Di pa dugay, ang mga lider sa kalibotan, siyentista, ug technologist miingon nga dakog mahimo ang artificial intelligence (AI). Ilang giila nga naa ni kaayohan, pero nabalaka pod sila kay puwede ning magamit sa dili maayong paagi.

•   “Ang AI mao ang usa sa pinakakuyaw ug maayo kaayo nga teknolohiya karon, nga makapauswag sa kinabuhi sa tawo . . . Pero tungod niini, posibleng motaas ang risgo sa safety ug security, mabalewala ang atong katungod ug pribasiya, ug malisdan ta sa pagsalig sa democratic nga gobyerno.”—Kamala Harris, vice president sa United States, Mayo 4, 2023.

•   “Bisag ang artificial intelligence (AI) tingali makapauswag sa healthcare sa pipila ka paagi, posible pod nga naa ni dili maayong epekto sa panglawas ug emosyon sa tawo,” misulat ang internasyonal nga grupo sa mga doktor ug health-care expert nga gipangunahan ni Dr. Frederik Federspiel, sa artikulo nga gi-publish niadtong Mayo 9, 2023, sa BMJ Global Health. a

•   “Ang AI puwedeng magamit sa pagpasa ug sayop nga impormasyon. Di madugay, mawad-an nag trabaho ang mga tawo. Ang uban nga konektado sa teknolohiya ang trabaho, nabalaka pag-ayo nga sa umaabot mapameligro sa AI ang mga tawo.”—The New York Times, Mayo 1, 2023.

 Paglabay sa panahon, maklaro ra nato kon ang AI makaayo ba o makadaot sa mga tawo. Unsay giingon sa Bibliya?

 Gipakita sa Bibliya kon nganong ang mga tawo dili makapasalig nga ang bag-ong teknolohiya nga ilang giimbento magamit para sa kaayohan sa tanan.

1.  1. Bisag ang mga tawo naay maayong intensiyon, dili nila makita daan ang negatibong epekto sa ilang binuhatan.

   •   “Naay dalan nga morag husto para sa usa ka tawo, apan kamatayon diay ang dulnganan niana.”—Proverbio 14:12.

2.  2. Ang usa ka tawo walay kontrol kon unsaon paggamit sa uban ang iyang gihimo.

   •   “Ibilin ra nako [ang akong gihimo] sa tawo nga magsunod kanako. Ug kinsay nasayod kon siya ba maalamon o buangbuang? Bisan pa niana, siya ang magdumala sa tanang butang nga akong nabatonan ilalom sa adlaw.”—Ecclesiastes 2:18, 19.

 Gipakita niini nga mga rason kon nganong kinahanglan nato ang giya sa atong Maglalalang.

 Ang atong Maglalalang nagsaad nga dili gyod niya tugotan nga madaot ang yuta o mahanaw ang katawhan tungod sa mga tawo o sa bisan unsang teknolohiya nga ilang gihimo.

•   “Ang yuta magpabilin hangtod sa hangtod.”—Ecclesiastes 1:4.

•   “Ang mga matarong manag-iya sa yuta, ug sila magpuyo niini hangtod sa hangtod.”—Salmo 37:29.

 Pinaagi sa Bibliya, ang atong Maglalalang naghatag ug giya nga moresultag kaugmaon nga malinawon ug may kasegurohan. Aron makakat-on ug dugang kon unsay giingon sa Bibliya, basaha ang artikulong “Naa bay Kasaligang Giya Para sa Maayong Kaugmaon?” ug “Tinuod nga Paglaom Alang sa Mas Maayong Kaugmaon.”