Sukad sa bata pa ko, gihigugma na nako ang kamatuoran. Gusto nakong magpahinungod kang Jehova ug magpabawtismo. Maong pagka-13 nako, nalipay kaayo ko nga nakab-ot nako ang akong tumong. Pagka-14 nako, gipangutana ko ni Brader Helge Linck a kon gusto ba nakong magpayunir. Dili gyod nako to malimtan. Bisag ang akong mama ug papa nag-alagad ingong temporaryong mga payunir (karon gitawag nag oksilyare payunir), wala gyod koy ideya kon unsay kinabuhi sa regular payunir. Ang pangutana ni Brader Linck midulot gyod sa akong kasingkasing—gusto na nakong mag-alagad kang Jehova nga mas bug-os pa.

 Niadtong 1974, naay mga problema sa politika sa Ethiopia ug tungod ani ang mga tawo gipangdakop, gipamatay, ug naay grabeng kagubot. Sa ngadtongadto, dili na mi makasangyaw sa balay ug balay, ug kinahanglan ming magtigom sa ginagmayng grupo. Bisag mga bata pa mi adto, giandam na mi sa among mga ginikanan para sa dugang nga paglutos. Ang mga prinsipyo sa Bibliya nakatabang namo nga masabtan kon unsay gipasabot sa pagkahimong neyutral. Among nakat-onan nga tabangan mi ni Jehova kon unsay isulti dihang kuwestiyonon, ug nga usahay kinahanglan tingali namong magpakahilom.—Mateo 10:19; 27:12, 14.

 Human nakog eskuwela, nagtrabaho ko sa Ethiopian Airlines. Usa ka adlaw pag-abot nako sa trabahoan, lipay kaayo ang akong mga katrabaho kay ako kunoy napili nga mag-una sa parada nga himoon panahon sa anibersaryo sa gobyerno. Giingnan dayon nako ang among supervisor nga dili ko moapil sa maong selebrasyon kay neyutral ko sa politika.

 Pagkasunod adlaw, dihang nagtrabaho ko sa airport, nakakita kog mga lalaki nga nagdala ug armalayt nga naglakaw padulong sa kuhaanan ug ticket. Abi nakog naa silay dakpon nga tawo nga gustong moikyas sa nasod. Pero akoy gitudlo nila! Nganong ako man? Nagtuo ko nga normal ra to nga adlaw, pero kalit nga nausab ang akong kahimtang.

 Gidala ko sa mga sundalo ug ila kong gisukitsukit sa pipila ka oras. “Diin gikan ang kuwarta sa mga Saksi?” gusto nilang motubag ko. “Rebelde ba ka batok sa nasod? Mga espiya ba mo sa imong papa para sa gobyerno sa Amerika?” Bisag lisod kaayo to nga situwasyon, mibati kong kalmado sa tabang ni Jehova.—Filipos 4:6, 7.

 Human ko sukitsukita sa mga sundalo, gidala ko nila sa usa ka balay nga nahimong prisohan ug gibutang ko sa 28 metro kuwadrado (300-sq-ft) nga kuwarto. Naghuot mi didto kay kauban nako ang 15 ka batan-ong mga babaye nga napriso tungod sa ilang opinyon o gihimo nga konektado sa politika.

 Adtong gabhiona, samtang naghigda ko sa salog nga nagsul-ob pa sa uniporme sa among airline, nabalaka kaayo ko para sa akong mga ginikanan ug mga igsoon. Nahibalo man god sila nga gidakop ko, pero wala tawon silay ideya kon asa ko. Nag-ampo ko kang Jehova nga tabangan ang akong pamilya nga mahibalo kon asa ko napriso.

 Pagkaugma, nakit-an ko sa akong kaila nga guwardiya. Puwerteng kurata niya maong nakaingon siya, “Hala! Nganong naa man ka diri Aster?” Gihangyo nako siya nga moadto sa balay sa akong mga ginikanan ug ingnan sila kon asa ko. Nianang adlawa, nakadawat kog pagkaon ug mga sinina. Gikan diay to sa akong mga ginikanan kay giingnan sila sa guwardiya kon asa ko. Gitubag gyod ni Jehova ang akong pag-ampo! Kadto nga eksperyensiya nakapabati nako nga wala gyod ko mag-inusara.

