Usa ka ba sa minilyon nga naapektohan sa grabeng pagkadaot sa klima? Dunay lainlaing klase sa dili maayong klima ug lainlain sab ang kadaot nga ipahinabo niini. Ang buhawi ug kusog nga bagyo sagad magpahinabog tsunami, pagbaha, o kadaot sa palibot. Ang kusog kaayo nga ulan mahimong moresultag landslide, ug ang unos makapatunghag kilat nga magpahinabog grabeng wildfire. Ang hulaw, grabeng kainit, ug bagyo panahon sa tingtugnaw makapahinabo sab ug grabeng kadaot.

 Sa daghang lugar sa kalibotan, nagkadaghan ug nagkagrabe ang mga kalamidad. Ang International Federation of Red Cross and Red Crescent Societies nag-ingon: “Nagkadaghan ang mga tawo nga naapektohan sa mga kalamidad. Tungod na kay pirme nang magbaha, magbagyo, ug maghulaw. Ingong resulta, kada tuig daghan ang mangamatay, ang uban dili na makapanginabuhi, ug minilyon ang mawad-ag balay.”

 Sa maong mga panghitabo, ang mga tawo mag-antos dili lang sa pisikal kondili sa emosyonal sab. Nag-antos sila kay nawad-an silag kabtangan, balay, o namatyan pa ganig minahal.

 Kon nag-antos ka sa mga epekto sa grabeng pagkadaot sa klima, ang Bibliya makatabang nimo sa pagsagubang. Kini nagtaganag paghupay, paglaom, ug praktikal nga tambag, nga nakatabang sa minilyon nga naapektohan sa mga kalamidad tungod sa dili maayong klima. (Roma 15:4) Naghatag sab nig tubag sa importanteng pangutana nga pirmeng gihunahuna sa mga tawo: Nganong gitugotan sa Diyos nga mahitabo ni? Gisilotan ba ko niya?

 Ang Bibliya nagtudlo nga ang Diyos dili maoy hinungdan sa pag-antos nga nasinati sa mga tawo. Kini nagpasalig nato nga “ang Diyos dili masulayan sa pagbuhat ug daotan, ni siya mosulay kang bisan kinsa pinaagi sa pagbuhat ug daotan.” (Santiago 1:13) Nagpasabot ni nga dili siya ang nagpahinabo sa grabeng pagkadaot sa klima nga nasinati sa mga tawo karon.

 Ang Bibliya dunay rekord sa mga hitabo diin ang Diyos migamit ug puwersa sa kinaiyahan aron silotan ang mga daotan. Pero ang maong mga hitabo lahi sa makadaot nga klima karon, nga kalit rang mahitabo ug makaapektar sa tanang tawo, maayo man o daotan. Sa laing bahin, ang mga asoy sa Bibliya nagpakita nga ang Diyos kanunayng manalipod sa maayong mga tawo, maghatag ug abanteng pasidaan, ug magpatin-aw sa rason kon nganong buhaton niya ang usa ka butang. Pananglitan, ang Diyos nagpatin-aw kon nganong gipalunopan niya ang tibuok kalibotan sa panahon ni Noe, naghatag ug abanteng pasidaan sa wala pa niya kini ipahinabo, ug nanalipod kang Noe ug sa iyang pamilya.—Genesis 6:13; 2 Pedro 2:5.

 Aron mahibalog dugang kon nganong ang mga kalamidad karon dili silot gikan sa Diyos, tan-awa ang artikulong “Unsay Giingon sa Bibliya Bahin sa mga Kalamidad?”

 Ang Bibliya nag-ingon nga si Jehova a nga Diyos mahigugmaon ug maluluy-on. Matikdi ang mosunod nga makapahupayng mga teksto.

•   Isaias 63:9: “[Ang Diyos] nasakitan sa tanan nilang kasakit.”

   Kahulogan: Si Jehova masakitan kaayong magtan-aw sa mga tawong nag-antos.

•   1 Pedro 5:7: “Gimahal [ka] niya.”

   Kahulogan: Si Jehova naghunahuna sa imong kaayohan.

