Oo. Bisag asa mi nagpuyo, ang tanang Saksi ni Jehova naningkamot sa pagbatog tinamdan, o espiritu, sa pagmisyonaryo, nga regular nga nagpaambit sa among pagtuo sa mga tawong among mahibalag.—Mateo 28:19, 20.

 Dugang pa, ang pipila ka Saksi moduaw o mobalhin sa mga lugar sa ilang nasod diin ang mga tawo kinahanglang makadungog sa maayong balita gikan sa Bibliya. Ang ubang Saksi mobalhin sa langyawng kayutaan aron mapasangkad ang ilang ministeryo. Malipay silang mahimong bahin sa katumanan sa gitagna ni Jesus: “Kamo mahimong akong mga saksi . . . hangtod sa kinalay-ang dapit sa yuta.”—Buhat 1:8.

 Niadtong 1943, gisugdan namo ang usa ka tunghaan nga magtaganag linaing pagbansay alang sa pipila sa among mga misyonaryo. Sukad niadto, kapin na sa 8,000 ka Saksi ang nakapahimulos niining tunghaana, nga nailhang Watchtower Bible School of Gilead.