Mga trabahante nagsemento sa atubangan sa garahean nga butangan sa mga makinarya sa konstruksiyon.

Mga kontraktor nagtaod sa mga atop sa bilding nga himoong mga opisina ug kan-anan panahon sa konstruksiyon.

Sa main entrance, usa ka trabahante ang naggamit ug excavator nga may gitaod nga tree shear aron putlon ang pinili nga mga kahoy. Lugpitan sa tree shear ang kahoy ug putlon ang punoan, ug dayon dad-on sa excavator ang kahoy. Aron mahulipan ang naputol nga piniling mga kahoy, magtanom ang mga landscaper ug linibo ka bag-ong mga kahoy sa dili pa mahuman ang proyekto.

Gipanguha sa mga trabahante ang wala kinahanglanang mga butang gikan sa yuta nga nabilin sa unang tag-iya. Hinloan ang yuta ug gamiton pag-usab.

Giandam sa mga trabahante ang pag-alsa sa temporaryong mga cabin gamit ang crane. Gamiton sa permanenteng team sa konstruksiyon ug sa mobisitang mga kontraktor kini nga mga cabin ingong mga opisina ug service facilities.

Gilain sa mga trabahante ang mapuslan pang mga butang diha sa mga recycling bin. Gusto sa Construction Project Committee nga makuha ang 95 porsiyento sa tanang nonhazardous waste gikan sa mga landfill, apan mas daghan pa ang ilang nakuha. Dugang pa, 89 porsiyento sa tanang nabungkag​—sama sa bricks, semento, ug kahoy—​ang nahipos aron magamit pag-usab sa ubang bahin sa site.

Membro sa siteworks team nagtabon sa kanal nga gibutangag mga tubo. Kini nga mga kanal gamiton sa temporaryong mga puy-anan sa mga trabahante sa konstruksiyon.

Kontraktor nga nanguhag sampol sa yuta aron matino kon angayan bang buhatag mga karsada ang site.

Niadtong Mayo 31, 2016, kini nga disenyo ang giaprobahan sa Nagamandong Lawas sa mga Saksi ni Jehova. Kay aprobado na sa Nagamandong Lawas ug sa lokal nga mga awtoridad, masugdan na ang konstruksiyon.

Gipanguha sa mga trabahante ang wala kinahanglanang mga butang sa yuta nga gikubkob gikan sa site. Ang nahinloang yuta mahimong gamiton sa laing dapit sa site. Pinaagi niini, namenosan ang gasto sa pagkuhag yuta gikan sa site ug pagpalit ug bag-ong yuta nga ipuli niini.

Gihinloan sa mga trabahante ang luna nga tukoran sa dalan sa main entrance. Padayon ang trabaho bisan sa bulan nga kusog kaayo ang ulan, nga nagpalapok sa pipila ka bahin sa site.

Gibisbisan ang karsada aron dili kaayo moabog. Ang pagmentinar sa building site nga hinlo maoy bahin sa code of practice sa Considerate Constructors Scheme, usa ka organisasyon nga ang Construction Project Committee nagparehistro aron sundon ang mga balaod sa pagpanukod diha sa lungsod. Ang code of practice nga gipatuman sa maong organisasyon nahiuyon sa mga prinsipyo sa Bibliya sa pagtahod sa komunidad ug pagpakitag konsiderasyon sa silingan.

Trabahante nagputol ug kabilya nga taoran sa mga tray nga butangag mga tubo nga pang-air condition.

Gilain sa mga trabahante ang 20,000 cubic meters (26,000 cu yd) nga yuta ug bato. Makita sa tunga sa hulagway nga ang yuta gikarga sa hopper. Pinaagig mga ayagan, mabulag ang dagko ug gagmayng bato, ug ang yuta mahulog sa ubos. Ang mga conveyor sa tulo ka kilid magdala sa lainlaing materyal ngadto sa mga dump truck.

Gibuldos sa mga kontraktor ang yuta aron makab-ot ang gikinahanglang lebel sa yuta para sa tukorong mga bilding.

Sa tungang bahin sa hulagway dapit sa wala, nakompleto na sa mga kontraktor ang paglebel sa yuta aron masugdan ang paggamag mga pundasyon sa mga residence building. Sa layolayog diyutay sa itaas nga wala makita ang nahuman nga residential support site, nga kapuy-ag 118 ka trabahante sa konstruksiyon.