Gusto kaayong gamiton sa Nagamandong Lawas ang mga donasyon aron makahimog mga pasilidad nga makatabang nato aron mahimo ang buluhatong pagsangyaw sa Gingharian. Pananglitan, sa 2023 nga tuig sa pag-alagad, ang legal nga mga korporasyon nga gigamit sa mga branch office sa mga Saksi ni Jehova migastog kapig 500 million dollars sa pagpalit, pagtukod, pag-renovate, ug pagmentinar sa mga Kingdom Hall ug Assembly Hall sa tibuok kalibotan. a Kini nga kantidad wala pay labot sa galastohan sa mga kongregasyon sa tibuok kalibotan sa pag-atiman sa ilang mga Kingdom Hall.

 Dugang pa, gigamit pod ang mga donasyon sa pagtukod ug pagmentinar sa pasilidad sa mga branch office. Makatabang ni nga maorganisar ug masuportahan ang buluhatong pagsangyaw sa tibuok kalibotan. Gipasimple ang buluhaton sa mga branch aron ang mga donasyon magamit sa pagtukod ug pag-remodel sa mga Kingdom Hall ug Assembly Hall. Pero nagkinahanglan gihapon ug dakong kantidad sa pag-repair, pag-remodel, o pagbalhin sa mga pasilidad sa branch. Nganong importante ni nga mga proyekto? Giunsa pagsuportar sa mga branch office ang importanteng buluhaton sa pagsangyaw? Atong tan-awon.

 Daghang branch office ang kapin nag 30 o 40 ka tuig ang gidugayon! Si Nicholas, nga nag-alagad sa Worldwide Design/Construction Department, miingon: “Bisan ang maayong pagkamentinar nga bilding madaan ug madaot paglabay sa panahon. Ang pag-renovate makatabang nga mas magamit pa ug dugay ang usa ka bilding.”

 Ang mga pasilidad sa Bethel kinahanglan sab mohimog mga kausaban aron masuportahan ang panginahanglan sa organisasyon. Sa tibuok kalibotan, midaghan ang magmamantala sukad sa panahon nga natukod ang mga branch office. Aron masuportahan ni nga pag-uswag, nagkinahanglan tag dugang boluntaryo sulod sa mga branch. Ang mga pasilidad nga sakto lang ang gidak-on kaniadto, dili na paigo karon!

 Importante sab ang safety. Kay nagkinabuhi na ta sa kataposang mga adlaw niining sistemaha, nakaeksperyensiya tag daghang kalamidad nga makapameligro sa kinabuhi. (Lucas 21:11) Pinaagi sa paggamit ug bag-ong mga pamaagi sa pagpanukod panahon sa renovation, makahimo tag mga pasilidad nga mas luwas trabahoan. Kini nga mga pag-uswag makapasayon sab sa mga igsoon nga gamiton ang maong mga bilding sa pag-organisar ug mga relief effort ug sa padayong pagsuportar sa pagsangyaw human sa kalamidad.

 Ubos sa direksiyon sa Nagamandong Lawas, naay gihimong construction sa mga pasilidad sa 43 ka branch office panahon sa 2023 nga tuig sa pag-alagad. Nagpasabot ni nga naay gihimong pagpanukod ug pag-renovate sa halos katunga sa mga pasilidad sa Bethel sa tibuok kalibotan. Matikdi kining pipila ka pananglitan kon unsa ka importante ni nga buluhaton.

 Angola. Si Matt, membro sa Angola Branch Committee, miingon: “Pribilehiyo namo nga makita nga ang tagna sa Haggeo 2:7 natuman sa espesyal nga paagi. Sulod lang sa 10 ka tuig, misakag 60 porsiyento ang gidaghanon sa magmamantala! Aron masuportahan ni nga pag-uswag, kinahanglang katulohon ang gidaghanon sa mga boluntaryo sa Bethel. Pero dili mi makapangimbitar ug daghang boluntaryo kay ang gidak-on sa among mga pasilidad dili igo. Tungod ani, daghang Bethelite ang daghag trabaho ug kinahanglang mag-obertaym.”

 Naay giasayn nga mga brader aron masolusyonan ang dakong panginahanglan. Sa primero, naghunahuna sila nga dali ug praktikal nga solusyon ang pag-renovate sa mga bilding sa branch. Human sa mga pagsusi ug pag-research, naamgohan nila nga ang pag-renovate dili mao ang pinakamaayong paagi sa paggamit sa donasyon. Hinuon, misugyot sila nga mopalit ug mag-renovate ug duol nga bilding. Si Matt miingon: “Dihang ang opsiyon nga mopalit ug mag-renovate ug bilding unang gipresentar ngadto sa Branch Committee, nabalaka mi kay basin dili kaayo ni mohaom sa panginahanglan. Lahi ra gyod nang kita mismo ang magtukod. Pero dihang nahuman ni, nakita namo nga haom kaayo ni sa among panginahanglan. Gipanalanginan ni Jehova kini nga desisyon.”

