Niadtong Marso 2020, dihang gideklarar sa World Health Organization nga pandemic ang COVID-19, daghan ang wala magdahom nga magpadayon kini sa tibuok kalibotan sa kapin nag usa ka tuig. Minilyon sa mga tawo, apil ang mga Saksi ni Jehova, ang nag-antos sa pisikal, emosyonal, ug pinansiyal tungod sa pandemic. Giunsa sa mga Saksi ni Jehova pag-organisar ug pag-apod-apod ug hinabang niining panahon sa krisis?

 Ubos sa direksiyon sa Komite sa mga Koordinetor sa Nagamandong Lawas sa mga Saksi ni Jehova, kapig 950 ka Disaster Relief Committee (DRC) ang giporma sa tibuok kalibotan tungod sa COVID-19. Sa pipila ka kahimtang, ilang gihikay nga ang tabang maggikan sa lokal nga mga igsoon, ug sa ubang kahimtang ang mga Saksi nakadawat ug ayuda sa gobyerno. Ang mga DRC nag-organisar sab ug dagkong kahikayan sa paghatag ug hinabang.

 Tagda pananglitan ang kahimtang sa Paraguay. Sumala sa usa ka newspaper, tungod sa epekto sa pandemic diha sa ekonomiya, “daghan sa Paraguay ang gigutom ug wala nay igong konsumo.” Pero ang DRC sa Paraguay nag-apod-apod nag mga kit nga naay duha ka semana nga suplay—igong pagkaon, mga gamit nga panglimpiyo, ug mga pang-personal hygiene para sa pamilya nga may upat ka membro. Ang matag kit mokantidad ug mga ₱1,500 ($30, U.S.).

 Unsay gihimo sa mga relief worker aron maprotektahan nila ang ilang kaugalingon ug ang uban sa COVID-19? Nagsul-ob silag mga mask ug nag-physical distancing. Giseguro sab nila nga ang mga kompaniya nga nagsuplay ug pagkaon hinlog mga pasilidad ug nagsunod gyod sa mga safety guideline. Apil niini ang pagseguro nga ang tanang nag-andam sa mga kit magsul-ob ug personal protective equipment, maghinlo ug mag-disinfect sa ilang mga sakyanan, ug magbutang sa mga kit diha sa na-disinfect nga mga butanganan. Ug kadtong mo-deliver sa mga kit dunay physical distancing sa mga brader nga modawat niini.

 Sukad niadtong Enero 2021, giaprobahan sa Komite sa mga Koordinetor ang paggasto ug kapin sa 25 ka milyong dolyares (U.S.) nga hinabang para sa COVID-19. Ang mga sangang buhatan ug mga DRC maampingong naggamit niini nga mga donasyon ug naningkamot nga makakuhag ubos nga presyo para sa kinahanglanong mga suplay. Pananglitan sa Chile, ang mga brader nga nag-organisar ug hinabang gustong mopalit ug 750 kilos (1,653 lb) nga lentihas (samag beans). Pero ang presyo niini midoble sulod lang sa usa ka bulan! Nagkauyon sila nga paliton ang lentihas sa taas nga presyo, pero paglabay ug duha ka oras, giingnan sila sa tigbaligya nga naay buyer nga nag-uli sa iyang order. Imbes pabayran sa taas nga presyo, ang lentihas nga giuli gibaligya ngadto sa mga brader base sa presyo sa miaging bulan!

 Pero dihang mibalik ang mga brader aron kuhaon ang lentihas, dili na kini ihatag sa tigbaligya ug giakusahan sila nga dili patas ang ilang pag-apod-apod ug pagkaon, sama sa ubang organisasyon. Human sa mubo ug hilom nga pag-ampo, usa sa atong mga brader ang misulti sa tigbaligya nga ang matag kongregasyon gisurbi na daan kon kinsa ang tinuod nga nanginahanglan. Gipasabot sab sa mga brader kaniya nga kay lainlain mag kultura ang modawat, ang matag kit butangan ug mga produkto base sa panginahanglan sa matag pamilya. Dayon, ilang gipasaligan ang tigbaligya nga ang tanang donasyon ug pagtabang sa mga Saksi ni Jehova boluntaryo. Mibilib kaayo siya. Gawas nga gipaubsan sa tigbaligya ang presyo, miamot sab siyag 400 kilos (882 lb) nga lentihas sa sunod nga order sa mga brader.

 Si Lusu, edarang biyuda sa Liberia, nagpuyo uban sa iyang lima ka membro sa pamilya. Samtang namahaw sila ug naghisgot sa inadlawng teksto, namatikdan sa siyete anyos nga apo ni Lusu nga wala na silay pagkaon sa balay. Ang bata nangutana, “Unsa na may atong kaonon?” Gipasaligan ni Lusu ang iyang apo nga nag-ampo na siya alang sa tabang ug seguradong tagan-an sila ni Jehova. Pagkahapon, gitawgan siya sa mga ansiyano aron kuhaon niya ang hinabang nga pagkaon. Siya miingon: “Ang akong apo misulti nga nahibalo na siya karon nga si Jehova maminaw ug motubag sa mga pag-ampo, kay gitubag ni Jehova ang akong pag-ampo.”

 Usa ka babaye sa Democratic Republic of Congo ang may silingan nga pamilyang Saksi. Dihang nakita niya nga ang pamilya nakadawat ug pagkaon gikan sa ilang mga igsoon sa pagtuo, siya miingon, “Human sa pandemic, mag-Saksi ni Jehova na ta, kay wala nila pasagdi ang ilang mga igsoon niining lisod nga panahon.” Gipangutana siya sa iyang bana, “Mag-Saksi ka tungod lang sa usa ka sakong bugas?” Ang asawa mitubag, “Siyempre dili, pero kadtong usa ka sako nga bugas maoy pamatuod sa ilang tinuod nga gugma.”

 Ang mga Saksi ni Jehova nakatagana dayon sa panginahanglan sa atong mga igsoon niining panahon sa pandemic tungod sa inyong mga donasyon. Salamat sa mga donasyon nga inyong gihatag gamit ang mga paagi nga makita sa donate.pr418.com.