Sulod na sa kapig 130 ka tuig, ang mga Saksi ni Jehova nagatigom sa tinuig nga mga kombensiyon. Karon, kini nga mga programa naa nay kapig 40 ka lainlaing pakigpulong nga naay mga musika, interbiyo, ug video. Aron makabenepisyo ug madasig ang mga nanambong, kinahanglang klaro nilang ‘madungog ug makita’ ang programa. (Lucas 2:20) Giunsa paggamit ang inyong mga donasyon aron maseguro nga ang tanan makabenepisyo niini nga mga kombensiyon bisag asa pa sila nagpuyo?

 Daghang moderno nga mga estadyum ug arena sa Western nga mga nasod ang naa nay mga audio/video system. Pero nganong magtaod man gihapon tag kaugalingon natong equipment dihang mangabang tag ingon ani nga pasilidad para sa kombensiyon? Si David, nga nagtrabaho sa World Headquarters Broadcasting Department, miingon: “Ang kadaghanan sa mga pasilidad nga atong giabangan wala gidisenyo para sa programa nga ang mga tawo maminaw ug mga pakigpulong nga moabot ug kapig unom ka oras. Pananglitan, ang mga venue para sa sports naggamit ug audio system nga para lang sa mugbo nga mga anunsiyo ug musika. Ang ilang mga screen maoy para lang sa mga score, advertisement, ug replay sa dula. Sa laing bahin, gusto nato nga ang mga nanambong makatan-awg taastaas nga mga video ug klarong makadungog sa mga pakigpulong diha sa stage.”

 Lainlain ang pasilidad nga gamiton sa kada kombensiyon, maong kinahanglan pong ipahaom sa kahimtang ang audio/video system. Dihang makapili nag mga venue, ang Broadcasting Department sa mga sangang buhatan modesisyon kon asa palingkoron ang mga tawo base sa kon pilay gibanabanang manambong ug kon pilay puwedeng masulod sa pasilidad. Susihon sa mga brader kon asa dapit nila ibutang ang mga speaker ug video screen ug kon unsaon ni pagtaod. Dayon ilang ilista ang tanang gikinahanglang equipment aron maseguro nga ang tanan makakita ug makadungog gyod sa programa.

 Mas komplikado pa gyod ang mga audio/video system sa mga kombensiyon diin ang programa kinahanglang madunggan sa lainlaing pinulongan. Kon ang programa i-interpret ngadto sa laing pinulongan, kinahanglan ning madungog ug makita sa mga tig-interpret. Dayon ang ilang gisulti kinahanglang ipasa ngadto sa lahi nga estasyon sa radyo aron madunggan ni sa mga mamiminaw nga nagsulti sa maong pinulongan. Tungod sa espesyal nga mga media player, ang video dungang makita sa tanang nanambong, bisan pag ang audio niini gi-interpret sa walo ka lainlaing pinulongan. “Komplikado kaayo ni nga mga audio/video system,” miingon si David, “ug ang mga boluntaryo nga mag-operate ani kinahanglang mabansay pag-ayo.”

 Kadaghanan sa mga sangang buhatan naay mga audio/video equipment nga gigamit kada tuig. Kon mao nay kahimtang, ang kada equipment ibiyahe sa mga brader sa usa ka kombensiyon ngadto sa mosunod pang mga kombensiyon. Sa sangang buhatan sa United States pa lang, kapig ₱11.7 million (kapig $200,000) a na ang magasto sa pagpadala sa mga equipment sa kombensiyon. Pero mas menos gihapon nig gasto kay sa pagpalit ug pagmentinar ug dugang nga equipment. Si Steven, nga mitabang sa pagdumala sa audio/video sa usa ka kombensiyon sa Canada, miingon, “Gihimo sa among audio/video team ang kinamaayohan aron maseguro nga bisan ang kinagamyang piyesa sama sa roska, tornilyo, ug uban pa kompleto, maatiman, mahipos ug tarong, ug maandam para sa sunod nga programa.”