 Dili puwede sa prisohan nga naa koy Bibliya o bisag unsang publikasyon, ug dili pod puwede nga bisitahon ko sa akong pamilya ug mga higala. Pero gidasig gihapon ko ni Jehova pinaagi sa akong mga kauban nga piniriso. Kada adlaw nako silang sangyawan, ug ganahan kaayo sila sa kamatuoran bahin sa Gingharian sa Diyos. Ingnon pa gani ko nila: “Naningkamot mi para sa gobyerno sa tawo, pero ikaw, naningkamot para sa gobyerno sa Diyos. Maong ayaw gyod ug surender bisan pag patyon ka nila!”

 Usahay ang mga guwardiya magsukitsukit ug mangulatag mga piniriso. Dihay higayon nga giadto ko nila, mga alas 11:00 to sa gabii. Gidala ko nila sa usa ka kuwarto. Didto, gisukitsukit ko nila ug giakusahan nga wala daw ko mosuportar sa gobyerno. Ila kong gipasulti ug usa ka slogan sa politika, pero mibalibad ko maong gikulata ko sa duha ka lalaki nga guwardiya. Dili lang kay kausa ko nilang gisukitsukit, kadaghan tong nahitabo. Sa matag higayon nga mahitabo to, moampo ko pag-ayo kang Jehova, ug gipalig-on gyod ko niya.

 Human sa tulo ka bulan, giingnan ko sa guwardiya nga makagawas na ko sa prisohan. Nalipay kaayo ko, pero naguol ko gamay kay nag-enjoy na unta kog sangyaw sa kauban nakong piniriso nga mga babaye.

 Pipila ka bulan human ko makagawas sa prisohan, naay mga sundalo nga miadto sa among balay. Ilang gidakop ang tanang tin-edyer sa among pamilya! Duha ka babaye ug usa ka lalaki nakong igsoon ang nadakpan. Wala ko maapil kay wala man ko sa balay adtong tungora. Maong nakadesisyon ko nga mobiya sa among nasod. Naguol kaayo ko nga malayo na pod sa akong pamilya, pero gidasig ko ni Mama nga magmalig-on ug mosalig kang Jehova. Wa madugay human adto, miadto kog airport kay molarga ko pa-United States. Anang gabhiona, naa na poy mga sundalo nga miadto sa among balay aron dakpon kog usab. Pag-abot nila, wala ko didto, maong giapas ko nila sa airport. Pero ulahi na ang tanan kay nakalupad na ang eroplano.

 Pag-abot nako sa Maryland, gitagbo ko ni Haywood ug Joan Ward, ang mga misyonaryo nga nag-Bible study sa akong mga ginikanan sa una. Naa silay anak nga babaye, si Cyndi. Paglabayg lima ka bulan, nakab-ot na nako ang akong tumong nga magpayunir. Si Cyndi ang akong partner sa pagpayunir, ug daghan mig makapalipayng eksperyensiya sa among ministeryo.

 Sa ting-init niadtong 1979, mibisita ko sa Bethel sa New York ug akong nailaila si Wesley Parker. Ganahan ko niya kay naa siyay maayong mga hiyas ug espirituwal nga mga tumong. Pagka-1981, naminyo mi, ug mibalhin ko sa Wallkill, New York aron mag-alagad sa Bethel kauban ni Wesley. Naasayn ko sa Housekeeping ug Dry Cleaning Department. Sa ngadtongadto, nabalhin ko sa MEPS team sa Computer Department. Ang pag-alagad sa Bethel nakatabang nako nga bug-os magamit ang akong panahon para kang Jehova. Daghan pod kog nailaila nga mga igsoon ug nahimo nako silang tinuod nga mga higala.

 Pero sa Ethiopia, ang akong pamilya grabe gihapong gilutos, ug nakapaguol kaayo ni nako. Ang akong tulo ka igsoon naa gihapon sa prisohan. b Kada adlaw silang lutoan ug hatdag pagkaon ni mama kay wala tawon silay pagkaon sa prisohan.

