Niadtong Oktubre 7, 2013, ang mga Saksi ni Jehova nag-release ug mobile device app para sa pagbasa ug pagtuon sa Bibliya—ang JW Library. Kining libre nga Bible app dunay unom ka Iningles nga hubad sa Bibliya. Lakip niini ang King James Version ug ang 2013 nga rebisyon sa New World Translation of the Holy Scriptures. a

Minilyong tawo na ang dunay smartphone, tablet, o susamang mga butang nga gigamit para sa trabaho ug komunikasyon. Sila makabasa ug maka-download nag Bibliya ug uban pang basahon nga binase sa Bibliya diha sa jw.org. Pero nganong gihimo pa man ang JW Library?

Una, dili na kinahanglag koneksiyon sa Internet kon na-install na kini nga app. Ikaduha, ang mogamit niini dali rang makakitag mga teksto ug makatuon pag-ayo sa Bibliya. Sa unsang paagi?

Inig-abli nimo sa JW Library, makita nimo ang mga basahon sa Bibliya. Kon mopili kag basahon sa Bibliya, makita sa sunod screen ang listahan sa mga kapitulo sa maong basahon. Human niini, makita dayon nimo ang mga bersikulo. Duna pay daghang bahin kini nga app para sa pagtuon sa Bibliya:

• Mga footnote nga nagpakita sa laing hubad sa mga termino ug uban pang impormasyon

• Mga cross reference nga may koneksiyon sa mga bersikulo sa Bibliya

• May search feature aron makita ang tanang paglutaw sa samang mga pulong

• May mubong sumaryo diha sa matag sinugdanan sa basahon sa Bibliya

• Chart nga nagpakita sa magsusulat sa matag basahon sa Bibliya, kon diin ug kanus-a kini gisulat, ug sa gidugayon nga gisulat kini

• Dekolor nga seksiyon sa mga mapa, chart, time line, ug diagram

Sama sa tanang publikasyon sa mga Saksi ni Jehova, ang JW Library libre. Kining libre nga Bible app, nga gisuportahan ug boluntaryong mga amot, na-download na sa kapig usa ka milyong beses. (2 Corinto 9:7) Sulayig download kini ug tan-awa ang mga kaayohan niining madaladalang librarya.