Kada tuig, tinagpulo ka libong linog ang mahitabo. Bisag ang kadaghanan hinay ra, naay dagkong linog nga makapahinabog kadaot, pag-antos, ug kamatayon. Usahay, makapahinabo nig mga tsunami nga makahatag ug grabeng kadaot sa mga lugar nga duol sa dagat. Ingong resulta, daghan nga nagpuyo niining mga lugara ang mamatay. Gitagna ba sa Bibliya kining dagkong linog?

Niining artikuloha

•  Gitagna ba sa Bibliya ang mga linog?

•  Ang mga linog ba nga nahitabo karon maoy katumanan sa tagna sa Bibliya?

•  Unsay gipasabot sa tagna sa Bibliya bahin sa mga linog para kanato?

•  Sayop nga mga ideya bahin sa tagna sa Bibliya ug mga linog

 Gihisgotan ni Jesus ang mga linog diha sa usa ka tagna nga narekord sa Bibliya. Mabasa nato ni sa mosunod nga tulo ka basahon sa Bibliya:

 “Ang nasod makiggubat batok sa nasod ug ang gingharian batok sa gingharian, ug duna unyay mga kanihit sa pagkaon ug mga linog sa lainlaing dapit.”—Mateo 24:7.

 “Ang nasod makiggubat batok sa nasod ug ang gingharian batok sa gingharian. Duna unyay mga linog sa lainlaing dapit, ug mga kanihit sa pagkaon.”—Marcos 13:8.

 “Duna unyay dagkong linog, mga kanihit sa pagkaon, ug kamatay sa lainlaing dapit.”—Lucas 21:11.

 Busa gitagna ni Jesus nga ang “dagkong linog” mahitabo “sa lainlaing dapit” sa panahon dihang mahitabo pod ang mga gubat, kanihit sa pagkaon, ug kamatay. Kon mahitabo ning tanan, klaro nga naa na ta sa “hinapos sa sistema sa mga butang,” o “kataposang mga adlaw.” (Mateo 24:3; 2 Timoteo 3:1) Sumala sa kronolohiya sa Bibliya, ang “kataposang mga adlaw” nagsugod sa 1914 ug wala pa matapos.

 Oo. Nakita nato nga ang tagna ni Jesus, apil na ang iyang giingon bahin sa mga linog, nahitabo sa atong panahon. Sukad sa 1914, duna nay kapig 1,950 ka dagkong linog, nga miresulta sa kamatayon sa kapig duha ka milyong tawo. a Tagda ang pipila sa mga linog nga nahitabo sa milabayng mga tuig.

 2004—Indian Ocean. Ang 9.1-magnitude nga linog nagpahinabog tsunami nga nakaapektar sa daghang nasod ug nakapatayg mga 225,000 ka tawo.

 2008—China. Ang 7.9-magnitude nga linog nagpahinabog kadaot sa mga baryo ug lungsod, ug gibanabana nga 90,000 ang namatay, mga 375,000 ang na-injured, ug minilyon ang nawad-ag balay.

 2010—Haiti. Ang 7.0-magnitude nga linog nga gisundan sa daghang kusog nga mga aftershock nakakalas sa kinabuhi sa kapig 300,000 ka tawo ug kapig usa ka milyon ang nawad-ag balay.

 2011—Japan. Ang 9.0-magnitude nga linog ug ang mga tsunami nga nahitabo ingong resulta niana nakakalas sa kinabuhi sa mga 18,500 ka tawo ug gatosan ka libo ang nawad-ag balay. Ang Fukushima power plant naguba, ug tungod niini nag-leak ang peligrosong radiation. Napulo ka tuig sa ulahi, mga 40,000 ka tawo ang wala pa makabalik sa ilang mga pinuy-anan nga duol sa power plant tungod sa taas nga lebel sa peligrosong radiation.

 Ang tagna sa Bibliya bahin sa mga linog nagpasidaan nato kon unsay mahitabo sa umaabot. Si Jesus miingon: “Dihang makita ninyo nga nagakahitabo na kining mga butanga, makaseguro mo nga duol na ang Gingharian sa Diyos.”—Lucas 21:31.

 Ang Bibliya nag-ingon nga ang Gingharian sa Diyos maoy tinuod nga gobyerno sa langit diin si Jesu-Kristo ang Hari. Kini nga Gingharian ang gitudlo ni Jesus sa iyang mga sumusunod nga iampo.—Mateo 6:10.

 Dihang magmando na sa yuta ang Gingharian sa Diyos, wad-on sa Diyos ang mga kalamidad, apil na ang mga linog. (Isaias 32:18) Dugang pa, iyang ayohon ang pisikal ug emosyonal nga kadaot nga gipahinabo sa mga linog karon. (Isaias 65:17; Pinadayag 21:3, 4) Alang sa dugang impormasyon, basaha ang artikulong “Unsay Himoon sa Gingharian sa Diyos?”