Sa tibuok kalibotan, daghan ang interesado sa veganism.

•   “Ang veganism maoy pilosopiya ug paagi sa pagkinabuhi nga likayan—kutob sa mahimo ug praktikal—ang bisan unsang paggamit ug pagpasakit sa mga hayop aron himoong pagkaon, sinina, o uban pang katuyoan.”—The Vegan Society.

 Ang ubang tawo nahimong vegan, dili lang tungod kay maluoy sila sa mga hayop, kondili tungod pod sa ilang panglawas, relihiyon, o aron makatabang sila sa kinaiyahan.

•   “Dili sama sa kadaghanang mga diet, ang pagkahimong vegan sagad giisip ingong prinsipyo sa kinabuhi, moral nga desisyon, ug paagi aron mabag-o ang kahimtang sa kalibotan.”—Britannica Academic.

 Ang pagkahimong vegan ba ang solusyon aron naay maayong kaugmaon ang atong planeta? Unsay giingon sa Bibliya?

 Gipakita sa Bibliya nga giisip sa atong Maglalalang, si Jehova nga Diyos, a nga ang mga tawo mas labaw kay sa mga hayop ug gihatagan niya silag awtoridad nga mandoan kini. (Genesis 1:27, 28) Sa ulahi, gitugotan sa Diyos ang mga tawo nga gamiton ang mga hayop ingong pagkaon. (Genesis 9:3) Pero dili niya gusto nga abusohan o pasakitan ang mga hayop.—Proverbio 12:10.

 Sumala sa Bibliya, personal nga desisyon kon mokaon ba tag karne o dili. b Bisag unsa pay atong pilion, dili na makaapekto sa panglantaw sa Diyos kanato. (1 Corinto 8:8) Busa dili nato hukman ang uban kon unsay gusto nilang kaonon.—Roma 14:3.

 Gipakita sa Bibliya nga ang atong paagi sa pagkinabuhi dili makasulbad sa mga problema sa kalibotan. Naa sa sistema sa politika, komunidad, ug ekonomiya ang hinungdan sa daghang problema karon. Ug dili na gyod ni masulbad sa tawo. Ang Bibliya nag-ingon:

•   “Ang baliko dili na matul-id.”—Ecclesiastes 1:15.

 Sulbaron sa atong Maglalalang ang atong mga problema karon. Gipakita sa Bibliya kon unsay iyang himoon.

•   “Ug nakakita kog bag-ong langit ug bag-ong yuta; kay ang unang langit ug ang unang yuta nahanaw na, ug ang dagat wala na.”—Pinadayag 21:1.

 Ang mga gobyerno sa tawo, o “ang unang langit,” pulihan sa Diyos ug “bag-ong langit”—ang iyang langitnong Gingharian. Wagtangon sa iyang Gingharian ang “unang yuta,” nga mao ang mga daotan. Ug mandoan niini ang “bag-ong yuta,” o kadtong andam nga magpasakop sa pagmando sa Gingharian.

 Ubos lang sa pagmando sa Gingharian sa Diyos nga dili na abusohan sa mga tawo ang mga hayop ug ang kinaiyahan.—Isaias 11:6-9.