Oo, ang mga Saksi ni Jehova kanunayng motabang dihang may mahitabong katalagman. Kami nagtaganag praktikal nga tabang sa mga Saksi ug dili-Saksi, nga nahiuyon sa sugo sa Bibliya sa Galacia 6:10: “Buhaton nato ang maayo ngadto sa tanan, apan ilabina kanila nga atong kabanay sa pagtuo.” Naningkamot usab kami sa paghatag ug emosyonal ug espirituwal nga pagpaluyo nga gikinahanglan kaayo sa mga naapektohan.—2 Corinto 1:3, 4.

 Human sa katalagman, ang mga ansiyano sa mga kongregasyon sa dapit nga naapektohan maningkamot sa pagkontak sa tanang sakop sa maong mga kongregasyon aron matino kon sila luwas ba ug kon unsang tabang ang ilang gikinahanglan. Dayon pahibaloon sa mga ansiyano ang sangang buhatan (branch office) sa mga Saksi ni Jehova kon unsay resulta sa ilang surbi ug kon unsa nay ilang nahatag nga tabang.

 Kon dili paigo ang hinabang nga matagana sa mga kongregasyon sa maong dapit, ang Nagamandong Lawas sa mga Saksi ni Jehova mohimog kahikayan aron matagana ang panginahanglan. Susama kini sa paagi nga gihimo sa unang mga Kristohanon sa pag-atiman sa usag usa panahon sa gutom. (1 Corinto 16:1-4) Ang sangang buhatan sa maong dapit magtudlog mga Disaster Relief Committee aron maorganisar ug madumala ang pagpanghatag ug hinabang. Ang mga Saksi sa ubang dapit mohatag sa ilang panahon ug kahinguhaan aron makatabang.—Proverbio 17:17.

 Ang ubang donasyon nga gipadala ngadto sa sangang buhatan sa mga Saksi ni Jehova gamiton sa pagtabang sa mga naapektohan sa katalagman. (Buhat 11:27-30; 2 Corinto 8:13-15) Sanglit boluntaryo lang ang tanang nalangkit sa pagpanghatag ug hinabang, ang pondo nga gigahin magamit alang sa panginahanglan sa mga naapektohan, dili sa pagpanuweldo sa mga nagdumala. Gitino namo nga magamit sa hustong paagi kini nga mga donasyon.—2 Corinto 8:20.