PADAYON SA PAGBANTAY!

2022: Tuig nga Punog Kabalaka—Unsay Giingon sa Bibliya?

I-PLAY

Sa 2022, kanunay tang makabalita bahin sa gubat, kalisod sa ekonomiya, ug kalamidad. Ang Bibliya lang ang nagpatin-aw sa tinuod nga kahulogan niini nga mga panghitabo.

Ang tinuod nga kahulogan sa mga panghitabo sa 2022

Tungod sa mga panghitabo sa miaging tuig, mas tin-aw nga nagkinabuhi ta sa gitawag sa Bibliya nga “kataposang mga adlaw.” (2 Timoteo 3:1) Kana nga yugto sa panahon nagsugod niadtong 1914. Matikdi kon sa unsang paagi ang bag-o lang nga mga hitabo mitakdo sa gitagna sa Bibliya bahin sa atong panahon:

“Mga gubat.”—Mateo 24:6.

“Ang 2022 mao [ang] Tuig nga ang Gubat Mibalik sa Europe.” a

Tan-awa ang artikulong “Ukraine Giatake sa Russia.”

“Mga kanihit sa pagkaon.”—Mateo 24:7.

“2022: Tuig sa Grabeng Kagutom.” b

Tan-awa ang artikulong “Giyera sa Ukraine Nakapasamot sa Krisis sa Pagkaon sa Tibuok Kalibotan.”

“Kamatay.”—Lucas 21:11.

“Ang polio mibalik, nagkadaghan ang kaso sa monkeypox, ug nagpadayon ang COVID-19 nga pandemic. Kini nagpakita kon unsa ka peligroso ang makatakod nga mga sakit ug nga ang mga tawo dali rang matakdan niini.” c

Tan-awa ang artikulong “6 Milyon nga Namatay sa COVID.”

“Makalilisang nga mga talan-awon.”—Lucas 21:11.

“Mga heatwave, hulaw, wildfire, ug baha. Ang ting-init sa 2022 dili gyod malimtan tungod sa daghang kalamidad nga resulta sa grabeng pagkadaot sa klima, diin linibo ang nangamatay ug minilyon sa tibuok kalibotan ang nawad-an ug puy-anan.” d

Tan-awa ang artikulong “Grabeng Pagsaka sa Temperatura sa Tibuok Kalibotan.”

“Mga kagubot [o, “pag-alsa,” footnote].”—Lucas 21:9.

“Kay ang mga tawo nasuko pag-ayo tungod sa mga problema sa ekonomiya, ilabina sa pagsaka sa presyo sa palaliton, dihay nahitabong dagkong pagprotesta batok sa gobyerno sa 2022.” e

Tan-awa ang artikulong “Pagsaka sa Presyo sa mga Palitonon sa Tibuok Kalibotan.”

Unsay mahitabo sunod tuig?

Walay usa nato ang nahibalo kon unsa gyoy mahitabo sa 2023. Pero nahibalo ta nga sa dili madugay, ang Gingharian sa Diyos, o gobyerno sa langit, mohimog dagkong kausaban para sa yuta. (Daniel 2:44) Wagtangon sa maong gobyerno ang hinungdan sa pag-antos sa tawo ug paneguroon niini nga ang kabubut-on sa Diyos matuman dinhi sa yuta.—Mateo 6:9, 10.

Giawhag mo namo nga sundon ang tambag ni Jesu-Kristo ug ‘magpadayon sa pagbantay’ kon sa unsang paagi ang mga hitabo sa kalibotan nagtuman sa tagna sa Bibliya. (Marcos 13:37) Palihog kontaka mi aron makakat-og dugang kon sa unsang paagi ang Bibliya makatabang nimo karon ug kon sa unsang paagi makahatag ni nimo ug sa imong pamilya ug tinuod nga paglaom alang sa mas maayong kaugmaon.

a AP News, “2022 Was Year the Horror of War Returned to Europe,” ni Jill Lawless, Disyembre 8, 2022.

b World Food Programme, “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” ni Lawrence O. Gostin, JD, Septiyembre 22, 2022.

d Earth.Org, “What’s Behind the Record-Breaking Extreme Weather Events of Summer 2022?” ni Martina Igini, Oktubre 24, 2022.

e Carnegie Endowment for International Peace, “Economic Anger Dominated Global Protests in 2022,” ni Thomas Carothers ug Benjamin Feldman, Disyembre 8, 2022.