Sa tibuok kalibotan, daghan ang naapektohan sa grabeng mga pagbaha. Matikdi ni nga mga report:

•   “Sa milabayng mga adlaw, narekord ang pinakakusog nga pag-ulan sa capital sa China sulod sa 140 ka tuig. Gikan sa Sabado hangtod Miyerkoles, 744.8 milimetros (29.3 inches) nga ulan ang mibundak.”—AP News, Agosto 2, 2023.

•   “Ang bagyong Khanun nagdalag kusog kaayong ulan ug hangin sa southern Japan sulod na sa duha ka adlaw, niining Huwebes, ug labing menos duha ka tawo ang namatay. . . . Gidahom nga ang ulan moabot ug 0.6 metros (2 feet) sa kabukiran sa central Taiwan.”—Deutsche Welle, Agosto 3, 2023.

•   “Gibaha niadtong weekend [ang Nova Scotia] tungod sa kusog kaayong pag-ulan sa rehiyon sa Atlantic Canada. Kini ang pinakakusog nga pag-ulan nga narekord sulod sa 50 ka tuig.”—BBC News, Hulyo 24, 2023.

 Unsay giingon sa Bibliya bahin niini nga mga hitabo?

 Gipakita sa Bibliya nga nagkinabuhi na ta sa panahon nga gitawag ug “kataposang mga adlaw.” (2 Timoteo 3:1) Gitagna ni Jesus nga makakita tag “makalilisang nga mga talan-awon,” o makahahadlok nga mga hitabo, sa atong panahon. (Lucas 21:11) Tungod sa climate change mas kanunay, mas grabe, ug mas kalit nga mahitabo ang makahahadlok nga mga kausaban sa klima.

 Ang Bibliya nag-ingon nga ang daghang makahahadlok nga butang nga nagakahitabo sa yuta karon naghatag natog rason nga molaom. Ngano? Si Jesus miingon: “Dihang makita ninyo nga nagakahitabo na kining mga butanga, makaseguro mo nga duol na ang Gingharian sa Diyos.”—Lucas 21:31; Mateo 24:3.

 Ang mga hitabo karon nagpaila nga sa dili madugay bug-os nang kontrolahon sa Gingharian sa Diyos ang natural nga kinaiyahan sa yuta, apil ang water cycle.—Job 36:27, 28; Salmo 107:29.

 Aron mahibalog dugang kon sa unsang paagi ayohon sa Gingharian sa Diyos ang yuta, tan-awa ang artikulong “Kinsay Makasalbar sa Yuta?”