Panahon sa gubat sa Ukraine, daghang Kristohanong lider sa relihiyon ang nagdasig sa mga tawo nga mosuportar sa gubat. Matikdi kon sa unsang paagi gipakita nila ang ilang suporta niadtong mga nakigbahin sa gubat:

•   “Angay gyong hatagag dakong pasidungog ug pagpasalamat ang tanang sundalo nga midepensa sa Ukraine batok sa mga kaaway … Kanunay ming kinasingkasing nga nag-ampo ug nagsuportar kaninyo.”—Metropolitan Epiphanius I sa Kyiv, sumala sa report sa The Jerusalem Post, Marso 16, 2022.

•   “Ang lider sa Russian Orthodox Church nagpahigayog relihiyosong programa sa Dominggo para sa mga sundalo sa Russia. Iya silang gidasig nga depensahan ang ilang nasod samtang nagpadayon ang pagpakiggubat sa Moscow batok sa Ukraine, kay matod niya ‘mga Russian lang ang makahimo niini.’”—Reuters, Abril 3, 2022.

 Angay bang makiggubat ang mga Kristohanon? Unsay giingon sa Bibliya?

 Ang Bibliya nagpakita nga kadtong tinuod nga mga sumusunod ni Jesu-Kristo dili makiggubat.

•   “Ibalik ang imong espada sa sakoban, kay ang tanang mogamit sa espada mamatay sa espada.”—Mateo 26:52.

   Ang tawo ba nga makiggubat o mouyon niana nagsunod sa sugo ni Jesus?

•   “Hatagan mo nakog bag-ong sugo, nga kamo maghigugmaay; sama sa akong paghigugma kaninyo, kamo usab maghigugmaay. Kon kamo dunay gugma sa usag usa, ang tanan makaila nga kamo akong mga tinun-an.”—Juan 13:34, 35.

   Ang tawo ba nga nagsuportar sa gubat nagpakita sa gugma nga giingon ni Jesus nga maoy ilhanan sa iyang mga tinun-an, o sumusunod?

 Para sa dugang impormasyon, basaha ang artikulong “Husto Bang Mag-apil-apil sa Gubat ang mga Kristohanon?”

 Makataronganon ba ang pagdahom nga ang mga Kristohanon dili mag-apil-apil sa gubat karon? Oo. Gitagna sa Bibliya nga sa atong panahon, nga gitawag ug “kataposang mga adlaw,” duna unyay mga tawo gikan sa tanang nasod nga dili na “magkat-on sa pagpakiggubat,” nga nahiuyon sa gitudlo ni Jesus.—Isaias 2:2, 4, footnote.

•   Para sa dugang impormasyon, basaha ang artikulo sa Bantayanang Torre nga nag-ulohang “Unsay Panglantaw sa Diyos Bahin sa Gubat?”

 Sa dili madugay, gamiton ni Jehova, a “ang Diyos sa kalinaw,” ang iyang langitnong gobyerno aron luwason ang mga tawo “gikan sa pagdaogdaog ug kapintasan.”—Filipos 4:9; Salmo 72:14.

•   Aron mahibaloan kon sa unsang paagi himoon na sa Diyos, tan-awa ang video nga Unsa ang Gingharian sa Diyos?