Unsay Giingon sa Bibliya Bahin sa Kanihit sa Pagkaon Karon?

I-PLAY

“Wala nay kagutom.” Mao ni ang goal sa mga lider sa kalibotan bahin sa usa sa kinadak-ang problema karon—ang pagtaganag pagkaon para sa tanan. a Pero moabot pa kaha ang panahon nga wala nay kagutom? Unsay giingon sa Bibliya?

Gitagna sa Bibliya ang kanihit sa pagkaon karon

Ang Bibliya nagtagna bahin sa kanihit sa pagkaon nga mahitabo sa atong panahon, nga gitawag ug “kataposang mga adlaw.” (2 Timoteo 3:1) Ang Diyos dili maoy hinungdan sa kanihit sa pagkaon, pero naghatag siyag pasidaan bahin niini. (Santiago 1:13) Matikdi ang duha ka tagna sa Bibliya.

“Duna unyay mga kanihit sa pagkaon . . . sa lainlaing dapit.” (Mateo 24:7) Gipakita niini nga tagna nga mahitabo ang kagutom sa daghang lugar. Gani, di pa dugay, ang mga tig-monitor sa suplay sa pagkaon mireport: “Mas migrabe ang kagutom, kakulang sa pagkaon, ug malnutrisyon bisan pa sa mga paningkamot nga sulbaron kini.” b Gatosan ka milyong tawo sa lainlaing nasod ang walay makaon. Makapaguol, daghan nila ang nangamatay.

“Tan-awa! usa ka itom nga kabayo, ug ang nagsakay niini naggunit ug timbangan.” (Pinadayag 6:5) Niini nga tagna, ang kabayo ug ang nagsakay niini nagsimbolo sa kagutom sa kataposang mga adlaw. c Ang timbangan maoy gamiton sa pagtimbang sa gamayng rasyon sa pagkaon. Samtang nagsakay ang mangangabayo, usa ka tingog ang nagpahibalo nga mosaka pag-ayo ang presyo sa pagkaon ug gipasidan-an ang mga tawo nga dili mag-usik-usik ug pagkaon. (Pinadayag 6:6) Mao gyod ni ang nagakahitabo karon sa tibuok kalibotan. Tungod sa krisis sa pagkaon, binilyong tawo ang dili makakita o makapalit ug sustansiyadong pagkaon.

Kon sa unsang paagi matapos ang kanihit sa pagkaon

Ang mga eksperto nag-ingon nga ang atong planeta maka-produce ug igong pagkaon para sa tanang tawo, gani sobrasobra pa. Kon mao, nganong naa gihapoy kanihit sa pagkaon? Ug unsay giingon sa Bibliya nga himoon sa atong Maglalalang, si Jehova, d aron masulbad ni nga problema?

Problema: Dili kayang wad-on sa gobyerno ang kapobrehon ug dili patas nga ekonomiya, nga maoy hinungdan nga daghang tawo ang gigutom.

Solusyon: Ang dili perpektong gobyerno sa tawo pulihan sa usa ka perpektong gobyerno, ang Gingharian sa Diyos. (Daniel 2:44; Mateo 6:10) Tungod sa kapobrehon, daghan karon ang dili makapalit ug pagkaon. Pero sulbaron ni sa Gingharian sa Diyos. Ang Bibliya nag-ingon bahin kang Jesu-Kristo, ang Hari sa Gingharian sa Diyos: “Luwason niya ang kabos nga nagtuaw alang sa tabang, ingon man ang timawa ug si bisan kinsa nga walay magtatabang. . . . Duna unyay dagayang lugas sa yuta; mosugwak unya kini sa tumoy sa kabukiran.”—Salmo 72:12, 16.

Problema: Ang mga giyera makapahinabog kadaot ug pagkahugno sa ekonomiya, maong apektado ang suplay ug distribusyon sa pagkaon.

Solusyon: “Gipahunong [ni Jehova] ang mga gubat sa tibuok yuta. Gibali niya ang pana ug giputolputol ang bangkaw; gisunog niya ang mga karomata nga panggubat.” (Salmo 46:9) Wagtangon sa Diyos ang mga hinagiban sa giyera ug laglagon niya ang mga tawo nga nagpahinabog giyera. Ingong resulta, ang mga tawo dili na maglisod sa pagkuhag pagkaon ug mabatonan nila kini sa safe nga paagi. Ang Bibliya nagsaad: “Molambo ang matarong, ug ang pakigdait modagaya.”—Salmo 72:7.

Problema: Tungod sa grabeng pagkadaot sa klima ug mga kalamidad, nangadaot ang mga tanom ug nangamatay ang binuhing mga hayop.

Solusyon: Kontrolahon sa Diyos ang mga puwersa sa kinaiyahan, maong dili na maapektohan ang produksiyon sa pagkaon. Ang Bibliya nag-ingon: “Gipalurang [ni Jehova] ang unos; ang mga balod sa dagat milinaw. . . . Ang desyerto himoon niyang mga linaw sa tubig nga punog tangbo, ug ang uga nga yuta himoon niyang mga tubod sa tubig. Ipahinabo niya nga magpuyo didto ang mga gigutom . . . Magpugas silag mga binhi ug magtanom ug mga punoan sa ubas nga dagayang mamunga.”—Salmo 107:29, 35-37.

Problema: Tungod sa hakog ug korap nga mga tawo, naay mga pagkaon nga dili safe kaonon o dili makaabot sa mga nanginahanglan.

Solusyon: Wad-on sa Gingharian sa Diyos ang tanang dili matinud-anon ug korap nga mga tawo. (Salmo 37:10, 11; Isaias 61:8) Ang Bibliya nag-ingon nga si Jehova nga Diyos “ang Usa nga nagahatag ug hustisya sa mga gitikasan, ang Usa nga nagahatag ug pagkaon sa mga gigutom.”—Salmo 146:7.

Problema: Kada tuig, mga 33 porsiyento sa suplay sa pagkaon sa tibuok kalibotan ang nausik o nawala.

Solusyon: Ubos sa Gingharian sa Diyos, ang suplay sa pagkaon maatiman na sa hustong paagi. Sa dinhi pa si Jesus sa yuta, gilikayan niya ang pag-usik-usik ug pagkaon. Pananglitan, dihay higayon nga milagroso niyang gipakaon ang kapig 5,000 ka tawo. Dayon, giingnan niya ang iyang mga tinun-an: “Hiposa ang sobra aron walay mausik.”—Juan 6:5-13.

Kay wad-on na sa Gingharian sa Diyos ang mga hinungdan sa kagutom, ang tanang tawo makabaton nag abunda ug sustansiyadong pagkaon. (Isaias 25:6) Aron mahibalo kon kanus-a ni himoon sa Gingharian sa Diyos, tan-awa ang artikulong “Kanus-a Magmando sa Yuta ang Gingharian sa Diyos?”

a Ang 2030 nga Agenda for Sustainable Development, nga gisuportahan sa tanang United Nations Member States niadtong 2015.

b Report sa Food and Agriculture Organization of the United Nations, International Fund for Agricultural Development, United Nations Children’s Fund, United Nations World Food Programme, ug World Health Organization.

c Aron mahibalog dugang bahin sa upat ka mangangabayo sa Pinadayag, basaha ang artikulong “Kinsa ang Upat ka Mangangabayo?”

d Jehova ang personal nga ngalan sa Diyos. (Salmo 83:18) Tan-awa ang artikulong “Kinsa si Jehova?”