Niadtong Mayo 19, 2022, ang United Nations Security Council nakadawat ug report gikan sa kapig 75 ka taas nga mga opisyales. Kini nag-ingon nga “ang krisis sa pagkaon sa tibuok kalibotan, nga misamot tungod sa COVID-19 nga pandemic ug sa climate change, posibleng moresulta pa gyod sa kagutom tungod sa giyera sa Ukraine.” Ang The Economist miingon pod nga “tungod sa giyera, mas daghan pang tawo ang gutmon sa kalibotan nga puno nag problema.” Gitagna na sa Bibliya nga mahitabo ang krisis sa pagkaon sa atong panahon. Pero naghatag pod nig praktikal nga mga tambag nga makatabang nato sa pag-atubang niana.

•    Si Jesus mitagna: “Ang nasod makiggubat batok sa nasod ug ang gingharian batok sa gingharian, ug duna unyay mga kanihit sa pagkaon.”—Mateo 24:7.

•    Ang basahon sa Pinadayag naghisgot ug upat ka simbolikong mangangabayo. Ang usa niana nagsimbolo sa giyera. Dayon gisundan siya sa laing mangangabayo nga nagsimbolo sa kagutom, sa panahon nga ang pagkaon limitado rag suplay ug mahal kaayo. “Ug nakita ko ang kabayo nga itom. Ang nagasakay niini may gikuptan nga timbangan. Ug may nadungog ako nga morag tingog . . . nga nagaingon, ‘Pamahala ang ilang pagkaon. Ang bili sa tulo ka salmon nga harina sa trigo balig usa ka adlaw nga suhol, ug ang usa ka gantang nga harina nga barley balig usa usab ka adlaw nga suhol.’”—Gipadayag 6:5, 6, Ang Pulong sa Dios.

 Ang krisis sa pagkaon nga gitagna sa Bibliya nagakahitabo na sa atong panahon, nga gitawag sa Bibliya ug “kataposang mga adlaw.” (2 Timoteo 3:1) Aron mahibalog dugang bahin sa kataposang mga adlaw ug sa upat ka mangangabayo diha sa Pinadayag, tan-awa ang video nga Ang Kalibotan Nausab Sukad Niadtong 1914 ug basaha ang artikulo nga “Kinsa ang Upat ka Mangangabayo?”

•    Ang Bibliya naay praktikal nga mga tambag nga makatabang nato dihang mag-atubang ug lisod nga mga situwasyon, sama sa pagsaka sa presyo sa pagkaon o kakulang ug pagkaon. Tan-awa ang pipila niini nga mga tambag sa artikulo nga “Kon Unsay Himoon Dihang Mogamay ang Kita.”

•    Ang Bibliya naghatag pod natog paglaom nga masulbad ra ang maong mga problema. Nagsaad ni nga moabot ang panahon nga “duna unyay dagayang lugas sa yuta” ug ang tanan mag-enjoy sa daghang pagkaon. (Salmo 72:16) Aron mahibalog dugang bahin sa paglaom nga gisaad sa Bibliya ug kon nganong makasalig ta niana, basaha ang artikulo nga “Tinuod nga Paglaom Alang sa Mas Maayong Kaugmaon.”