Sa bulan sa Hulyo 2022, sunodsunod nga pagpamusil ang nahitabo sa tibuok kalibotan:

•   “Ang pagpatay sa iladong politiko sa Japan [kanhing Prime Minister Shinzo Abe] nakapatugaw sa nasod ug nakapakurat sa mga tawo sa tibuok kalibotan, ilabina kay wala kaayoy grabeng krimen sa Japan ug estrikto ang mga balaod niini bahin sa pusil.”—Hulyo 10, 2022, The Japan Times.

•   “Nakurat ang mga tawo sa Denmark sa pagpamusil diha sa shopping mall sa Copenhagen nga nakapatayg tulo ka tawo.”—Hulyo 4, 2022, Reuters.

•   “South Africa: 15 ang patay sa pagpamusil diha sa bar sa lungsod sa Soweto.”—Hulyo 10, 2022, The Guardian.

•   “Kapig 220 ang namatay sa pagpamusil sa U.S. panahon sa Hulyo 4 nga holiday weekend.”—Hulyo 5, 2022, CBS News.

 Matapos pa kaha ang maong kapintasan? Unsay giingon sa Bibliya?

 Ang Bibliya nag-ingon nga nagkinabuhi na ta sa “kataposang mga adlaw,” dihang ang mga tawo bayolente, brutal, ug pintas kaayo. (2 Timoteo 3:1, 3) Tungod sa bayolenteng mga krimen, ang mga tawo nangahadlok. (Lucas 21:11) Pero ang Bibliya nagsaad nga moabot ang panahon nga wala nay kapintasan ug ‘ang katawhan magpuyo sa malinawong puloy-anan, sa luwas nga mga puy-anan ug sa malinawon nga mga pahulayanan.’ (Isaias 32:18) Sa unsang paagi matapos ang kapintasan?

 Laglagon sa Diyos ang mga daotan ug wad-on ang tanang hinagiban.

•   “Kon bahin sa mga daotan, sila laglagon gikan sa yuta.”—Proverbio 2:22.

•   “Gipahunong [sa Diyos] ang mga gubat sa tibuok yuta. Gibali niya ang pana ug giputolputol ang bangkaw; gisunog niya ang mga karomata nga panggubat.”—Salmo 46:9.

 Taposon sa Diyos ang mga hinungdan sa kapintasan pinaagi sa pagtudlo sa mga tawo nga magkinabuhing malinawon.

•   “Dili sila magpahinabog bisan unsang kadaot o bisan unsang kagun-oban diha sa tibuok nakong balaang bukid, kay ang yuta mapuno gayod sa kahibalo bahin kang Jehova sama sa katubigan nga nagtabon sa dagat.”—Isaias 11:9.

•   Bisan karon, gitudloan sa Diyos ang mga tawo sa tibuok kalibotan nga dumtan ang kapintasan ug likayan ang paggamit ug mga hinagiban. Ilang “salsalon ang ilang mga espada ug himoong mga punta sa daro ug ang ilang mga bangkaw himoong mga galab.”—Miqueas 4:3.

 Aron mahibalog dugang bahin sa saad sa Bibliya nga kalibotan nga wala nay kahadlok, basaha ang artikulo nga “Kagawasan Gikan sa Kahadlok—Posible ba Kini?”

 Para sa dugang impormasyon bahin sa permanenteng solusyon sa kapintasan, basaha ang artikulo nga “Kalinaw sa Yuta Matagamtam Na Gayod!”