Sa tuig 2020, daghang kalamidad ang nahitabo ug nagsugod ang COVID-19 nga pandemic sa tibuok kalibotan. Sa unsang paagi gitabangan sa mga Saksi ni Jehova ang mga naapektohan?

 Sa 2020 nga tuig sa pag-alagad, a giaprobahan sa Komite sa mga Koordinetor sa Nagamandong Lawas ang paggasto ug 28 million dollars b sa paghatag ug hinabang sa mga naapektohan sa kalamidad. Kini nakatabang niadtong naapektohan sa kapig 200 ka kalamidad—lakip ang COVID-19 nga pandemic, daghang bagyo, pagbaha sa Africa, kanihit sa pagkaon sa Venezuela, ug hulaw sa Zimbabwe. Ang mga donasyon maoy gibayad alang sa pagkaon, tubig, puy-anan, sinina, ug mga tambal, ingon man ang pangunang mga suplay nga gamiton sa pagpanglimpiyo, pagpang-ayo, ug pagpanukod. Niay pipila ka pananglitan sa pagtaganag hinabang.

 COVID-19. Ang pandemic nakaapektar sa atong mga igsoon sa tibuok kalibotan sa pisikal, emosyonal, ug pinansiyal. Aron matabangan sila, kapig 800 ka Disaster Relief Committee (DRC) ang giporma sa tibuok kalibotan. Kini nga mga komite nag-monitor sa panginahanglan sa atong mga igsoon ug naghatag dayon ug mga report nga nakatabang sa Komite sa mga Koordinetor sa pagdesisyon kon unsaon pagtaganag hinabang sa pinakamaayong paagi.

 Sa tibuok tuig, daghan ang natabangan sa mga DRC nga makabaton ug pagkaon, tubig, mga gamit para sa sanitasyon, ug mga tambal. Sa ubang dapit, ang mga DRC ug lokal nga mga ansiyano nagtabang sa mga igsoon aron mahatagan silag ayuda sa gobyerno.

 Namatikdan sa mga dili Saksi ang paghatag natog mga hinabang. Pananglitan, giingnan ni Field Simwinga, district commissioner sa Nakonde, Zambia, ang atong mga igsoon: “Utang kabubut-on namo ang inyong eksakto sa panahon nga pagtaganag hinabang sa apektadong mga pamilya.”

 Kanihit sa Pagkaon sa Angola. Tungod sa COVID-19 nga pandemic, minihit ang pagkaon sa Angola ug misaka pag-ayo ang presyo sa mga palaliton. Daghan sa atong mga igsoon ang nalisdan sa pagpalit ug pagkaon.

 Ang sangang buhatan sa Brazil gihangyo sa pagtabang pinaagi sa pagpadalag mga kit sa pagkaon ngadto sa atong mga igsoon sa Angola. Aron magamit sa hustong paagi ang pondo sa pagtaganag hinabang, gi-research pag-ayo sa mga igsoon kon unsa ang kinamaayohang paagi sa pagpalit ug pagpadalag pagkaon, ug ang pagkaon gipalit nga binulto. Busa, ang gasto sa pagpalit ug pagpadala sa matag kit moaberids lang ug mga ₱1,000 ($22) pero ang sulod niini halos 20 kilos nga pagkaon sama sa bugas, beans, ug mantika. Sa pagkakaron, dunay 33,544 ka kit ang napadala, nga may total nga 654 metric tons (721 U.S. tons). Uban sa lokal nga mga pagkaon, kini nga probisyon nakatabang nga mapakaon ang kapig 50,000 ka tawo!

 Unsay gibati sa atong mga igsoon sa maong mga hinabang? Si Alexandre, nga nagpuyo sa hilit nga lugar sa Angola, miingon: “Para nako, pamatuod ni nga gihigugma ko ni Jehova ug wala ko mag-inusara. Gipabilhan ko sa organisasyon ni Jehova!” Ang nag-inusarang inahan nga si Mariza miingon: “Gidungog ni Jehova ang akong pag-ampo. Mapasalamaton ko niya ug sa iyang organisasyon!”

 Hulaw sa Zimbabwe. Panahon sa 2020 nga tuig sa pag-alagad, ang Zimbabwe nakaatubang ug grabeng hulaw, maong minilyon ka tawo ang nakasinatig grabeng kagutom. Linibo ka Saksi sa Zimbabwe ang walay igong pagkaon.

 Lima ka DRC ang giporma aron motabang sa pagtaganag pagkaon sa atong mga igsoon. Gatosan ka magmamantala ang mitabang sa pag-pack ug pagkaon, pagkarga sa mga suplay, o pagpahulam sa ilang mga sakyanan. c Panahon sa 2020 nga tuig sa pag-alagad, kapig 33 million pesos ($691,561) ang nagasto sa pagpakaon sa kapig 22,700 ka tawo!

 Sa ubang kahimtang, ang mga igsoon nahutdan na sa ilang kaugalingong suplay sa pagkaon dihang miabot ang hinabang. Pag-abot sa pagkaon, gidayeg sa atong mga igsoon si Jehova. Ang uban nanganta pa gani ug mga awit sa Gingharian.

 Sa usa ka lugar, duha ka biyudang Saksi ang mitambong sa miting nga giorganisar sa ilang komunidad aron hisgotan ang itaganang ayuda sa usa ka pribadong organisasyon (NGO). Pero sa kadugayan, ang miting nasagolan nag politika, maong ang mga sister miingon nga dili nila mahimo ang mga kinahanglanon aron madawat ang ayuda. Paghawa nila sa miting, sila giyagayagaan ug giingnan, “Wa gyod moy madawat nga pagkaon gikan namo!” Pero duha ka semana lang sa ulahi, nangabot sa maong lugar ang mga igsoon ug nahatagag hinabang ang atong mga sister—mas una pa ning miabot kay sa ayuda gikan sa NGO!

 Ang pagtaganag hinabang sa Zimbabwe nakahatag sab ug maayong pamatuod. Pananglitan, tagda ang kasinatian ni Prisca, nga nagpuyo sa usa ka gamayng baryo. Bisan pa sa mga kalisdanan tungod sa hulaw, gigahin ni Prisca ang Miyerkoles ug Biyernes sa pagministeryo, bisan sa panahon sa tingdaro. Giyagayagaan siya sa mga tawo sa ilang baryo ug giingnan: “Magutman gyod ang imong pamilya tungod anang imong pagsangyawsangyaw.” Si Prisca mitubag: “Di gyod pasagdan ni Jehova ang iyang mga alagad.” Wala madugay human niana, nakadawat siyag hinabang gikan sa atong organisasyon. Nakadayeg niini ang pipila sa iyang mga silingan ug giingnan nila si Prisca: “Wa gyod ka pasagdi sa Diyos, maong gusto namo siyang mailhan.” Pito niya ka silingan ang tigpaminawan na karon sa mga tigom sa kongregasyon nga gi-broadcast sa radyo.

 Samtang nagkaduol ang kataposan, padayon tang makaatubang ug mga kalamidad. (Mateo 24:3, 7) Salamat kaayo sa inyong mga donasyon nga gihatag pinaagi sa donate.pr418.com. Dako kaayo nig tabang sa pagtaganag hinabang sa atong mga igsoon sa panahon nga ila kining gikinahanglan.