Dihang may panginahanglan, tabangan sa mga Saksi ni Jehova ang ilang isigka-Saksi ug ang uban. Buhaton nila kini tungod sa gugma, ang ilhanan sa matuod nga mga Kristohanon.​—Juan 13:35.

Ang mosunod nga listahan mao ang tabang nga nahimo sa kapig 12 ka bulan nga natapos sa tungatunga sa 2012. Kini nga listahan wala maglakip sa espirituwal ug emosyonal nga tabang nga uban kanunay sa among mga paningkamot. Ang Disaster Relief Committees nga gitudlo sa among mga branch offices maoy nag-organisar sa kadaghanan sa maong tabang. Dugang pa, ang lokal nga mga kongregasyon regular nga nakigbahin sa pagtabang.

Japan: Sa Marso 11, 2011, ang linog ug ang tsunami nga misunod nga miigo sa northern Japan, gikataho nga nakaapektar ug linibo ka tawo. Ang mga Saksi ni Jehova sa tibuok kalibotan dagayang naghatag ug kuwarta, katakos, ug ubang kahinguhaan aron makatabang nga maulian ang mga naapektohan. Tan-awa ang among video bahin sa mga hinabang sa linog sa Japan.

Brazil: Tungod sa mga pagbaha, pagdahili sa yuta (landslide), ug pagbahag lapok (mudslide), daghang tawo ang namatay. Busa ang mga Saksi ni Jehova nagpadalag 42 toneladas nga mga pagkaon, 20,000 ka botelyang tubig, 10 toneladas nga sinina, ug 5 toneladas nga mga gamit sa pagpanghinlo, ug mga tambal ug uban pa ngadto sa naapektohang mga dapit.

Congo (Brazzaville): Dihang mibuto ang usa ka ammunition dump, 4 ka balay sa mga Saksi ni Jehova ang nabungkag ug 28 ka balay sa ubang mga Saksi ang nadaot. Gihatagag pagkaon ug sinina ang naapektohan, ug ang mga naapektohan gipapuyo sa lokal nga mga Saksi ngadto sa ilang mga balay.

Congo (Kinshasa): Gihatagag tambal ang mga biktima sa cholera. Gipadad-an usab ug mga sinina ang mga naapektohan sa baha tungod sa bunok nga pag-ulan. Ang mga nagpuyo sa mga refugee camp gihatagan usab ug mga tambal, binhi nga itanom, ug daghang sinina.

Venezuela: Ang bunok nga pag-ulan miresultag pagbaha nga may dalang lapok. Ang mga disaster relief committees nakatabang ug 288 ka Saksi nga naapektohan. Kapig 50 ka bag-ong balay ang gitukod, ug gitabangan usab sa mga relief committees kadtong may mga balay nga nalunopan tungod sa pagtaas sa tubig sa Lake Valencia.

Philippines: Tungod sa mga bagyo, daghang lugar sa nasod ang gibahaan. Ang sangang buhatan nagpadalag mga pagkaon ug sinina ngadto sa mga biktima, ug ang lokal nga Saksi mitabang sa pagpanghinlo human sa baha.

Canada: Pagkahuman sa dakong sunog sa lasang sa Alberta, ang Slave Lake Congregation nakadawat ug dakong donasyon gikan sa mga Saksi sa maong rehiyon aron sa pagtabang sa pagpanghinlo. Tungod kay dili ra man gyod kuwarta ang gikinahanglan, gi-donate sa mga kongregasyon kapin sa katunga sa nadawat nilang kuwarta ngadto sa ubang bahin sa kalibotan nga biktima sa katalagman.

Côte d’Ivoire: Mga butang, puy-anan, ug medical nga pag-atiman ang gihatag ngadto sa nanginahanglan sa wala pa ang gubat sa nasod, panahon sa gubat, ug human niana.

Fiji: Tungod sa grabeng pagbaha tungod sa bunok nga pag-ulan, kadaghanan sa naapektohang 192 ka pamilyang Saksi nawad-ag uma, nga maoy tinubdan sa ilang pagkaon ug kinitaan. Gihatagan silag mga pagkaon.

