, diin ang kadaghanan niana gi-donate gamit ang usa sa mga paagi nga makita sa donate.pr418.com. Salamat kaayo sa inyong pagkamahinatagon, nga tungod niini nasuportahan sa organisasyon kining internasyonal nga tunghaan.