Makatabang ba ang Bibliya nga Mahunong Nimo ang Pagkaadik sa Droga?

I-PLAY

Kada tuig, minilyon ang mamatay tungod sa direkta o dili direktang epekto sa paggamit ug lainlaing substansiya, sama sa pag-abuso sa droga. Panahon sa COVID-19 nga pandemic, kini nga problema mas misamot pa. Ang kaalam sa Bibliya nakatabang sa daghan nga mahunong ang pagkaadik sa droga. Kon nalisdan ka sa paghunong niini, kini nga kaalam makatabang sab nimo. a

Niining artikuloha

Nganong maayo nga magpatabang sa Bibliya aron mahunong ang pagkaadik?

Ang mga researcher nag-ingon nga sagad ang hinungdan sa pagkaadik mao ang stress, kabalaka, depresyon, ug pagbating nag-inusara. Ang Bibliya makatabang sa pagpalig-on sa imong pagtuo nga gikinahanglan aron malamposon nimong maatubang ang mga kalisdanan nga moresulta sa pagkaadik. Gipakita niini kon sa unsang paagi ka masuod sa Diyos. (Salmo 25:14) Sa iyang tabang, maatubang nimo ang mga problema nga morag imposibleng masulbad sa imo lang kaugalingong paningkamot.—Marcos 11:22-24.

Upat ka butang nga giingon sa Bibliya nga imong mahimo aron mahunong ang pagkaadik

1. Ilha si Jehova nga Diyos. b (Juan 17:3) Siya ang Maglalalang ug ang Tinubdan sa walay kataposang gahom. Labaw pa niana, siya ang imong mahigugmaong langitnong Amahan. Gusto niyang makigsuod nimo ug gamiton ang iyang gahom sa pagtabang kanimo. (Isaias 40:29-31; Santiago 4:8) Nagsaad siyag nindot nga kaugmaon para nimo kon dawaton nimo ang iyang gugma.—Jeremias 29:11; Juan 3:16.
2. Pangayog tabang kang Jehova. Pag-ampo sa Diyos ug hangyoa siya nga tabangan kang mahunong ang imong pagkaadik aron mahimo kang “balaan [o, hinlo] ug dalawaton [kaniya].” (Roma 12:1) Pinaagi sa iyang balaang espiritu, o aktibong puwersa, hatagan ka niyag “gahom nga labaw sa kasarangan.” (2 Corinto 4:7; Lucas 11:13) Kini nga gahom motabang nimo nga mahunong ang pag-abuso sa droga ug maugmad ang “bag-ong personalidad” nga uyon sa iyang kabubut-on.—Colosas 3:9, 10.
3. Pun-a ang imong hunahuna sa hunahuna sa Diyos. (Isaias 55:9) Iya kang tabangan sa ‘pagbag-o sa imong panghunahuna,’ o sa pagbag-o sa imong paagi sa paghunahuna nga makatabang nimo nga mahunong ang pagkaadik. (Efeso 4:23) Ang hunahuna sa Diyos naa sa Bibliya, busa importante nga regular nimo ning basahon. (Salmo 1:1-3) Daghan ang nakabenepisyo kay naay mitabang nila nga masabtan ang gitudlo sa Bibliya. (Buhat 8:30, 31) Ang mga Saksi ni Jehova nagtanyag ug libreng interactive nga pagtuon sa Bibliya. Giimbitar sab ka namo sa pagtambong sa among mga tigom, diin among ginasusi ang giingon sa Bibliya ug kon unsaon namo pagpadapat ang mga pagtulon-an niini.
4. Pagpilig maayong mga kauban. Ang imong mga higala dakog impluwensiya kon mahunong ba nimo o dili ang pagkaadik. (Proverbio 13:20) Ang mga nagsimba sa Diyos maoy maayong mga kauban, ug gusto niya nga makabenepisyo ka sa pagpakighigala kanila. (Salmo 119:63; Roma 1:12) Pilia sab ang imong kalingawan, kay sama rag nakig-uban ka sa mga karakter nga imong gitan-aw, gipaminaw, o gibasa. Likayi ang bisan unsa nga makapahuyang sa imong determinasyon sa pagbuhat kon unsay husto.—Salmo 101:3; Amos 5:14.

Mga teksto sa Bibliya nga makatabang nimo aron mahunong ang pagkaadik

Salmo 27:10: “Bisan pag biyaan ko sa akong amahan ug inahan, si Jehova mismo magsagop kanako.”

“Wala gyod nako mailhi ang akong tinuod nga amahan, maong mibati kog kahaw-ang. Dihang nailhan nako si Jehova nga Diyos ingong tinuod nga Persona nga nahigugma gyod nako, naa nay katuyoan ang akong kinabuhi ug nahunong nako ang pagkaadik.”—Wilby, taga-Haiti.

Salmo 50:15: “Tawga ko panahon sa kasakitan. Luwason ka nako.”

“Kini nga teksto pirmeng mohatag nakog kusog nga dili mosurender, bisan dihang madala ko sa tentasyon. Gituman ni Jehova ang iyang saad.”—Serhiy, taga-Ukraine.

Proverbio 3:5, 6: “Salig kang Jehova sa bug-os nimong kasingkasing, ug ayawg salig sa kaugalingon nimong pagsabot. Sa tanan nimong dalan konsideraha siya, ug tul-iron niya ang imong mga agianan.”

