Niadtong Dominggo, Nobyembre 20, 2022, ang COP27 United Nations Climate Change Conference natapos. Sa maong conference, naporma ang importanteng kasabotan nga hatagag pinansiyal nga tabang ang mas pobreng mga nasod dihang maigo kinig kalamidad nga resulta sa climate change. Bisan pa niana, daghan ang miingon nga dili ni makasulbad sa problema sa climate change.

•   “Nalipay ko sa desisyon nga maggahig pondo para niadtong nag-antos tungod sa climate change,” miingon si António Guterres, secretary-general sa United Nations, niadtong Nobyembre 19, 2022. “Pero klaro nga dili ni igo … Kritikal gihapon ang kahimtang sa atong planeta.”

•   “Ang kalibotan nameligro gihapon tungod sa climate change.”—Mary Robinson, kanhing presidente sa Ireland ug kanhing UN High Commissioner for Human Rights, Nobyembre 20, 2022.

 Ang mga batan-on ilabinang nabalaka sa kaugmaon sa atong planeta. Pero posible bang magtinabangay ang mga nasod ug tumanon nila ang ilang saad nga sulbaron ang climate change? Unsay giingon sa Bibliya?

 Gipakita sa Bibliya nga bisan pa sa mga paningkamot sa mga gobyerno, dili nila bug-os masulbad ang problema sa climate change. Matikdi ang duha ka rason:

•   “Ang baliko dili na matul-id.”—Ecclesiastes 1:15.

   Kahulogan: Limitado ra ang mahimo sa mga gobyerno kay ang mga tawo wala lalanga nga magmando sa kaugalingon. (Jeremias 10:23) Bisag magkahiusa pa ang mga nasod ug maningkamot sila pag-ayo, dili gihapon nila masulbad ang mga problema sa kalibotan.

•   “Kay ang mga tawo unya mahigugmaon sa kaugalingon, mahigugmaon sa kuwarta, … dili ikasabot.”—2 Timoteo 3:2, 3.

   Kahulogan: Tukmang gitagna sa Bibliya nga daghan sa atong panahon ang maghunahuna ra sa kaugalingon ug dili gustong motabang para sa kaayohan sa tanan.

 Pero ang kaugmaon sa atong planeta wala magdepende sa mga saad sa gobyerno sa tawo. Ang Diyos nagtaganag maayo kaayong Magmamando sa kalibotan, si Jesu-Kristo. Bahin niya, ang Bibliya nag-ingon:

•   “Ang gobyerno maanaa sa iyang abaga. Ang iyang ngalan tawgong Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait.”—Isaias 9:6, footnote.

 Si Jesus ang Hari sa Gingharian sa Diyos, o gobyerno sa langit. (Mateo 6:10) Siya naay gahom, kaalam, ug tinguha sa pag-atiman sa atong planeta ug sa mga nagpuyo niini. (Salmo 72:12, 16) Ubos sa iyang pagmando, laglagon niini nga gobyerno sa langit kadtong “nagadaot sa yuta” ug ipahinabo niini nga mabalik ang maayong kahimtang sa atong planeta.—Pinadayag 11:18, footnote; Isaias 35:1, 7.

 Aron mahibalog dugang bahin sa kinamaayohang solusyon sa climate change, basaha ang artikulong “Climate Change ug ang Atong Kaugmaon—Unsay Giingon sa Bibliya?”