 Niadtong lisod kaayo nga panahon, si Jehova ang akong dangpanan ug gihupay pod ko sa pamilyang Bethel. (Marcos 10:29, 30) Usa ka adlaw, giingnan ko ni Brader John Booth: “Lipay kaayo mi nga nag-alagad ka diri sa Bethel. Naa ka diri kay giuyonan ka ni Jehova.” c Nahupayan gyod ko sa iyang gisulti. Nagpasalig to nako nga giuyonan ni Jehova ang akong desisyon nga mobiya sa Ethiopia ug iyang atimanon ang akong pamilya.

 Niadtong Enero 1989, nahibal-an namo nga mabdos ko. Nakurat gyod mi adto! Pero humag pipila ka adlaw, ang among kabalaka napulihag kalipay. Bisan pa ana, nagsige gihapon mig hunahuna kon mahimo ba ming maayong mga ginikanan, kon asa mi mopuyo, ug kon unsaon namo pagtagana sa panginahanglan sa among pamilya pagbiya namog Bethel.

 Niadtong Abril 15, 1989, gibutang namo ang tanan namong mga gamit sa among sakyanan ug mibiyahe padulong sa Oregon. Nagplano mi nga ipadayon ang among bug-os panahong pag-alagad ingong mga payunir didto. Pero dihang didto na mi, ang uban namong higala nga naghunahuna sa among kaayohan miingon nga morag dili na praktikal nga magpayunir pa mi. Igo-igo ra man god ang among tinigom ug hapit na ming mahimong ginikanan. Unsa may among himoon? Wa madugay, gibisita mi sa among tigdumala sa sirkito nga si Guy Pierce, ug sa iyang asawa nga si Penny. d Ila ming gidasig nga ipadayon ang among tumong. Maong nagpayunir gyod mi ug misalig mi kang Jehova nga iya ming tabangan. (Malaquias 3:10) Nagpadayon gihapon mi sa pag-alagad ingong mga payunir bisag natawo na ang una namong anak nga lalaki nga si Lemuel, ug bisag dihang naa na ang among ikaduhang anak nga lalaki nga si Jadon.

 Nalipay kaayo mi sa pagpayunir samtang nagpadako sa among mga anak. Naghatag ni namog daghang kahigayonan nga ipatin-aw ang kamatuoran sa Bibliya ngadto sa uban, apil na pod sa among mga anak. (Deuteronomio 11:19) Pero human matawo ang ikatulo namong anak nga lalaki nga si Japheth, kinahanglan usa ming moundang sa pagpayunir.—Miqueas 6:8.

 Ang pinakaimportanteng responsibilidad para namo ingong mga ginikanan mao ang pagtabang sa among mga anak nga mahimong kombinsido nga tinuod gyod si Jehova ug masuod sila kaniya. Maong naningkamot mi nga himoong makalingaw ang among pamilyahanong pagsimba. Adtong bata pa kaayo sila, magdungan mig basa sa mga librong Pagkakat-on Gikan sa Dakong Magtutudlo ug Akong Basahon sa mga Estorya sa Bibliya. Usahay idrama pa gani ni namo. Ako ray babaye sa among pamilya, maong dihang gidrama namo ang estorya ni Jezebel, siyempre ako si Jezebel. Nalingaw kaayo ang among mga anak dihang naglingkod kunohay ko sa sofa ug ila kong gitulod, unya sila kintahay ang mga iro! Gawas pa sa among pamilyahanong pagsimba, tagsaan ug Bible study ni Wesley ang among mga anak.

 Pinangga kaayo namo ang among mga anak, ug nag-ampo mi nga magpabilin ming suod sa usag usa. Samtang nagdako sila, amo silang gitudloan nga mahimong responsable. Silay manghugas sa plato, manglimpiyo sa ilang mga kuwarto, ug manglaba sa ilang mga sinina. Nakakat-on pod sila nga moluto.

 Sa among pagpadako nila, naa pod mi nakat-onan ingong mga ginikanan. Naay mga panahon nga sobra ra ang among reaksiyon ug nakasulti mig sakit ngadto sa among mga anak o sa usag usa. Dihang nahitabo to, naningkamot mi nga magpaubos ug mangayog pasaylo.