“Kini nga teksto nagtabang nako nga mosalig, dili sa akong kaugalingon, kondili kang Jehova. Pinaagi sa iyang kusog, bug-os nakong nabag-o ang akong kinabuhi.”—Michele, taga-Italy.

Isaias 41:10: “Ayawg kahadlok, kay ako nagauban kanimo. Ayawg kabalaka, kay ako imong Diyos. Ako magpalig-on kanimo, oo, ako magtabang kanimo. Ako magahawid gayod kanimo sa akong tuong kamot sa pagkamatarong.”

“Lain kaayo ang akong bation kon di ko makadroga. Kini nga teksto nagkombinsir nako nga tabangan ko sa Diyos nga mawala na nga pagbati, ug iya gyod nang gihimo.”—Andy, taga-South Africa.

1 Corinto 15:33: “Ayawg pahisalaag. Ang daotang pakig-uban makadaot sa mapuslanong pamatasan.”

“Nakakat-on ko sa pagdroga tungod sa dili maayong mga kauban ug naadik ko. Nahunong lang nako ang akong bisyo dihang wala na ko makig-uban nila ug nakighigala ko sa hinlong mga tawo nga maayog pagkinabuhi.”—Isaac, taga-Kenya.

2 Corinto 7:1: “Hinloan nato ang atong kaugalingon sa tanang kahugawan sa unod ug espiritu.”

“Ang maong mga pulong nagdasig nako nga padayong maningkamot nga hinloan ang akong lawas ug hunongon ang pagkaadik ug ang paghimo sa mga butang nga nakadaot nako.”—Rosa, taga-Colombia.

Filipos 4:13: “Naa koy kusog sa pag-atubang sa tanang butang tungod kaniya nga naghatag nakog gahom.”

Nahibalo ko nga dili nako kayang hunongon ang pagdroga kon ako lang, busa nag-ampo ko sa Diyos nga tabangan ko niya. Gihatagan ko niyag kusog nga akong gikinahanglan.”—Patrizia, taga-Italy.

Dugang nga mga eksperyensiya: Nahunong ang pagkaadik sa tabang sa Bibliya

Si Joseph Ehrenbogen nagdako sa lugar nga daghag bayolente ug naadik sa alkoholikong ilimnon, tabako, marijuana, ug heroin. Kadaghan siyang hapit mamatay tungod sa overdose. Usa ka teksto sa Bibliya ang nakapakombinsir niya nga puwede siyang magbag-o. Basaha ang iyang kaagi sa artikulong “Gitahod na Nako ang mga Babaye ug ang Akong Kaugalingon.”

Si Dmitry Korshunov kadaghan napakyas sa paghunong sa iyang pagkaadik sa alkoholikong ilimnon. Tan-awa ang video nga ‘Gilaay Na Ko sa Akong Kinabuhi’ aron makita kon unsay nakatabang niya nga molampos.

Sorry, dili moobra ang media player.I-download Kini nga Video

Gidili ba sa Bibliya ang pagpatambal aron mahunong ang pagkaadik?

Wala. Ang Bibliya nag-ingon: “Ang mga tawong himsog wala magkinahanglag doktor, apan kadto lang mga masakiton.” (Mateo 9:12) Sa susama, ang U.S. National Institute on Drug Abuse nag-ingon: “Ang pagkaadik sa droga maoy komplikadong sakit, ug ang pag-undang sagad nagkinahanglan ug labaw pa kay sa maayong intensiyon o pagpugong sa kaugalingon.” Siyempre, ang tabang nga ihatag sa Diyos mas puwersado kay sa determinasyon sa usa. Pero daghan niadtong nakabiya sa pagkaadik pinaagi sa pagsunod sa tambag sa Bibliya nagkinahanglan pod ug medikal nga tabang. c Pananglitan, ang lalaki nga si Allen nahinumdom: “Dihang miundang kog inom ug alkoholikong ilimnon, lain kaayo ang akong pamati sa lawas. Maong nakahunahuna ko nga nagkinahanglan kog medikal nga tabang gawas pa sa espirituwal nga tabang.”

Gidili ba sa Bibliya ang paggamit ug droga sa medikal nga paagi?

Wala. Gani, gihisgotan sa Bibliya nga ang alkoholikong ilimnon magamit sa pagtambal ug sakit o aron mamenosan ang pag-antos sa usa nga himalatyon. (Proverbio 31:6; 1 Timoteo 5:23) Pero sama sa alkoholikong ilimnon, ang mga droga nga gigamit aron mamenosan ang kasakit makaadik pag-ayo. Busa, maalamon nga hunahunaon ang potensiyal nga kapeligrohan ug mag-amping pag-ayo sa paggamit ug mga painkiller nga nagkinahanglan ug reseta.—Proverbio 22:3.

a Bisag kini nga artikulo nagpokus kon unsay himoon aron mahunong ang pagkaadik sa droga, ang gihisgotan nga mga prinsipyo sa Bibliya makatabang sab niadtong naay ubang problema, sama sa pagkaadik sa alkoholikong ilimnon, tabako, pagkaon, sugal, pornograpiya, o social media.

b Jehova ang personal nga ngalan sa Diyos. (Salmo 83:18) Tan-awa ang artikulo nga “Kinsa si Jehova?”

c Daghang treatment center, ospital, ug recovery program ang makatabang. Angayng susihon pag-ayo sa matag usa ang mga kapilian ug siyay modesisyon kon unsa ang pinakamaayong paagi sa pagtambal.—Proverbio 14:15.