Kadtong gibawtismohan ingong mga Saksi ni Jehova apan dili na mosangyaw sa uban, tingali wala na makig-uban sa mga isigkamagtutuo, wala namo likayi. Gani, amo silang ginaduaw aron dasigon.

 Dili namo basta ipalagpot ang usa nga nakahimog grabeng sala. Apan, kon ang usa ka bawtismadong Saksi nagbatasan sa paglapas sa moral nga sukdanan sa Bibliya ug dili maghinulsol, siya among likayan o ipalagpot. Ang Bibliya tin-awng nag-ingon: “Kuhaa ang tawong daotan gikan sa inyong taliwala.”—1 Corinto 5:13.

 Komosta kon ang bana gipalagpot apan ang iyang asawa ug mga anak nagpabiling Saksi ni Jehova? Kon bahin sa relihiyon, putol na ang iyang relasyon sa iyang pamilya, apan magpabilin ang ilang relasyon ingong pamilya. Ang panagtiayon, kinaiyanhong pagbati, ug pagpakiglabot sa pamilya magpadayon.

 Ang mga gipalagpot makatambong sa among relihiyosong mga serbisyo. Kon buot nila, sila makadawat ug binase sa Bibliya nga tambag gikan sa mga ansiyano sa kongregasyon. Ang tuyo mao ang pagtabang kanila nga mokuwalipikar pag-usab ingong Saksi ni Jehova. Kon isalikway sa mga gipalagpot ang daotang panggawi ug magpakitag sinserong tinguha sa pagkinabuhi sumala sa sukdanan sa Bibliya, sila makabalik gayod ingong Saksi ni Jehova.