Gusto kaayong tudloan ni Jehova ang iyang katawhan. Maong ang iyang organisasyon naghimog mga tunghaan sa pagbansay sa mga estudyante aron mahimo nila ang ilang asaynment. Ang usa sa maong mga tunghaan mao ang School for Kingdom Evangelizers (SKE). Sa di pa dugayng katuigan, ang organisasyon sa Diyos wala lang magpokus sa pagpauswag sa curriculum sa klase kondili apil sab ang pagpanindot sa mga pasilidad diin asa sila magklase. Ang pangunang tumong mao nga mahimong mas sayon ang pagtudlo sa mga instruktor ug mas dali ang pagkat-on sa mga estudyante. Sa unsang paagi ang imong donasyon nakatabang nga makab-ot na nga tumong?

 Sulod sa daghang katuigan, ang teokratikanhong mga tunghaan gihimo diha sa mga Kingdom Hall ug Assembly Hall. Pero nganong nagtukod gihapon ta o nag-renovate ug dugang nga mga pasilidad nga para lang gyod sa teokratikanhong mga tunghaan? Matikdi ang tulo ka rason.

 Mas dako ang panginahanglan. “Ang mga sangang buhatan nag-ingon nga naay mas dakong panginahanglan sa kanataran,” miingon si Christopher Mavor, katabang sa Service Committee sa Nagamandong Lawas. “Pananglitan, niadtong 2019, gibanabana sa branch sa Brazil nga mga 7,600 ka SKE graduate ang gikinahanglan aron maatiman ang panginahanglan sa ilang branch territory.” Ang branch sa United States miingon nga naay dakong panginahanglan sa kuwalipikadong mga payunir nga makabansay sa uban diha sa special metropolitan public witnessing, harbor witnessing, ug prison witnessing. Naa poy panginahanglan sa mga brader nga moalagad sa Local Design/Construction Department ug sa Hospital Liaison Committee. Ang mga mi-graduate sa SKE makatabang sa maong mga panginahanglan.

 Mas daghan ang ni-apply. Ang mga sangang buhatan mas daghag nadawat nga application kay sa ilang mapaeskuwela. Pananglitan, ang branch sa Brazil nakadawat ug mga 2,500 ka application sa SKE sulod lang sa usa ka tuig. Pero kay limitado ang mga pasilidad nga magamit sa pag-eskuwela, ang branch makapaeskuwela lang ug 950 ka estudyante.

 Mas maayong puy-anan. Kon ang klase himoon sa Kingdom Hall o sa Assembly Hall, ang mga estudyante sagad papuy-on sa balay sa mga igsoon. Mahimo lang ni sa ubang lugar kon gamay ra ang klase kada tuig. Pero kon daghan ang klase, malisdan tingali ang mga igsoon nga magpapuyog mga estudyante sulod sa daghang bulan. Maong nagtaganag mga puy-anan nga duol sa classroom ug gidisenyo ni para sa mga estudyante.

 Ang pasilidad nga naay usa ka classroom, puy-anan para sa mga instruktor ug mga 30 ka estudyante ug sa uban pa nilang panginahanglan, mokantidad ug minilyong U.S. dollars, depende sa lokasyon ug sa ubang rason.

 Ang mga tunghaan sagad naa sa mga lugar nga hilom ug layo sa siyudad pero dili ra pod layo sa mga terminal sa pangpublikong sakyanan. Gipili ang mga lugar nga naay daghang magmamantala nga makatabang sa mga buluhaton ug sa pagmentinar sa pasilidad ug equipment.

 Ang mga pasilidad naay mga library, study area, computer, printer, ug ubang equipment. Sagad, naa ni dining room diin ang mga estudyante ug instruktor dungan nga mangaon. Naa pod ni igong lugar aron maka-exercise sila ug maka-relax.

 Giplanohan pag-ayo ang disenyo sa classroom. “Mikonsulta mi sa Theocratic Schools Department aron matabangan mi nga makahimog mga classroom nga makatabang sa mga estudyante nga mas makapokus sa klase,” miingon si Troy, nga nag-alagad sa Worldwide Design/Construction Department sa Warwick, New York. “Ang mga brader naghatag namog mga guideline bahin sa gidak-on ug porma sa mga classroom, apil na pod kon unsang klase sa suga ug audio video equipment ang gamiton.” Kon bahin sa pag-install sa audio equipment, si Zoltán, nga instruktor sa SKE sa Hungary miingon: “Sa primero, wala mi magamit nga microphone maong ginasultihan namo ang mga estudyante nga kusgon ang ilang tingog. Pero karon dili na ni problema kay naa nay microphone ang matag desk.”

 Unsay epekto niining gipanindot nga mga pasilidad ngadto sa mga instruktor ug estudyante? “Maka-relax kaayo dinhi,” miingon si Angela, nga mieskuwelag SKE sa Palm Coast, Florida, U.S.A. “Giplanohan pag-ayo ang tanan, apil ang classroom ug among mga kwarto, maong makatuon gyod mi ug makapokus sa klase.” Si Csaba, nga instruktor sa Hungary, nag-enjoy pag-ayo nga makauban ug pagpangaon ang mga estudyante. Siya miingon nga, “panahon sa pagpangaon sagad ang mga estudyante mosulti bahin sa ilang kaugalingon ug mo-share sa ilang mga eksperyensiya. Pinaagi ani, mas nailhan namo ang mga estudyante. Ingong resulta, mas epektibo namong matudlo ang curriculum base sa ilang panginahanglan.”

 Ang gipanindot nga mga pasilidad giisip sa mga estudyante ug instruktor nga panalangin gikan sa atong “Dakong Instruktor,” si Jehova. (Isaias 30:20, 21) Usa ka sister sa Pilipinas nga mieskuwelag SKE sa usa ka pasilidad nga gihimong tunghaan miingon: “Ang pasilidad nagpahinumdom namo nga dili lang mi mga estudyante kondili espesyal nga mga bisita ni Jehova. Gusto niya nga mag-enjoy mi samtang nagtuon pag-ayo sa iyang Pulong.”

 Ang mga pasilidad natukod, na-renovate, ug namentinar tungod sa inyong mga donasyon, nga kadaghanan niini gihatag pinaagi sa donate.pr418.com. Salamat kaayo sa inyong pagkamahinatagon.