 Ang Angola branch posibleng magkinahanglan pag dugang pasilidad sa umaabot. Pero ang bag-ong bilding, apil ang modular nga mga puy-anan sa Bethel nga puwede rang ma-adjust ug ang mga apartment nga girentahan, nakatabang sa branch office nga padayong masuportahan ang dakong pag-uswag sa buluhatong pagsangyaw.

 Japan. Halos 40 ka tuig na nga natukod ang pangunang mga bilding sa branch. Ug kadaghanan niini wala moagi ug dagkong renovation. Gimentinar pag-ayo ang pasilidad, pero bisan pa sa mga paningkamot sa mga igsoon nga atimanon ni, ang mga bilding karaan na kaayo. Tungod niini, naay dakong renovation nga gihimo karon.

 Nausab pod ang kinabuhi sa Bethel paglabay sa katuigan. Sa wala pay 2015, ang tanang pagkaon giandam para sa mga Bethelite. Busa ang kadaghanang kuwarto sa Bethel sa Japan gidisenyo nga naay gamayng kosina. Pero karon ang mga Bethelite na ang kasagarang mangandam sa ilang pagkaon. Maong gi-renovate ang kosina sa mga kuwarto sa Bethel aron mas sayon para sa mga Bethelite ang pagluto. Si Kumiko, sister nga nag-alagad sa Japan branch, miingon: “Komportable kaayo ko sa kosina, ug naghatag ni nakog rason nga suportahan pag-ayo ang bag-ong mga kahikayan sa Bethel.”

 Ang ginahimong trabaho sa Japan branch importante kaayo para sa tibuok kalibotang buluhaton. (Mateo 28:19, 20) Duha lang ka branch ang nag-imprenta ug kompletong Bibliya. Usa na niana ang Japan. Busa apil sa construction project ang pag-install ug system nga mokolekta sa mga abog ug gagmayng piraso nga mga papel aron luwas ang pagtrabaho sa Printery. Ang pagpalit ug pag-install niini nga system nagkantidad ug halos one million dollars, pero makatabang ni sa branch nga padayong makaimprenta ug makapadalag espirituwal nga pagkaon.

 Giseguro sa mga igsoon nga makapadayon sila sa pag-imprenta ug mga Bibliya panahon sa construction. Si Trey, nga membro sa Japan Branch Committee, miingon: “Panahon sa construction, ang atong organisasyon nag-release ug daghan pang hubad sa Bibliya, ug mas nagkadaghang tawo sa tibuok kalibotan ang nanginahanglan ug Bibliya. Kinahanglang magtinabangay ang lainlaing departamento ug ang kontraktor aron makaeskedyul kon kanus-a maka-install ug bag-ong equipment ug makaimprenta ug mga literatura.” Bisan pa niini nga mga hagit, halos 220,000 ka Bibliya ang naimprenta kada bulan sulod sa Marso hangtod Agosto 2023—dihang ginahimo ang kinadak-ang bahin sa construction project sa Printery. Nahuman ang tanang trabaho nga wala ray dugang galastohan.

 Kini nga renovation project makatabang pod aron makadaginot ug koryente. Naay i-install nga bag-ong mga solar panel. Makadaginot nig mga $120,000 sa bayronon sa koryente kada tuig. Ang pag-install ug mga bentana nga naay tulo ka layer nga bildo makatabang pod nga makadaginot ug mga $10,000 kada tuig. Bisag mahal ang mga solar panel ug bentana, gibanabana nga makadaginot ug kapin sa 3.5 million dollars sulod sa gitas-on sa panahon nga magamit ni. Makatabang pod ni nga dili kaayo madaot ang kinaiyahan.

 Gipakita niining duha ka proyekto sa branch kon unsa ka dako ang himoonon aron ang mga pasilidad sa Bethel makasuportar sa panginahanglan sa buluhatong pagsangyaw. Pero wala pa mahuman ang buluhaton. “Daghan na tag nahimo, pero daghan pa ang kinahanglang himoon,” miingon si Aaron, nga nag-alagad sa Worldwide Design/Construction Department. Sa unsang paagi molampos ni nga buluhaton? Siya miingon: “Gawas sa kinasingkasing nga donasyon nga nakatabang niining importante nga mga proyekto, naapresyar pod namo ang pagkaandam sa tanang miboluntaryo kaniadto ug niadtong mihimog mga kausaban sa ilang kinabuhi aron makaboluntaryo sa umaabot. Ang pisikal ug pinansiyal nga tabang sa atong mga igsoon maoy dakong pamatuod sa panalangin ni Jehova.”—Salmo 110:3.

 Ang tanang pagpanukod ug pag-renovate gisuportahan pinaagig boluntaryong mga donasyon, nga kadaghanan niini gihatag pinaagi sa donate.pr418.com. Salamat sa inyong padayong suporta ug pagkamahinatagon.