 Pirme ming mangimbitar sa balay ug mga igsoon sa among kongregasyon, apil na pod mga Bethelite, misyonaryo, tigdumala sa sirkito, ug kadtong mga nag-alagad diin dako ang panginahanglan. (Roma 12:13) Dihang naa mi mga bisita, dili namo pasudlon sa kuwarto ang among mga anak aron magdula. Mouban sila namo, moapil ug estorya sa among mga bisita, ug maminaw sa ilang mga eksperyensiya. Gani, mas mahinumdoman pa sa among mga anak ang mga detalye sa among panag-estorya.

 Naningkamot mi ni Wesley nga himoong makalingaw ang among kinabuhi samtang nag-alagad kang Jehova. Pananglitan, giplano namo daan ang among bakasyon ug nagtigom mig kuwarta aron makaadto mi sa lainlaing nasod. Kada bakasyon namo, mobisita gyod mi sa sangang buhatan, motambong ug mga tigom, ug mouban sa pagsangyaw. Nakatabang ni namo nga maapresyar ang tibuok kalibotang organisasyon ni Jehova, ug nakapasuod ni namo ingong pamilya.

 Nakita namo nga daghang tawo sa among lugar ang Spanish ug pinulongan, pero panagsa ra silang masangyawan. Maong adtong bata pa kaayo ang among mga anak, gipangutana namo si Brader Pierce kon maayo ba nga mobalhin ang among pamilya sa Spanish nga kongregasyon. Dako kaayo siyag ngisi ug miingon: “Kon mangingisda mo, moadto mo kon asa ang mga isda.” Tungod sa maong pagdasig, mibalhin mi sa Spanish nga kongregasyon sa Woodburn, Oregon. Nalipay mi nga naa mi pipila ka Bible study nga miuswag ug nabawtismohan pa gani ang uban nila. Nalipay pod mi nga nahimo nang kongregasyon ang among gamayng Spanish nga grupo.

 Naa toy panahon nga nawad-ag trabaho si Wesley ug kinahanglan ming mobalhin sa California sa iyang bag-ong trabaho. Duha ka tuig human adto, nagpayunir mi ni Lemuel ug Jadon. Niadtong 2007, nalipay ko nga makaeskuwela sa Pioneer Service School kauban nila. Human sa among pag-eskuwela, among namatikdan nga daghang tawo ang Arabic ug pinulongan sa among teritoryo. Busa human sa 13 ka tuig sa Spanish nga kongregasyon, ang among pamilya mibalhin sa Arabic nga kongregasyon. Nalingaw kaayo mi sa pagsangyaw sa Arabic nga mga langyaw sa among lugar ug dihang moapil mi sa espesyal nga mga kampanya sa pagsangyaw sa laing nasod. Nagpadayon mi sa pagpayunir sa Arabic nga kongregasyon sa San Diego, California.

 Si Wesley maayo kaayong bana ug ulo sa pamilya. Dako siyag pagtahod sa organisasyon ni Jehova. Wala gyod siya misultig negatibo bahin sa mga kahikayan sa Bethel o sa kongregasyon. Hinuon, naningkamot siya nga mosultig positibong mga butang. Moampo siya uban nako ug para nako. Sa dihang naay makapa-stress nga mga situwasyon, ang iyang mga pag-ampo nakahupay ug nakapakalma nako.

 Dihang maghunahuna ko bahin sa among kinabuhi, makaingon gyod ko nga nalipay kaayo mi sa among bug-os panahong pag-alagad, pag-atiman sa among pamilya, ug pag-alagad sa mga kongregasyon nga dakog panginahanglan. Among nakita nga panalanginan ni Jehova kadtong naningkamot nga unahon siya, ug iya ming gitagan-an sa among mga panginahanglan. (Salmo 37:25) Kombinsido ko nga ang paggamit sa akong kinabuhi sa pag-alagad kang Jehova mao ang pinakamaayong desisyon nga akong nahimo.—Salmo 84:10.