Dili. Hinunoa, kami maoy mga Kristohanon nga naningkamot sa pagsunod sa panig-ingnan ug mga pagtulon-an ni Jesu-Kristo.

 Ang terminong “kulto” lainlaig kahulogan para sa lainlaing tawo. Apan, tagda ang duha ka komon nga ideya maylabot sa kulto ug kon nganong dili kana mapadapat kanamo.

•   Ang pipila naghunahuna nga ang kulto maoy usa ka relihiyon nga bag-o o lahi sa naandan. Ang mga Saksi ni Jehova wala magmugna ug bag-ong relihiyon. Sa kasukwahi, among gibase ang among paagi sa pagsimba sa sumbanan sa unang-siglong mga Kristohanon, kansang panig-ingnan ug pagtulon-an narekord sa Bibliya. (2 Timoteo 3:16, 17) Kami nagtuo nga ang Balaang Kasulatan angay nga maoy magtakda kon unsay dalawaton maylabot sa pagsimba.

•   Ang uban naghunahuna nga ang kulto maoy usa ka peligrosong sekta sa relihiyon nga may tawhanong lider. Ang mga Saksi ni Jehova walay giila nga tawhanong lider. Hinunoa, among gisunod ang sukdanan nga gilatid ni Jesus alang sa iyang mga sumusunod sa dihang siya miingon: “Usa ra ang inyong Pangulo, si Kristo.”—Mateo 23:10.

 Inay kay usa ka peligrosong kulto, ang mga Saksi ni Jehova nagsunod sa relihiyon nga naghatag ug kaayohan sa ilang kaugalingon ug sa uban diha sa komunidad. Pananglitan, ang among ministeryo nakatabang sa daghan sa pagbuntog sa pagkaadik sa droga ug sa alkoholikong ilimnon. Dugang pa, sa tibuok kalibotan kami naghimog mga klase sa pagbasa ug pagsulat, nga nakatabang sa libolibo. Ug kami aktibong nagtabang niadtong naapektohan sa mga kalamidad. Naningkamot kami nga makahatag ug maayong impluwensiya sa uban, ingon sa gisugo ni Jesus sa iyang mga sumusunod.—Mateo 5:13-16.