Ghana: Ang mga naapektohan sa baha sa eastern region sa nasod gihatagag pagkaon, binhi nga itanom, ug balay puli sa nadaot.

United States: Ang mga tornado nakadaot ug 66 ka balay sa mga Saksi diha sa tulo sa estado ug bug-os nagbungkag sa 12 ka balay sa mga Saksi. Bisag kadaghanan sa mga tag-iya may insurance, gihatagan gihapon silag kuwarta isip tabang.

Argentina: Ang mga kongregasyon sa mga Saksi ni Jehova mitabang sa ilang mga isigka-Saksi sa southern nga bahin sa nasod kansang mga balay nadaot tungod sa abo sa bolkan.

Mozambique: Kapig 1,000 ka tawo nga naapektohan sa hulaw ang gihatagag pagkaon.

Nigeria: Tungod sa aksidente sa bus, 12 ka Saksi ang naangol ug gitabangan sa pinansiyal. Gitabangan sab ang daghang Saksi sa norte nga bahin sa nasod nga nawad-ag mga balay tungod sa away sa relihiyon.

Benin: Ang mga naapektohan sa grabeng pagbaha gihatagag tambal, sinina, moskitero, limpiyong tubig, ug kapuy-an.

Dominican Republic: Human sa Hurricane Irene, ang lokal nga mga kongregasyon mitabang sa pag-ayo sa mga balay ug sa paghatag ug materyal nga tabang.

Ethiopia: Gitabangan ang mga naapektohan sa duha ka dapit nga gihulaw ug sa usa ka dapit nga gibahaan.

Kenya: Gitabangan sa pinansiyal ang mga naapektohan sa hulaw.

Malawi: Gitabangan ang mga nagpuyo sa Dzaleka refugee camp.

Nepal: Tungod sa pagdahili sa yuta (landslide) nadaot pag-ayo ang balay sa usa ka Saksi. Gitagan-an siyag temporaryong kapuy-an, ug gitabangan siya sa lokal nga kongregasyon.

Papua New Guinea: Gisunog sa mga arsonista ang walo ka balay sa mga Saksi. May gihimo nang kahikayan nga matukod kini pag-usab.

Romania: Ang pipila ka Saksi nawad-ag mga balay tungod sa pagbaha. Gitabangan sila nga matukod pag-usab ang ilang mga balay.

Mali: Gikan sa Senegal, gihatagag pinansiyal nga tabang kadtong walay makaon kay walay ani tungod sa hulaw.

Sierra Leone: Gitabangan sa mga doktor gikan sa France ang mga Saksi ni Jehova nga nagpuyo sa mga dapit nga nadaot tungod sa gubat.

Thailand: Ang grabeng pagbaha nakahatag ug dakong kadaot sa daghang probinsiya. Ang mga relief team mitabang sa pag-ayo ug paglimpiyo sa 100 ka balay ug 6 ka Kingdom Hall.

Czech Republic: Human sa pagbaha diin daghang balay sa Czech Republic ang nadaot, ang mga Saksi sa silingang nasod sa Slovakia mitabang sa paghatag ug tabang.

Sri Lanka: Natapos na ang kadaghanang disaster-relief nga buluhaton maylabot sa tsunami.

Sudan: Ang mga pagkaon, sinina, sapatos, ug mga plastic sheets gipadala ngadto sa mga Saksi ni Jehova nga naapektohan tungod sa gubat sa nasod.

Tanzania: Panahon sa grabeng pagbaha, 14 ka pamilya ang nawad-ag mga butang. Ang mga kongregasyon niining dapita nag-donate ug mga sinina ug mga gamit sa balay. Usa ka balay ang giayo.

Zimbabwe: Tungod sa hulaw, nagnihit ang pagkaon sa usa ka dapit sa nasod. Ang mga naapektohan gihatagag pagkaon ug kuwarta.

Burundi: Ang mga refugee gipadad-ag mga tabang, lakip ang medical nga pag-atiman.