“Ang Nagamandong Lawas nakadesisyon nga, gawas lang kon dunay mga restriksiyon ang lokal nga gobyerno, dasigon ang tanang kongregasyon nga sugdan ang pagpahigayon ug mga panagkatigom sa mga Kingdom Hall sa semana sa Abril 1.” Kana nga pahibalo, nga gi-post sa jw.org sa sayong bahin sa Marso 2022, nakapalipay sa mga Saksi ni Jehova sa tibuok kalibotan. Pero ang COVID-19 nga pandemic wala pa matapos. a Unsa nga mga kabag-ohan, suplay, ug equipment ang gikinahanglan aron ang mga manambong maproteksiyonan batok sa virus? Human sa mga duha ka tuig nga walay in-person nga tigom, andam ba ang atong mga Kingdom Hall nga gamiton pag-usab?

 Ang tinuod, ang mga igsoon daghang bulan nang nangandam sa pagbalik sa tigom diha sa mga Kingdom Hall.

 Usa ka bulan lang human nga gi-suspend ang in-person nga tigom niadtong 2020, gisugdan sa Worldwide Design/Construction Department (WDC), sa Warwick, New York, ang pag-analisar kon sa unsang paagi ang COVID-19 makaapektar sa atong paagi sa paggamit sa mga Kingdom Hall ug kon unsay angayng himoon aron mahimong safe ang atong mga tigomanan.

 Ang gikinahanglan sa usa ka lugar sagad lahi sa gikinahanglan sa laing lugar. Si Matthew De Sanctis, nga nagtrabaho sa WDC, miingon: “Sa ubang nasod, usa sa mga problema mao ang hunawanan. Kon ang mga Kingdom Hall walay suplay sa tubig, kinahanglang magpalit ug tubig o magkalos sa suba o atabay. Sa ubang nasod, gi-adjust sa mga gobyerno ang ilang requirement sa air-conditioning, air flow, ug kon unsang mga signboard ang angayng i-post bahin sa panglawas ug kahinlo.”

 Unsay gihimo sa mga igsoon aron masulbad ni nga mga problema? Ilang nakita nga sa daghang Kingdom Hall, “epektibo kaayo ang simple ug barato nga mga solusyon,” miingon si Matthew. Pananglitan, sa Papua New Guinea, naggamit silag plastik nga balde nga naay gripo nga kasudlag 20 litros (5.3 gal) ingong hunawanan. Busa ang Kingdom Hall sa mga baryo natagan-an ug hunawanan nga nagkantidad lang ug $40 (U.S.). Sa mga Kingdom Hall sa Africa, kapig 6,000 ka dekalidad nga hunawanan ang gipalit gikan sa suplayer sa Asia.

 Apil sa mga kausaban ang pagtaod o pag-modify sa mga fan ug air flow unit aron mas makasulod sa Kingdom Hall ang preskong hangin. Daghang kongregasyon ang mipalit ug mic boom aron nga ang mga mokomento dili na kinahanglang mogunit sa microphone. Gipaningkamotan nga mamenosan ug regular nga ma-sanitize ang mga touch point, o ang sagad gunitan sa mga tawo, sama sa gunitanan sa pultahan ug gripo, nga makapasa ug virus. Gitaoran sa ubang kongregasyon ang ilang CR ug mga gripo nga naay sensor. Sa Chile, ang paghimo sa gikinahanglang mga kausaban nagkantidad ug mga $1,400 (U.S.) sa matag Kingdom Hall.

 Bisag prayoridad sa mga igsoon nga himoong safe ang mga Kingdom Hall, naningkamot pod sila nga magamit sa kinamaayohang paagi ang mga donasyon. Pananglitan, sa ubang lugar, gipahimuslan nila ang tax exemption para sa mga hunawanan ug mic boom. Ang mga sangang buhatan nagsabot aron makadaginot pinaagi sa pagpalit ug mga suplay nga mas daghan kay sa naandan. Sagad hikayon sa mga sangang buhatan ug sa Global Purchasing Department nga direktang mopalit sa mga manufacturer, aron mas barato ang presyo ug mas paspas ma-deliver.

 Ang mga kahikayan nga himoong mas safe ang mga Kingdom Hall nakahatag ug proteksiyon ug pasalig niadtong nagtambong sa mga tigom in person. Si Dulcine, nga sister sa Peru, miangkon nga “medyo nahadlok” siya pagkahibalo niya nga magtigom na tag balik sa Kingdom Hall. “Na-COVID ko pagsugod sa pandemic,” siya miingon. “Maong nabalaka ko nga mamalik na sa Kingdom Hall, kay basig matakdan kog usab sa virus. Pero pag-abot nako sa Kingdom Hall, nakita nako nga ang mga ansiyano daghag gihimo aron mobati ming safe, sama sa paggamit ug hand-sanitizing station ug mic boom, ingon man ang pag-sanitize sa Kingdom Hall sa dili pa ug human sa matag tigom. Tungod ani, gibati nako nga safe ko.” b

 Si Sara, nga sister sa Zambia, nakaatubang ug laing kalisdanan. Siya miingon: “Sa miaging pipila ka bulan, ang akong bana namatay sa COVID-19. Nabalaka ko kon unsay akong bation inigtambong nakog in-person nga tigom sa unang higayon nga wala siya.” Pero unsa na may iyang gibati karon? Siya miingon: “Pinaagi sa in-person nga mga tigom napamatud-an nako nga si Jehova nag-uban kanato niining kataposang mga adlaw. Mas gibati nako karon ang pagdasig, gugma, ug suporta nga akong gikinahanglan gikan sa mga ansiyano ug sa mga igsoon.”

 Ang minahal nga mga igsoon sa tibuok kalibotan mapasalamaton sa kahigayonan nga makatigom pag-usab sa Kingdom Hall. Salamat sa inyong mga donasyon, nga kadaghanan inyong gihatag pinaagi sa donate.pr418.com. Kini nga mga donasyon nakatabang sa pagseguro nga ang mga sentro sa putling pagsimba mahimong komportable ug safe tigoman.