Kaming mga Saksi ni Jehova dili magsaulog ug adlawng natawhan kay nasabtan namo nga ang maong selebrasyon dili makapahimuot sa Diyos. Bisag ang Bibliya walay direktang gisulti nga dili saulogon ang adlawng natawhan, kini nagtabang namo nga ipatin-aw ang pangunang mga bahin niini nga selebrasyon ug masabtan ang panglantaw sa Diyos. Tagda ang upat sa mga bahin niini ug ang mga prinsipyo sa Bibliya nga nalangkit.

1.   Pagano ang sinugdanan sa pagsaulog ug adlawng natawhan. Sumala sa Funk & Wagnalls Standard Dictionary of Folklore, Mythology, and Legend, kini nga selebrasyon naggikan sa pagtuo nga sa adlawng natawhan sa usa, “mahimo siyang atakehon sa daotang mga espiritu” ug nga “ang presensiya sa mga higala ug ang ilang mga panghinaot makapanalipod sa nagselebrar.” Ang librong The Lore of Birthdays nag-ingon nga sa kakaraanan, ang mga listahan sa adlawng natawhan “hinungdanon sa paghimog horoskopyo” nga gibase sa “misteryosong siyensiya sa astrolohiya.” Kini nga libro midugang nga “sumala sa patuotuo, ang mga kandila dunay espesyal nga gahom sa pagpatuman sa mga butang nga gipangayo.”

    Apan, dulumtanan sa Bibliya ang paggamit ug mahika, pagpanag-an, espiritismo, o “bisan unsa nga sama niini.” (Deuteronomio 18:14; Galacia 5:19-21) Gani, usa sa mga rason kon nganong gidumtan sa Diyos ang karaang siyudad sa Babilonya maoy tungod sa pagbuhat sa mga tawo didto ug astrolohiya, nga usa ka matang sa pagpanag-an. (Isaias 47:11-15) Ang mga Saksi ni Jehova dili man magsigeg panukiduki sa sinugdanan sa matag kostumbre; pero kon ang Kasulatan maghatag ug tin-awng direksiyon sa maong mga buhat, kami dili gyod magbalewala niana.

2.   Ang unang mga Kristohanon wala magsaulog ug adlawng natawhan. Ang The World Book Encyclopedia nag-ingon nga “ilang giisip ang pagselebrar sa adlawng natawhan ingong paganong kostumbre.” Gipakita sa Bibliya nga ang mga apostoles ug uban pang tinun-an nga direktang gitudloan ni Jesus nagbilin ug sumbanan nga kinahanglang sundon sa tanang Kristohanon.—2 Tesalonica 3:6.

3.   Dili adlawng natawhan ang kinahanglang handomon sa mga Kristohanon, kondili ang kamatayon lang ni Jesus. (Lucas 22:17-20) Dili kini ikatingala kay ang Bibliya nag-ingon nga mas maayo pa “ang adlaw sa kamatayon kay sa adlaw nga natawhan.” (Ecclesiastes 7:1) Sa kataposan sa kinabuhi ni Jesus sa yuta, siya nakahimog maayong ngalan diha sa Diyos. Tungod niana, ang adlaw sa iyang kamatayon mas importante kay sa iyang adlawng natawhan.—Hebreohanon 1:4.

4.   Ang Bibliya wala gyod maghisgot nga dunay alagad sa Diyos nga nagsaulog ug adlawng natawhan. Dili ni kay basta nalimtan lang ug rekord kay ang Bibliya naghisgot ug duha ka pagsaulog sa adlawng natawhan sa mga dili alagad sa Diyos. Apan, dili maayo ang nahitabo nianang duha ka pagsaulog.—Genesis 40:20-22; Marcos 6:21-29.

 Sama sa tanang maayong ginikanan, gipakita sa mga Saksi ang ilang pagmahal sa ilang mga anak sa tibuok tuig. Lakip niana ang paghatag ug mga regalo ug paghimog makalingawng mga tapoktapok. Ilang gisundog ang hingpit nga panig-ingnan sa Diyos, kinsa kinasingkasing nga naghatag ug maayong mga butang sa iyang mga anak. (Mateo 7:11) Ang mga anak sa mga Saksi wala mobating hinikawan, ingon sa gipakita sa ilang mga komento:

•   “Mas makapalipay kon makadawat kag regalo nga wala damha.”—Tammy, 12 anyos.

•   “Bisag dili ko makadawat ug regalo sa akong birthday, palitan kog regalo sa akong ginikanan sa laing okasyon. Ganahan ko anâ kay masorpresa ko.”—Gregory, 11 anyos.

•   “Parti na ba nang 10 minutos lang, mga cupcake, ug usa ka kanta? Laag mo sa amoa aron makaila mo kon unsa gyoy tinuod nga parti!”—Eric, 6 anyos.