Ang grabeng kapintasan nga nagakahitabo tungod sa politika nakapabalaka pag-ayo sa mga tawo sa tibuok kalibotan.

•   Sa 2023-2024 nga eleksiyon sa Mexico, 39 ka kandidato sa politika ang gipatay, nga mao ang kinatas-ang ihap sukad. Kini ug ang uban pang kapintasan tungod sa politika nakapahadlok pag-ayo sa mga tawo didto.

•   Di pa dugay sa Europe, daghan ang nahitabong kagubot sa politika, apil na ang napakyas nga pagpatay sa prime minister sa Slovakia niadtong Mayo 15, 2024.

•   Sa United States, nahadlok pag-ayo ang mga tawo sa napakyas nga pagpatay sa kanhing presidente nga si Donald Trump niadtong Hulyo 13, 2024.

 Nganong daghan kaayo ang nahitabong kapintasan tungod sa politika? Matapos pa kaha ni? Unsay giingon sa Bibliya?

 Gitagna sa Bibliya nga sa atong panahon, nga gitawag ug “kataposang mga adlaw,” daghang tawo ang magpakitag mga kinaiya nga moresultag kagubot ug kapintasan.

•   “Sa kataposang mga adlaw moabot ang kuyaw nga mga panahong lisod sagubangon. Kay ang mga tawo unya . . . dili mapasalamaton, dili maunongon, . . . dili ikasabot, . . . bayolente, . . . traydor, gahig ulo, garboso kaayo.”—2 Timoteo 3:1-4.

 Gitagna pod sa Bibliya nga ang grabeng kagubot sa politika, apil na ang pagsupak sa mga tawo sa gobyerno, mahitabo sa atong panahon. (Lucas 21:9, footnote) Pero dili ni magdugay.

 Ang Bibliya nag-ingon nga ang Diyos magtukod ug gobyerno sa langit, ug pulihan niini ang tanang gobyerno sa tawo.

•   “Ang Diyos sa langit magtukod ug gingharian . . . Dugmokon ug taposon niini kining tanang [ubang] gingharian, ug kini ray mobarog hangtod sa hangtod.”—Daniel 2:44.

 Pinaagi sa Gingharian sa Diyos, magkahiusa ang tanang tawo ug magmalinawon ang tibuok kalibotan.

•   Ang Magmamando niini, si Jesu-Kristo, gitawag ug “Prinsipe sa Pakigdait,” ug iyang seguroon nga “ang pakigdait walay kataposan.”—Isaias 9:6, 7.

•   Bisan karon, ang mga sakop niini nga Gingharian nagkat-on kon unsay himoon aron makasinati ug tinuod nga kalinaw. Ingong resulta, ang Bibliya nag-ingon: “Ilang salsalon ang ilang mga espada ug himoong mga punta sa daro ug ang ilang mga bangkaw himoong mga galab. Ang nasod dili mobakyaw ug espada batok sa laing nasod, ug sila dili na magkat-on sa pagpakiggubat.”—Isaias 2:3, 4.

 Aron makakat-og dugang, basaha ang artikulo nga “Unsay Himoon sa Gingharian sa Diyos?” ug tan-awa ang video nga Unsa ang Gingharian sa Diyos?