 Ang gugma ug kaluoy ni Jehova nagpalihok niya sa paghupay kanato. Diha sa Bibliya, siya naghatag ug praktikal nga tambag ug seguradong paglaom nga sa umaabot wala nay kalamidad.—2 Corinto 1:3, 4.

 Ang Bibliya naghisgot sa saad ni Jehova nga “makabaton [tag] maayong kaugmaon ug paglaom.” (Jeremias 29:11) Gusto niya nga ang mga tawo malipayong magkinabuhi sa paraisong yuta, diin wala nay makadaot nga klima.—Genesis 1:28; 2:15; Isaias 32:18.

 Ipahinabo kana sa Diyos pinaagi sa iyang Gingharian, usa ka gobyerno sa langit nga ang Hari mao si Jesus. (Mateo 6:10) Si Jesus may kaalam ug gahom nga gikinahanglan aron mapugngan ang mga kalamidad. Sa dinhi pa si Jesus sa yuta, iyang gipakita nga kaya niyang kontrolon ang klima. (Marcos 4:37-41) Siya magmando uban ang pagsabot ug kaalam, nga magtudlo sa mga tawo kon sa unsang paagi atimanon ang palibot ug magkinabuhi nga dili makadaot sa kinaiyahan. (Isaias 11:2) Ubos sa pagmando ni Jesus, ang mga tawo dili na gyod mag-antos tungod sa dili maayong klima.

 Naghunahuna tingali ka, ‘Kanus-a gamiton ni Jesus ang iyang gahom sa pagkontrolar sa klima?’ Aron matubag kana, tan-awa ang artikulong “Kanus-a Magmando sa Yuta ang Gingharian sa Diyos?”

 Ang tambag sa Bibliya makatabang nimo una pa, panahon, ug human sa kalamidad.

•   Una pa sa kalamidad: Pangandam kon unsay himoon.

   Ang giingon sa Bibliya: “Ang tawong maalamon makakita sa kapeligrohan ug molikay niana, pero ang walay kasinatian moderetso ra ug mag-antos sa resulta.”—Proverbio 22:3.

   Kahulogan: Sayra kon unsa nga mga kalamidad ang posibleng mahitabo sa inyong lugar aron mahibalo ka kon unsay himoon ug maprotektahan nimo ang imong pamilya.

   Eksperyensiya: “Dihang nahitabo ang wildfire, andam na mi. Dala na namo ang among mga go bag, tambal, ug sinina. Ang mga tawo sa among palibot nangaratol ug wala na makahunahunag tarong. Pero kay nakapangandam man mi, mapasalamaton kaayo mi!”—Tamara, California, U.S.A.

•   Panahon sa kalamidad: Pagpokus sa kon unsay labing importante.

   Ang giingon sa Bibliya: “Bisag dato ang usa ka tawo, ang iyang kabtangan dili makahatag niyag kinabuhi.”—Lucas 12:15.

   Kahulogan: Ang kinabuhi mas importante kay sa kabtangan.

   Eksperyensiya: “Dihang naguba ang among balay tungod sa Bagyong Lawin, b naglibog ko kon unsay angayng buhaton. Pero kinasingkasing kong nag-ampo kang Jehova nga Diyos. Akong naamgohan nga bisag nawala ang among materyal nga mga butang, ang importante buhi mi.”—Leslie, Pilipinas.

•   Human sa kalamidad: Ayawg kabalaka bahin sa sunod nga adlaw.

   Ang giingon sa Bibliya: “Ayaw gayod kabalaka bahin sa sunod nga adlaw, kay ang matag adlaw dunay kaugalingong mga kabalaka.”—Mateo 6:34.

   Kahulogan: Ayaw kaayog kabalaka sa umaabot.

   Eksperyensiya: “Dihang nabahaan ang among balay tungod sa Bagyong Irma, daghan kog kinahanglang himoong desisyon ug na-stress kaayo ko. Gipaningkamotan nakong masunod ang tambag sa Bibliya nga dili sobrang mabalaka bahin sa sunod nga adlaw. Akong nakita nga sa tabang ni Jehova, makalahutay diay kog lisod nga kahimtang.”—Sally, Florida, U.S.A.

 Alang sa dugang praktikal nga mga sugyot, tan-awa ang artikulong “Kon Dunay Kalamidad—Unsay Angayng Himoon?”