Natawo ko sa siyudad sa Calgary sa Alberta, Canada. Masuso pa ko dihang nagdiborsiyo ang akong mga ginikanan, ug mibalhin mi ni Mama sa balay sa akong mga apohan. Pinangga mi nila ni Mama, ug malipayon ko nga bata. Makahinumdom pa ko sa malipayon ug malinawon nga mga panahon sa akong pagkabata.

 Pag-edad nakog siyete, nabag-o ang akong kinabuhi dihang giminyoan pag-usab ni Mama si Papa ug namalhin mi sa St. Louis, Missouri, sa United States. Pait kaayo to para nako. Nakita nako nga pintas si Papa. Pananglitan, pag-uli nako gikan sa unang adlaw sa akong bag-ong eskuwelahan, iyang nahibaloan nga gi-bully ko pero wala ko mosukol. Nasuko siya ug gisumbag ko niya nga mas kusog kay sa sumbag sa mga nang-bully nako sa eskuwelahan. Sukad adto, nakakat-on ko nga mosukol ug bisag siyete anyos pa ko nakig-away na ko sa uban.

 Putong ang akong papa maong masuko niya si Mama. Kanunay silang maglalis. Nagsugod ko pagdroga ug paghuboghubog dihang 11 anyos ko. Nahimo kong mas agresibo ug kanunay kong makakitag away diha sa karsada. Paggraduwar nakog hayskol, bayolente na kaayo ko nga tawo.

 Pagka-18 anyos nako, misulod ko sa U.S. Marine Corps. Didto ko nakakat-on sa pagpatay ug tawo. Human sa lima ka tuig, migawas ko sa military aron magtuon ug psychology kay gusto kong motrabaho sa Federal Bureau of Investigation. Mieskuwela ko sa usa ka unibersidad sa United States ug gipadayon ang akong kurso sa Canada pagbalik nako didto.

 Didto sa unibersidad, nahigawad ko pag-ayo sa mga tawo ug sa katilingban. Para nako, kaugalingon ray gihunahuna sa mga tawo, walay pulos ang tanang naa sa kalibotan, ug walay kasulbaran ang mga problema sa tawo. Nawad-an kog paglaom nga ang mga tawo dunay mahimo aron moarang-arang ang kahimtang sa kalibotan.

 Walay katuyoan ang akong kinabuhi maong napokus ko sa paghuboghubog, pagdroga, pagpangitag sapi, ug pagpakigsekso. Ang sulod lang kanunay sa akong hunahuna mao ang pagpartiparti bisan diin ug ang pagpakigsekso kang bisan kinsang babaye. Isog kaayo ko kay gikan man ko sa military maong kanunay kong makakitag away. Nagtuo ko nga nahibalo ko kon unsay husto ug sayop ug komprontahon nako si bisan kinsa nga nagdaogdaog sa uban. Pero ang tinuod, misamot ko pagkabayolente.

 Usa ka adlaw dihang kami sa akong amigo na-high sa droga diha sa basement sa among balay ug nangandam nga magpayuhot ug marijuana aron ibaligya, gipangutana ko niya kon motuo ba kog Diyos. Miingon ko, “Kon Diyos ang hinungdan sa pag-antos sa kalibotan, dili nako siya gustong mailhan!” Pagkaugma, sa unang adlaw sa akong bag-ong trabaho, gipangutana ko sa kauban nako sa trabaho nga Saksi ni Jehova, “Para nimo, ang Diyos ba ang hinungdan sa pag-antos sa kalibotan?” Nakurat ko kay tayming kaayo ang iyang pangutana maong nainteres ko. Sa misunod nga unom ka bulan, daghan mig nahisgotan, ug iyang gipakita nako ang mga tubag sa Bibliya sa pipila ka lisod nakong mga pangutana bahin sa kinabuhi.

 Ang akong pangasaw-onon, nga puyopuyo nako adtong panahona, dili gusto nga estoryahan nako siya sa akong mga nakat-onan. Usa ka Dominggo, giingnan nako siya nga giimbitar nako sa balay ang mga Saksi aron magtuon ming duha ug Bibliya. Pagkaugma, pag-uli nako gikan sa trabaho, nasayran nako nga gipanguha niya ang tanan diha sa balay ug iyang kong gibiyaan. Migawas ko ug mihilak. Miampo sab ko sa Diyos ug nagpakitabang. Kadto ang unang higayon nga gigamit nako diha sa pag-ampo ang personal nga ngalan sa Diyos, si Jehova.—Salmo 83:18.

