Human sa kusog nga ulan sa amihanang Italy sa hinapos sa Nobyembre 2016, ang ubang lugar sa habagatan sa lungsod sa Moncalieri gibahaan. Naay mga lugar nga lapas tunga sa metros ang tubig. “Wala gyoy gipasaylo ang baha,” matod sa usa ka newspaper. Mga 1,500 ka residente ang gikuha dayon sa lokal nga mga awtoridad, ug maayo na lang nga milihok dayon ang mga rescue team maong walay namatay nga residente. Pero daghang pamilya ang nawad-ag kabtangan.

Ang mga team sa mga Saksi didto milihok dayon. Mitabang sila sa apektadong mga pamilya pinaagi sa pagpala sa mga lapok ug basura pagawas sa balay ug sa pagsalbar sa mga furniture ug personal nga mga gamit. Dihang ang usa ka team nga nagdalag mga gamit ug init nga pagkaon nakaabot sa dalan nga dili paagian, gitugotan sila sa mga awtoridad nga molahos aron makatabang sa pamilya nga nanginahanglan. Gitabangan sa mga boluntaryo ang ilang mga isigka-Saksi, apil sab ang ilang mga silingan nga lahig relihiyon.

Pananglitan, ang basement sa usa ka apartment bilding napunog tubig. Human mahabwa sa mga rescue service ang tubig, usa ka dakong team sa mga Saksi mitabang sa ilang igsoon sa pagtuo nga si Antonio ug sa iyang pamilya sa paghabwa sa mga butang ug basura sa ilang basement. Dayon gitabangan sa mga boluntaryo ang ubang residente sa bilding. Ang mga boluntaryo nagpasahay ug sulod lang sa pipila ka oras, nahabwa ang tanang naa sa matag basement. Nagpasalamat gyod ang tanan sa ilang tabang. Si Viviana, usa sa mga residente, miduol sa asawa ni Antonio ug nagluha nga nagpasalamat: “Palihog, isulti sa inyong mga igsoon ang among pasalamat​—dalayegon kaayo mo!”

Sa usa ka lugar nga nadaot pag-ayo sa baha, giobserbahan sa mga residente ang mga team sa mga Saksi nga mitabang sa mga apektado. Kay natandog sa ilang nakita, ang ubang residente mitabang sa mga boluntaryo ug malipayong misunod sa mga instruksiyon sa lider sa team.

Ang balay sa usa ka lalaki nadaot pag-ayo ug napunog lapok ang garahe. Bilib kaayo siya sa walo ka Saksi kay sulod sa upat ka oras, wala silay hunong sa paghabwa sa mga butang ug basura sa iyang garahe. Sa iyang apresasyon, iyang gigakos ang pipila sa mga nagtrabaho ug gi-post niya sa social media ang iyang pagpasalamat sa ilang “dako kaayong tabang.”

Matod sa usa ka Saksi: “Daghang silingan namo nga dili Saksi among gitabangan, ug daghan nila kapin nag 80 anyos. Ang uban nila naghilak nga nagpasalamat sa among gihimo.” Usa sa mga silingan nga Katoliko ug aktibo kaayo sa ilang parokya miingon sa mga Saksi nga naapresyar kaayo niya ang ilang tabang. Miingon sab siya: “Nindot kaayo nga bisag magkalahi tag tinuohan, nagtinabangay ta.” Ang laing tawo miingon: “Makapaguol nga ang nahibaloan lang sa uban mao ang inyong pagduaw sa mga tawo kada Domingo sa buntag, ug wala sila mahibalo sa inyong pagkamatinabangon.”