Dako kaayog gasto ang gubat.

•   “Ang mga gobyerno sa tibuok kalibotan migastog 2.2 trillion dollars para sa mga gubat. Kini ang kinadak-ang nagasto sa gubat sukad.”—The Washington Post, Pebrero 13, 2024.

 Pero dili kay kuwarta lang ang nasayang tungod sa mga gubat. Konsideraha pananglitan ang gubat sa Ukraine.

•   Sundalo. Gibanabana nga halos 500,000 ka sundalo ang namatay o nasamdan sukad nagsugod ang gubat duha ka tuig na ang milabay.

•   Sibilyan. Kapig 28,000 ang namatay o nasamdan, sumala sa United Nations. Pero ang usa ka taas ug ranggo nga opisyal sa UN miingon: “Di gyod maihap kon unsa ka daghang kinabuhi ang grabeng naapektohan tungod ani nga gubat.” a

 Nag-antos pag-ayo ang mga tawo tungod sa gubat ug panag-away sa tibuok kalibotan.

•   114 ka milyon. Ang gidaghanon sa mga tawo nga namakwet tungod sa gubat ug panag-away sa tibuok kalibotan, base sa report niadtong Septiyembre 2023.

•   783 ka milyon. Ang gidaghanon sa mga tawo nga nag-antos sa grabeng kagutom. “Ang panag-away mao gihapon ang pangunang hinungdan sa kagutom, ug 70 porsiyento sa mga tawo nga naapektohan sa grabeng kagutom ang nagpuyo sa mga lugar nga naay gubat ug panag-away.”—World Food Programme.

 Matapos kaha ang tanang gubat? Magmalinawon pa ba ang kalibotan? Moabot kaha ang panahon nga wala nay maglisod sa kinabuhi ug mag-antos sa grabeng kagutom? Unsay giingon sa Bibliya?

 Gitagna sa Bibliya nga mahitabo ang daghang gubat sa tibuok kalibotan ug gisimbolohan kini sa usa ka mangangabayo.

•   “Dihay laing migula, usa ka kabayo nga ang kolor samag kalayo, ug ang nagsakay niini gitugotan sa pagkuha sa pakigdait gikan sa yuta aron magpinatyanay ang mga tawo, ug siya gihatagan ug dakong espada.”—Pinadayag 6:4.

 Kini nga mangangabayo gisundan sa duha pa ka mangangabayo nga nagrepresentar sa grabeng kanihit sa pagkaon ug kamatayon tungod sa makamatayng mga sakit o ubang hinungdan. (Pinadayag 6:5-8) Aron makakat-og dugang bahin ani nga tagna sa Bibliya ug kon nganong makatuo ta nga natuman ni sa atong panahon, basaha ang artikulo nga “Kinsa ang Upat ka Mangangabayo?”

 Sa dili madugay, ang mga bahandi sa kalibotan dili na gamiton para sa gubat. Pero dili tawo ang magpahinabo ani. Ang Bibliya nag-ingon:

•   Ang Diyos ‘magpahunong sa mga gubat sa tibuok yuta.’—Salmo 46:9.

•   Wad-on sa Diyos ang pait kaayo nga epekto sa gubat. “Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”—Pinadayag 21:4.

•   Seguroon sa Diyos nga ang tanang tawo magpuyo nga malinawon hangtod sa hangtod. “Ang akong katawhan magpuyo sa malinawong puloy-anan, sa luwas nga mga puy-anan ug sa malinawon nga mga pahulayanan.”—Isaias 32:18.

 Gitagna sa Bibliya nga ang mga gubat ug ubang hitabo karon nagpakita nga hapit nang moabot ang panahon sa kalinaw.

 Unsaon pagpahinabo sa Diyos kining malinawon nga kaugmaon? Pinaagi sa iyang gobyerno, o Gingharian, sa langit. (Mateo 6:10) Aron mahibalo ka kon unsa ni nga Gingharian ug sa unsang paagi ka makabenepisyo ani, tan-awa ang mubong video nga Unsa ang Gingharian sa Diyos?