 Mahal kaayo ang pag-abang ug mga equipment sa audio/video, ug kasagaran dili pa gyod ni nindot ug kalidad ug dili maayong pagkamentinar. Tungod ana, sagad mopalit ta sa atong gikinahanglang equipment. Sa pagkakaron, ang indoor nga LED video wall nga singko por tres metros (16 por 10 piye) ang sukod mokantidad ug mga ₱1.4 million (mga $24,000), ug bisan ang usa lang ka 15 metros (50 piye) nga kable sa mikropono mokantidad ug mga ₱1,000 (mga $20). Busa ang Broadcasting makigtinabangay sa Purchasing Department aron “kuwentahon ang gasto” sa dili pa mopalit ug bisan unsang equipment. (Lucas 14:28) Pananglitan, unsa man ka daghan ang makabenepisyo sa equipment? Pinakamaayo ba gyod nga solusyon ang pagpalit ug bag-ong equipment? Naa ba tay igong lugar nga mahiposan sa equipment, ug naa ba tay mga gamit ug nabansay nga mga boluntaryo sa pagmentinar niini?

 Aron magamit pag dugay ang mga audio/video equipment ug madaginot ang mga donasyon, regular tang nagahimog elektronik ug mekanikal nga pagmentinar. Dihang ipadala ang mga equipment, ibutang ni sa lig-on kaayong mga sudlanan aron dili maguba, ug ang mga sudlanan ayohon pod kon gikinahanglan.

 Ang mga dili Saksi nakadayeg gyod sa kalidad sa mga audio/video sa atong mga kombensiyon. Pananglitan, sa usa ka kombensiyon, ang empleyado sa usa sa kinadak-ang kompaniya sa pag-broadcast nakadayeg sa ka nindot sa atong mga audio ug video. “Mibilib gyod siya dihang iyang nahibaloan nga ang mga membro sa among team pulos mga boluntaryo ug dili mga propesyonal,” miingon si Jonathan, nga nagatabang sa pag-set up ug pag-operate sa mga audio/video equipment diha sa mga kombensiyon. “Miingon siya nga ang ilang kompaniya dangtan ug lima ka adlaw sa pag-install sa mga equipment nga among gi-install sulod lang sa usa ug tunga ka adlaw.” Sa lain pang kombensiyon, ang manedyer sa usa ka pasilidad miingon, “Daghan nag mga propesyonal sa musika ug video ang migamit dinhi, pero karon pa gyod ko nakakita ug ingon ani ka maayo nga pagka-set up sa audio/video!”

 Sa unsang paagi nakabenepisyo ka sa mga audio/video system sa kombensiyon? Tingali parehas mog gibati ni David, nga nagpuyo sa England. Siya miingon: “Ang akong edad 88 na, ug daghan na kaayo kog natambongan nga kombensiyon. Pero makaingon ko nga mas dali na gyod karon nga magpokus sa programa sa kombensiyon. Tungod sa nindot nga mga video, ang tibuok programa morag dali ra kaayong mahuman, ug ang mensahe klaro ug daling masabtan.” Si Micheal, nga nagpuyo sa Nigeria, miingon, “Kay ang mga igsoon tin-aw nang makadungog sa mamumulong o makakita sa mga video, mas makapokus na sila ug dili sila laayan sa programa.”

 Sa imong pagtambong sa “Ipahayag ang Maayong Balita!” Rehiyonal ug Espesyal nga mga Kombensiyon niining tuiga, paggahin ug panahon nga konsiderahon kon unsa nga mga paningkamot ang gihimo aron tin-aw nimong madungog ug makita ang programa. Ang imong mga donasyon, apil na kadtong gihimo pinaagi sa donate.pr418.com, nakatabang gyod aron mahimo nang posible. Salamat kaayo.