 Duha ka adlaw sa ulahi, nagsugod kog tuon sa Bibliya kauban sa usa ka magtiayong Saksi. Pagbiya nila, gipadayon nakog basa ang librong Ikaw Mabuhing Walay Kataposan sa Paraiso sa Yuta, ug nahuman nako tog basa niadtong gabhiona. a Natandog gyod ko sa akong nakat-onan bahin kang Jehova nga Diyos ug sa iyang anak nga si Jesu-Kristo. Nasayran nako nga si Jehova maluluy-on ug masakitan siya kon mag-antos ta. (Isaias 63:9) Natandog ko ilabina sa gugma sa Diyos kanako ug sa sakripisyo nga gihimo sa iyang Anak para nako. (1 Juan 4:10) Nakaingon gyod ko nga mapailobon si Jehova kanako “kay dili niya gusto nga naay malaglag kondili gusto niya nga ang tanan maghinulsol.” (2 Pedro 3:9) Gibati gyod nako nga gusto ni Jehova nga mahimo ko niyang higala.​—Juan 6:44.

 Misugod kog tambong sa mga tigom sa kongregasyon niana mismong semanaha. Taas kog buhok, dunay ariyos, ug hadlok kog hitsura, pero gitratar ko sa mga Saksi nga daw paryente ko nila nga dugay nang nawala. Nakita nako sa ilang mga lihok nga sila matuod nga mga Kristohanon. Gibati nako nga morag naa ko sa balay sa akong mga apohan, pero karon mas labaw ang akong kalipay.

 Sa wala madugay anam-anam nga nabag-o ang akong kinabuhi tungod sa mga nakat-onan nako sa Bibliya. Nagpatupi ko, gihunong ang tanang imoral nga buhat, ug miundang ko sa pagdroga ug paghuboghubog. (1 Corinto 6:9, 10; 11:14) Gusto nakong mapalipay si Jehova. Busa dihang masayran nako nga wala niya mauyoni ang akong gibuhat, dili nako ipakamatarong ang akong kaugalingon. Hasolon ko sa akong konsensiya. Moingon ko sa akong kaugalingon, ‘Dili ko puwedeng mag-ingon ani.’ Unya paningkamotan dayon nakong bag-ohon ang akong panghunahuna ug buhat. Pinaagi niini, akong nakita ang kaayohan kon buhaton nako ang gusto ni Jehova. Niadtong Hulyo 29, 1989—human sa unom ka bulan nga pag-Bible study—nabawtismohan ko ingong Saksi ni Jehova.

 Nakatabang ang Bibliya nga mabag-o ang akong personalidad. Sa una, bayolente kog reaksiyon kon dili ko tarongon ug tratar sa usa ka tawo. Pero karon naningkamot ko nga ‘makigdait sa tanang tawo.’ (Roma 12:18) Nahimo ni nako dili tungod sa kaugalingong paningkamot kondili sa tabang ni Jehova pinaagi sa iyang Pulong ug balaang espiritu.—Galacia 5:22, 23; Hebreohanon 4:12.

 Sa una adik ko sa droga, bayolente, ug imoral, pero karon naningkamot ko nga mapalipay si Jehova ug mahatag ang akong kinamaayohan. Apil ana ang pagtabang sa uban nga mailhan siya. Pipila ka tuig human sa akong bawtismo, mibalhin ko sa laing nasod nga may dakong panginahanglan sa magwawali. Sulod sa mga katuigan, dako ang akong kalipay nga matudloan ang daghang tawo ug makita nga natabangan sila sa Bibliya. Nalipay sab ko nga nahimong Saksi ni Jehova ang akong mama. Usa sa mga nakatabang niya mao ang maayong mga kabag-ohan nga iyang nakita sa akong kinaiya ug panggawi.

 Niadtong 1999, sa El Salvador, migraduwar ko sa gitawag na karong School for Kingdom Evangelizers. Kadto nagbansay ug nagtabang nako sa pagpanguna sa buluhatong pag-ebanghelyo ug sa pagtudlo ug pagbantay sa kongregasyon. Sa ulahing mga bahin nianang tuiga, giminyoan nako ang akong guwapang asawa nga si Eugenia. Kaming duha nag-alagad ingong bug-os panahong magsasangyaw sa Guatemala.

 Sa una nawad-an nakog paglaom sa kinabuhi, pero karon malipayon na kaayo ko. Ang pagpadapat sa mga gitudlo sa Bibliya nakatabang nako nga mapahigawas sa imoral nga pagkinabuhi ug dili na mahimong bayolente. Tungod niini, ang akong kinabuhi natugob sa tinuod nga gugma ug kalinaw.