Sa hapit nang mosulod ang mga Israelinhon sa Yutang Saad mga 3,500 ka tuig kanhi, ang Diyos miingon nga panalipdan niya sila batok sa “grabeng mga sakit” nga ilang nahibaloan sa Ehipto. (Deuteronomio 7:15) Ang usa ka paagi nga gihimo niya kini mao ang paghatag kanilag detalyadong mga instruksiyon bahin sa kahinlo ug kon unsaon paglikay ug pagpahunong sa pagkaylap sa mga sakit. Pananglitan:

•   Ang Balaod nagsugo nga kinahanglan silang maligo ug manglaba.​—Levitico 15:4-27.

•   Maylabot sa hugaw sa tawo, ang Diyos miingon: “Paggahin mog pribadong dapit nga inyong magamit sa gawas sa kampo, ug didto mo moadto. Ang ugsok kinahanglang apil sa inyong mga gamit. Kon mopungko mo aron malibang, gamita kini sa pagkalot unya taboni ang inyong tai.”​—Deuteronomio 23:12, 13.

•   Kadtong gituohan nga may makatakod nga sakit gikuwarentinas​—gilain sulod sa usa ka yugto sa panahon. Sa dili pa mobalik, kadtong naayo na kinahanglang manglaba sa ilang sinina ug maligo aron isipon silang ‘hinlo.’​—Levitico 14:8, 9.

•   Kadtong nakahikap ug patayng lawas gikuwarentinas.​—Levitico 5:2, 3; Numeros 19:16.

 Makita diha sa mga balaod sa Israel ang abante kaayong mga ideya bahin sa pagpanambal ug panglantaw bahin sa sanitasyon.

 Sa laing mga lugar, kinaraan kaayo ang sukdanan sa kahinlo. Pananglitan:

•   Ang lainlaing klase sa hugaw gitapok diha sa kadalanan. Tungod sa hugaw nga tubig, kontaminadong pagkaon, ug mga basura, daghan ang nasakit ug daghang bata ang nangamatay.

•   Ang karaang mga doktor gamay ra o wala gyoy nahibaloan bahin sa mga kagaw. Gigamit sa mga Ehiptohanon ingong “tambal” ang dugo sa tabili, iti sa langgam nga pelikano, patayng ilaga, ihi, ug agup-opon nga pan. Ang tai sa tawo ug hayop komon sab nga gigamit sa ilang pagpanambal.

•   Ang karaang mga Ehiptohanon nangasakit tungod sa mga parasito gikan sa hugawng tubig sa Suba sa Nilo ug sa mga irigasyon niini. Daghan sab nga mga masuso ang nangamatay sa kalibang ug sa susamang mga sakit tungod sa kontaminadong pagkaon.

 Sa laing bahin, ang mga Israelinhon nakabenepisyo ug nahimong mas himsog tungod sa pagsunod sa Balaod sa Diyos.