“Kaniadto, ang pagbaton ug espirituwal nga pagkaon sa digital nga format morag imposible kaayo.” Mouyon ba ka ana? Mao nay giingon sa makapadasig nga pakigpulong ni Geoffrey Jackson sa 2020 nga Update sa Nagamandong Lawas Num. 6. Siya mipadayon: “Pero karon, dako kaayog tabang sa atong paglahutay niini nga pandemic ang mga tool sama sa JW Library. Nagpakita ni nga sa milabayng mga tuig giandam na tang daan ni Jehova.”

 Giunsa ta pag-andam ni Jehova? Unsay gikinahanglan aron ma-develop, ma-maintain, ug mas mapanindot ang JW Library app?

 Niadtong Mayo 2013, gihangyo sa Nagamandong Lawas ang MEPS Programming, usa ka departamento sa world headquarters, sa pag-develop ug app nga naa ang rebisadong New World Translation. “Niadtong panahona, wala pa tay gi-release nga mobile app sa bisan unsang app store,” miingon si Paul Willies, nga nagtrabaho sa MEPS Programming. “Pero nagporma mig usa ka team, temporaryong gihunong ang pipila ka proyekto, ug nangayog tabang sa ubang departamento sa pagdisenyo ug paghimo sa app ug sa content niini. Sige gyod mig ampo adtong panahona, ug sa tabang ni Jehova na-release ang app lima lang ka bulan sa ulahi sa tinuig nga meeting!”

 Ang sunod nga hagit mao ang paghimo sa app ingong tinuod nga library, nga dunay mas daghang publikasyon diha sa mas daghang pinulongan. Pagka-Enero 2015, kadaghanan sa atong bag-ong mga publikasyon sa English available na sa app, ug paglabay lag unom ka bulan, ang mga user maka-download na niini nga mga publikasyon sa gatosan ka pinulongan.

 Sukad niadto, mas gipanindot pa sa atong mga igsoon ang app. Nagdugang silag mga video, gibutang ang tanang publikasyon ug media para sa mga tigom sa kongregasyon sa usa lang ka tab, ug gipaposible nga ma-access ang mga reperensiya sa Giya sa Pagpanukiduki diha mismo sa mga bersikulo sa Bibliya.

 Ang JW Library gigamit sa 8 ka milyong device kada adlaw ug sa kapig 15 ka milyong device kada bulan! Unsay gikinahanglan aron ang app moganag maayo sa mga device? Si Brader Willies miingon: “Walay kataposan ang pag-update sa usa ka mobile app. Padayon ming nagdugang ug bag-ong mga feature ug nangitag mga paagi aron mas sayon kining gamiton. Kay pirmeng mag-update ang commercial nga mga operating system sa digital nga mga device, kinahanglan namong i-update kanunay ang mga app aron mogana gihapon ni sa maong mga system. Kinahanglan sab namong i-maintain ug i-upgrade ang internal software samtang nagkadaghan ang publikasyon ug mga rekording sa JW Library.” Kon iphon ang tanang materyal nga available sa JW Library diha sa lainlaing pinulongan, kini dunay mga 200,000 ka publikasyon ug kapig 600,000 ka audio ug video recording!

 Aron padayong mo-function ang app, dili lang kay computer hardware ang gikinahanglan. Kinahanglan sab nga mopalit ug mga software license. Ang usa ka license mokantidad ug $1,500 (U.S.) kada tuig. Dugang pa, ang MEPS Programming mogasto ug mga $10,000 (U.S.) kada tuig sa mga device sa lainlaing manufacturer aron maseguro nga ang app moganag maayo sa bag-ong mga computer, tablet, ug cellphone.

 Tungod sa JW Library, namenosag dako ang gasto sa pag-imprenta, pag-bind, ug pagpadalag literatura. Ang usa ka pananglitan mao ang booklet nga Pagsusi sa Kasulatan sa Adlaw-Adlaw. Sa 2013 nga edisyon niini, halos 12 ka milyong kopya ang atong giimprenta. Pero sa 2020 nga edisyon, nag-imprenta lang ta ug mga lima ka milyong kopya—bisag may nadugang nga mga 700,000 ka magmamantala sa tibuok kalibotan. Nganong gihimo ang maong kausaban? Daghan sa atong mga igsoon karon ang nagabasa sa inadlawng teksto diha sa JW Library. a

 Ang JW Library dako pod kaayog natabang sa mga naggamit niini. Si Geneviève, nga nagpuyo sa Canada, mibati nga mas regular na ang iyang pagtuon tungod sa app. “Sa tinuod lang, kon kuhaon nako ang tanang libro nga akong gikinahanglan sa pagtuon, morag dili gyod ko magtuon kada buntag,” siya miingon. “Pero tungod sa app, naa na sa tablet ang tanan nakong gikinahanglan. Ang akong regular nga pagtuon nakapalig-on sa akong pagtuo ug espirituwalidad.”

 Dako kaayog tabang ang app ilabina panahon sa COVID-19 nga pandemic. Si Charlyn, nga taga-United States, miingon: “Tungod sa pagkaylap sa COVID-19 sa tibuok kalibotan, kapig usa ka tuig na ko nga wala makadawat sa atong inimprentang mga publikasyon. Pero tungod sa JW Library, natagan-an gihapon ang among espirituwal nga panginahanglan. Ug mapasalamaton ko kang Jehova niining mahigugmaon niyang tagana.”

 Gibati sab ni Faye, nga nagpuyo sa Pilipinas, ang gibati sa daghan. Siya miingon: “Gigamit nako ni nga app sa akong espirituwal nga rutina. Mao ni ang una nakong basahon kada buntag. Kini ang akong paminawon samtang maghimo ko sa akong mga buluhaton. Kini ang akong gamiton sa pagtuon para sa tigom ug sa pagpangandam para sa Bible study. Motan-aw kog mga video niini sa akong bakanteng oras. Mobasa kog Bibliya o mga artikulo niini samtang maghulat. Dako kaayo nig tabang nako.”

 Dako pod kaayog tabang ang app sa ministeryo. Pananglitan, samtang nagsangyaw ang usa ka sister sa Cameroon, gusto niyang gamiton ang teksto nga gigamit sa laing sister sa miaging mga semana. Pero dili niya mahinumdoman kon unsa to nga bersikulo. Siya miingon: “Maayo na lang kay nahinumdom ko sa pipila ka pulong niini. Giablihan nako ang app, dayon ang Bibliya, ug gi-search ang maong mga pulong. Nakita dayon nako ang teksto. Tungod sa app, makita nako ang daghang teksto nga malimtan nako usahay.”

 Tungod sa inyong mga donasyon gamit ang mga paagi sa donate.pr418.com, among na-develop, na-maintain, ug mas napanindot ang JW Library app para sa atong mga igsoon sa tibuok kalibotan. Salamat kaayo sa inyong pagkamahinatagon.

1. Oktubre 2013—Gi-release ang app nga may rebisadong New World Translation

2. Enero 2015—Ang ubang publikasyon available na sa English, nga gisundan sa gatosan pa ka pinulongan

3. Nobyembre 2015—Puwede nang maka-highlight

4. Mayo 2016—Gidugang ang meetings nga tab

5. Mayo 2017—Puwede nang makahimog note

6. Disyembre 2017—Gidugang ang support para sa Study Bible

7. Marso 2019—Puwede nang maka-download ug mga audio recording, maka-stream ug video, ug ma-access ang mga reperensiya sa Giya sa Pagpanukiduki

8. Enero 2021—Gidugang ang nindot nga mga feature para sa Mabuhi Ka Hangtod sa Hangtod!