Dihang mawad-an kag trabaho, dili lang ka mamroblema sa pinansiyal. Apektado pod ang imong pamilya, emosyon, ug hunahuna. Niay pipila ka sugyot nga gibase sa mga prinsipyo sa Bibliya nga makatabang nimo.

•   Isulti ngadto sa uban ang imong gibati.

   Ang giingon sa Bibliya: “Ang tinuod nga higala magpakitag gugma sa tanang panahon.”—Proverbio 17:17.

   Dihang mawad-an kag trabaho, basig maguol ka, masuko, maglibog, o mobati nga pakyas ka. Pero kon isulti nimo sa imong pamilya ug suod nga mga higala ang imong gibati, makatabang sila nga mogaan ang imong gibati. Basig makahatag pod sila ug praktikal nga mga tambag nga makatabang nimo sa pagpangitag bag-ong trabaho.

•   Likayi ang sobrang pagkabalaka.

   Ang giingon sa Bibliya: “Ayaw gayod kabalaka bahin sa sunod nga adlaw, kay ang matag adlaw dunay kaugalingong mga kabalaka.”—Mateo 6:34.

   Gidasig ta sa Bibliya nga abanteng magplano. (Proverbio 21:5) Pero gitambagan pod ta nga likayan ang sobrang pagkabalaka bahin sa umaabot. Sagad, mabalaka ta sa mga butang nga dili ra man diay mahitabo. Mas maayong magpokus sa imong mahimo karon.

   Naay praktikal nga mga tambag ang Bibliya nga makatabang nimo kon na-stress ka. Aron mahibalog dugang, basaha ang artikulo nga “Kon Unsay Himoon Dihang Ma-stress.”

•   I-adjust ang imong paggasto.

   Ang giingon sa Bibliya: “Makamao kong magkinabuhi sa kawalad-on ug magkinabuhi sa kaabunda.”—Filipos 4:12.

   Pag-adjust sa imong kahimtang karon. Apil niini ang pag-usab sa imong galastohan aron dili ni molapas sa imong badyet. Likayi ang pagpangutang nga wala kinahanglana.—Proverbio 22:7.

   Para sa dugang sugyot kon unsaon nimo pag-adjust sa imong pinansiyal nga kahimtang karon, basaha ang artikulo nga “Kon Unsay Himoon Dihang Mogamay ang Kita.”

•   Gamita ang imong panahon sa maayong paagi.

   Ang giingon sa Bibliya: “Padayon sa pagkinabuhi nga maalamon . . . , nga gamiton ang inyong panahon sa kinamaayohang paagi.”—Colosas 4:5.

   Bisag wala na kay eskedyul nga mosulod sa trabaho, paghimo gihapon ug eskedyul sa imong mga himoonon. Makatabang na nga mapadayon nimo ang imong maayong rutina ug mobati nga naa kay nahimo.

•   Sulayi ang ubang trabaho.

   Ang giingon sa Bibliya: “Ang tanang paghago naay kaayohan.”—Proverbio 14:23.

   Mahimong andam nga modawat ug trabaho bisag lahi ni sa imong trabaho kaniadto. Basig puwede nimong konsiderahon ang mga trabaho nga morag ubos o mas gamay ug suweldo.

•   Ayawg hunong sa pagpangitag trabaho.

   Ang giingon sa Bibliya: “Sa buntag ipugas ang imong binhi ug ayaw papahulaya ang imong kamot hangtod sa gabii; kay wala ka masayod kon hain niini ang magmalamposon.”—Ecclesiastes 11:6.

   Padayon sa pagpangitag trabaho. Sultihi ang uban nga nangita kag trabaho. Sultihi ang imong mga paryente, kaila, kauban sa trabaho sa una, ug mga silingan. Pangutana sa mga employment agency, pagbasag mga advertisement sa newspaper o poster nga nag-offer ug trabaho, ug tan-awa ang website sa mga kompaniya kay basig nangita silag mga aplikante. Dahoma nga daghan kag adtoon nga mga job interview ug i-submit nga mga résumé sa dili pa ka makakitag trabaho.