Kay gatosan ka libo ang mabawtismohan kada tuig, nagkinahanglan tag dugang teokratikanhong mga pasilidad. Tungod niini, ang mga Local Design/Construction Department sa tibuok kalibotan nagplano sa pagtukod o pag-renovate sa kapig 2,700 ka tigomanan sulod sa 2020 nga tuig sa pag-alagad. a

 Ikasubo nga nahunong ang maong mga plano tungod sa COVID-19 nga pandemic. Aron maprotektahan ang atong mga igsoon ug masunod ang mga regulasyon sa gobyerno, temporaryong gipahunong sa Komite sa Publishing sa Nagamandong Lawas ang kadaghanang proyekto sa pagpanukod sa tibuok kalibotan. Bisan pa niana, sulod sa 2020 nga tuig sa pag-alagad, kapig 1,700 ka tigomanan ang natukod ug na-renovate sa wala pa ang pandemic. Kapin sab sa 100 ka dagkong proyekto sa mga sangang buhatan ang nahuman. Matikdi kon sa unsang paagi nakabenepisyo ang mga igsoon tungod sa duha ka proyekto sa pagpanukod nga nahuman.

 Sangang buhatan sa Cameroon. Ang daan nga sangang buhatan, nga naa sa Douala, gamay kaayo ug daghag kinahanglang usbon. Gikonsiderar sa Komite sa Publishing ang pag-renovate sa sangang buhatan, pero ang magasto mas dako pa kay sa kantidad sa propidad. Gikonsiderar sab nila ang pagtukod ug bilding sa bag-ong propidad, o kaha mopalit na lag bilding ug i-renovate kini, pero wala madayon ang maong mga opsiyon.

 Dayon ang mga igsoon nakabalita nga sa amihanan sa Douala, ang gobyerno nagplano sa paghimog kalsada duol sa usa sa atong mga Assembly Hall. Ang kalsada makatabang aron daling adtoon ang propidad ug matagan-an ang panginahanglan niini. Kini gyod ang gikinahanglan sa sangang buhatan. Busa giaprobahan sa Nagamandong Lawas ang pagtukod ug bag-ong sangang buhatan sulod sa propidad sa Assembly Hall.

 Ang mga Saksi ug ang gibayran nga mga kontraktor nagtinabangay niini nga proyekto aron makadaginot ug panahon ug kuwarta. Gani, nahuman ang proyekto ug nakadaginot silag kapin sa duha ka milyong dolyares (U.S.)! Ang pamilyang Bethel nakabalhin sa bag-ong pasilidad sa wala pa ang COVID-19 nga pandemic.

 Ang mga Bethelite sa Cameroon nakabenepisyo gyod sa bag-ong pasilidad kay mas maayo na ang ilang kahimtang sa pagpuyo ug sa pagtrabaho, ug giisip nila ang bag-ong sangang buhatan ingong regalo gikan kang Jehova. Usa ka magtiayon miingon, “Mas ganahan ming motrabaho karon, ug gusto namong ipakita nga gipabilhan gyod namo ni nga regalo.”

 Tojolabal Remote Translation Office (RTO), Mexico. Sulod sa daghang tuig, ang Tojolabal translation team naa sa Central America branch, duol sa Mexico City. Pero kadaghanan sa mga tawo nga nagsultig Tojolabal nagpuyo sa Altamirano ug Las Margaritas​—nga halos 1,000 kilometros ang gilay-on gikan sa sangang buhatan! Tungod niana, nalisdan ang mga maghuhubad nga mahibalo kon unsa nay bag-ong mga termino nga gigamit sa mga nagsultig Tojolabal. Nalisdan sab ang sangang buhatan sa pagpangitag kuwalipikadong mga igsoon nga nagpuyo ra sa duol, nga makatabang sa paghubad sa Tojolabal nga pinulongan ug sa mga audio recording.

 Tungod niini, ang Komite sa Pagpanulat sa Nagamandong Lawas midesisyon nga ibalhin ang translation team sa lugar diin gisulti ang Tojolabal. Aron maposible kana, mipalit ang sangang buhatan ug bilding ug gi-renovate kini. Mas barato ni kay sa magtukod ug bilding o mag-abang ug mga opisina.

 Gisulti sa usa ka maghuhubad kon sa unsang paagi siya nakabenepisyo: “Sa 10 ka tuig nako nga pagtrabaho sa sangang buhatan ingong maghuhubad, wala gyod koy nahimamat nga pamilya nga nagpuyo sa duol nga parehas nakog pinulongan. Karon, ang among opisina naa na mismo sa lugar diin gigamit ang pinulongang Tojolabal. Kada adlaw, naa na koy makaestorya nga nagsultig Tojolabal. Tungod niini, nadugangan ang akong bokabularyo ug miuswag ang kalidad sa akong trabaho.”

 Para sa 2021 nga tuig sa pag-alagad, dunay mga plano nga trabahoon ang 75 ka RTO ug ang mga pasilidad para sa tunghaan sa Bibliya, kon itugot sa kahimtang. Magpadayon ang walo ka dagkong proyekto sa mga sangang buhatan, apil ang bag-ong proyekto sa new world headquarters sa Ramapo, New York, ug ang pag-relocate sa Argentina ug Italy nga mga sangang buhatan. Dugang pa, kapin sa 1,000 ka bag-ong Kingdom Hall ang gikinahanglan, kapin sa 6,000 ka tigomanan ang dili na haom gamiton ug kinahanglang ilisan, ug duna pay 4,000 ka Kingdom Hall ang kinahanglang i-renovate.

 Asa kuhaon ang kuwarta nga gamiton sa pagtukod ug pag-renovate? Gitubag kini ni Brader Lázaro González, membro sa Central America Branch Committee, samtang gihisgotan ang Tojolabal Remote Translation Office nga proyekto. “Kulang ang pondo dinhi sa among sangang buhatan. Busa kon wala ang suporta sa mga igsoon sa tibuok kalibotan, dili gyod matukod ang mga translation office para sa lumad nga mga igsoon. Ang mga donasyon sa mga igsoon sa tibuok kalibotan nakatabang gyod aron ang mga maghuhubad matukoran ug mga opisina sa mga lugar diin gigamit ang ilang pinulongan. Kinasingkasing ming nagpasalamat sa mga igsoon sa tibuok kalibotan tungod sa ilang pagkamahinatagon.” Ang mga proyekto sa pagpanukod nahimong posible tungod sa inyong mga donasyon para sa worldwide work, diin ang kadaghanan niini gihatag pinaagi sa donate.pr418.com.